1 - 2 Na, pagka mbal kasandalan pangentom kami ma kaˈam, anganiyat kami amatibaw si Timuti piˈilu, boˈ kami duwangan taˈbba ma daˈira Aten itu. Si Timuti itu, danakan kami asal maka seheˈ kami maghinang kahinangan Tuhan. Magbeyaˈ kami magnasihat lapal ahāp pasal Al-Masi. Pinatibaw iya piˈilu boˈ amahogot imanbi maka amakosog pangandolbi ma Tuhan. 3 Ya kabayaˈan kami subay halam aniyaˈ tabowa maghenggol-henggol imanna ma sabab kabinasahan ya kalabayanbi ilu. Kataˈuwanbi asal, pinakadal kitam kabinasahan pagka sukuˈ Al-Masi. 4 Bay sa kam nihakaˈan waktu kamailu kami, in kitam sukuˈ Al-Masi tantu tˈkkahan kabinasahan. Jari kasakupanbi na, paniyaˈ na bay pangahaka kami. 5 Angkanna, pagka mbal na kasandalanku susaku ma kahālanbi, bay sohoˈku si Timuti piˈilu angahati kaˈam bang masi ahogot pagimanbi ma si Isa Al-Masi. Ya kahanggawanku, kalu kam bay tasasat eˈ nakuraˈ saitan, sabab bang kam tabowa eˈ sasat saitan, kaliman bay hinang kami mailu. 6 Daipara itiyaˈ na si Timuti bahaˈu bay atˈkka min kaˈam, maka ahāp toˈongan habal ya tabowana pasalbi. Yukna ahogot masi pagimanbi ma Tuhan maka masi na paˈin paglasabi dangan maka dangan. Yukna isab ahāp ataybi tudju ni kami itu, maka aheya bayaˈbi angˈndaˈ kami, buwat kaheya bayaˈ kami magˈndaˈ maka kaˈam. 7 Angkanna, saga dauranakan, minsan kami ma deyom kasigpitan maka kabinasahan, ahogot du atay kami sabab makataˈu na kami in kaˈam halam apinda min pangandolbi ma Tuhan. 8 Ahāp na palnyawahan kami pagka kataˈuwan kami in pameyaˈbi ma Panghūˈ Isa atotog du. 9 Magsukul na kami ni Tuhan ma sababbi, sabab kaˈam ya poˈonna angkan aheya kakōgan kami ma matahanna. 10 Llaw-sangom atukid kami angamuˈ-ngamuˈ ni Tuhan, bang paˈin kami magˈndaˈ maka kaˈam, boˈ kam katabangan kami bang aniyaˈ mbal giˈ jukup ma pagimanbi. 11 Mura-murahan, bang paˈin kami tinabang eˈ Mmaˈtam Tuhan maka eˈ Panghūˈtam si Isa boˈ kami makatūy piˈilu ni kaˈam. 12 Mura-murahan isab, bang paˈin kam tinabang eˈ Panghūˈtam boˈ lumabihan lasabi ma saga seheˈbi dambeyaˈan ilu sampay ma manusiyaˈ kamemon, buwat isab lasa kami ma kaˈam. 13 Bang paˈin pinatotog ataybi eˈ Panghūˈ supaya kam asussi maka saltun ma matahan Mmaˈtam Tuhan ma waktu kabalik piˈitu Panghūˈ Isa, beyaˈ maka baˈanan aˈa sukuˈna.
