1 Na, pagka Al-Masi bay makalabayan kabinasahan ma ginhawa-baranna, ya du kaˈam subay anengoran iya boˈ kam sakap anandal kabinasahan. Sabab sai-sai angananam kabinasahan buwattēˈ, angˈbba na min katagihanna magdusa. 2 Jari puwas itu, satˈggolbi maitu ma dunya, subay kam pinagagihan eˈ kabayaˈan Tuhan. Daˈa na kam pinagagihan eˈ napsu maka bayaˈ manusiyaˈ, 3 ya pineneˈ eˈ saga aˈa ya mbal ataˈuwan Tuhan. Atˈggol bay kapaghinangbi kasabulan makatamparasa, magbaˈis maka maglangohan. Sakahabaˈ waktu pagtipunbi maglami-lami, landuˈ aheka bay inumbi. Bay kam pasumba isab ni taˈu-taˈu ya sammal ma pangˈndaˈ Tuhan. Sagōˈ sarang na. 4 Ma buwattinaˈan ainu-inu saga aˈa bay seheˈbi waktu tagnaˈ bang angay kam mbal na palamugay ni sigām angandūlan napsubi. Angkanna kam binissalahan laˈat eˈ sigām. 5 Saguwāˈ aniyaˈ du waktu paharap saga aˈa inān ni Tuhan angahaka pasal bay kahinangan sigām. Asakap asal Tuhan angahukum binangsa manusiyaˈ, saga aˈa masi allum sampay aˈa bay magpatayan. 6 Ya itu sababanna angkan lapal ahāp itu bay pinagnasihat sampay ni umagad saga aˈa magpatayan, boˈ supaya sigām pinaniyaˈan kallum ma haddarat Tuhan, minsan sigām bay pinalabayan hukuman ya panganggantaˈan manusiyaˈ pagma-dunya lagiˈ. 7 Sōng na kiyamat dunya itu, angkan subay ahāp sadja kōkbi. Subay ahantap eˈbi amikil boˈ ahāp pangamuˈ-ngamuˈbi ni Tuhan. 8 Maka ya na itu subay pahalgaˈbi min kamemon: maglasa-liyasahi kam toˈongan, sabab bang kam maglasa sabˈnnal-bˈnnal tantu kam magampun-iyampuni minsan painay heka kasāˈanbi. 9 Bang aniyaˈ saga pagkahibi bebeyaˈan si Isa gantaˈ pahapit ni lumaˈbi, daˈa kam magmusmud. Paˈiddahunbi sadja sigām min atay poteˈ. 10 Aniyaˈ ma kaˈam kapandayan bay pamuwan eˈ Tuhan pakaniya-kaniya. Jari paggunahunbi kapandayanbi ilu panabangbi ni kaseheˈan, sabab patut du bang ahāp eˈbi angangguna kataˈu atawa kapandayan bay pangandol ma kaˈam eˈ Tuhan. 11 Sai-sai apanday magnasihat, subay lapal min Tuhan ya pagnasihatna. Sai-sai ataˈu anabang ma seheˈna, subay iya anabang toˈongan min kosog bay pangahandak iya eˈ Tuhan. Sabab minnēˈ pinaheya ōn Tuhan ma ai-ai hinangbi, pagka si Isa Al-Masi ya pamanyabutanbi. Patut iya pinasukuˈan kasahayaˈan maka barakat sampay ni kasaumulan. Amin. 12 Saga bagay kalasahanku, daˈa kam kinoblaˈan ma sabab kabinasahan aheya ya tumˈkka panulayan kaˈam, sabab maumu aniyaˈ buwattēˈ. 13 Sagōˈ palasigunbi ataybi, sabab tananambi na kabinasahan buwat bay kalabayan Al-Masi, jari aheya du kakōganbi bang pinaˈndaˈan na sanglit sahayana ni kamemon. 14 Subay kam kinōgan bang kam pinamūng-mūngan alaˈat ma sabab Al-Masi ya pameyaˈanbi, sabab ilu patˈnnaˈ ma kaˈam Rū barakatan, ya na Rū Tuhan. 15 Bang kam taluwaˈ kabinasahan, subay halam aniyaˈ sababanna, buwat saga bay amapatay aˈa, bay anangkaw, bay magpilliyu, atawa minsan bay palamud ma palkalaˈ aˈa nggaˈi ka lamudbi. 16 Sagōˈ bang kam pinananaman kabinasahan ma sabab Almasihin kam, daˈa kam aiyaˈ. Magsukul sadja kam ni Tuhan ma sabab ōn Al-Masi ya pangōn kaˈam. 17 Song na waktu panagnaˈ hukuman Tuhan, sagōˈ kitam ma deyomanna ya nihukum dahū. Bang buwattēˈ kahālanna, bang kitam sukuˈna pinatˈnnaˈan hukuman, ai kamaujuran saga aˈa mbal magkahagad ma lapal ahāp ya min Tuhan? 18 Buwat yukna ma deyom Kitab, "Bang aˈa adil mbal agon lappasan, lubaˈ-lagiˈna na aˈa baldusa, ya mbal angisbat Tuhan!" 19 Angkanna, sai-sai kam angalabayan kabinasahan sabab iya na kahandak Tuhan ma kaˈam, pasangdan kam maghinang ahāp. Pangandolunbi isab baranbi ni bay amapanjari kaˈam, sabab tantu iya kapangandolan.
