1 Aniyaˈ isab pamituwaku ma saga pagmattoˈahan ya ma deyomanbi, sabab pagmattoˈahan isab aku. Mataku itu bay makaˈndaˈ kabinasahan Al-Masi, maka aniyaˈ du isab lamudku ma sinosōng bang iya pinabangsa na ma pangˈndaˈ saga manusiyaˈ kamemon. Ya na itu amuˈku ni kaˈam: 2 Upiksaˈunbi pahāp saga aˈa bay pangandol ma kaˈam eˈ Tuhan, ya saliˈ dalil bili-bili pinaipat ma kaˈam. Ayarinbi sigām min kōg maka bayaˈ, sabab ya na itu kabayaˈan Tuhan. Daˈa kam subay nihagda. Ya pangupiksaˈbi ma sigām subay nggaˈi ka pagpilak, subay min kahilasanbi sadja. 3 Daˈa pagmandahinbi saga aˈa bay pamaˈatas kaˈam, gom paˈin kam panunuran sigām. 4 Jari bang piˈitu pabalik si Isa Al-Masi, ya dalil nakuraˈ magupiksaˈ bili-bili, landuˈ ahāp panungbasna ma kaˈam. Ya tungbas inān mbal magkapinda kahāpna, sabab makahampit kam ma sahayana. 5 Na, kaˈam isab saga lˈlla abataˈ lagiˈ, beyaˈunbi pamituwa pagmattoˈahanbi ilu. Subay areyoˈ pangatayanbi sabubi magtabang-tiyabangi, sabab yuk lling Kitab, "Angatu Tuhan ma aˈa alanga atayna, sagōˈ tabangna sasuku areyoˈ atayna." 6 Angkan kam subay magpatireyoˈ ni Tuhan Sangat Kawasa, boˈ kam pinalanga eˈna bang taˈabut llaw bay panganggantaˈna. 7 Tukbalunbi kasusahanbi kamemon ni Tuhan, sabab magkaˈinagon du iya. 8 Pahāpunbi pamikilbi, pajaga kam toˈongan. Sabab ilu bantabi nakuraˈ saitan amiha kaˈam. Saliˈ iya sapantun halimaw maglunsul na paˈin, kalu aniyaˈ tapihana nilˈkkob eˈna. 9 Atuhunbi nakuraˈ saitan ma ahogot pangandolbi ma si Isa, sabab kataˈuwanbi nggaˈi ka hal kaˈam ya tˈkkahan kabinasahan, sampay isab saga pagkahibi Almasihin ma kaluhaˈan dunya. 10 Sagōˈ aubus paˈin eˈbi anandalan kabinasahan ma daiˈ-daiˈ, binawiˈ du kam eˈ Tuhan sampay halam aniyaˈ sallaˈbi. Pinatotog eˈna imanbi, binuwanan du kam kosog boˈ mbal apinda min pangandolbi ma iya. In iya Tuhan poˈonan tatabangan. Pinagabbit kam eˈna supaya kam pinabangsa ma deyom kasahayaˈanna ya mbal magkapinda, pagka Al-Masi ya parakayuˈanbi. 11 Sanglitantam Tuhan, ya sangat kawasa sampay ni kasaumulan. Amin. 12 Si Silas bay anabangan aku anulat sulat apuˈut itu. Bang ma bistahanku in iya dakayuˈ danakantam tantu kapangandolan. Bilahi aku amahogot ataybi, ya poˈon aku amabeyaˈ sulat itu. Sugpatanku isab saksiˈku, in itu tatabangan sabˈnnal-bˈnnal deyoˈ bay min Tuhan. Daˈa bbahinbi. 13 Amabeyaˈ minsan laˈa hal lapal sigām saga pagkahibi bebeyaˈan Al-Masi ya magsakaum maitu ma lahat Babilon, aˈa tapeneˈ eˈ Tuhan buwat kaˈam. Ya du si Markus itu, ya itungku saliˈ anakku. 14 Magsiyum kam tandaˈ sin paglasabi dangan maka dangan. Mura-murahan, bang paˈin kam pinaniyaˈan kasannangan deyom atay, sasuku kam sukuˈ Al-Masi. Wassalam
