1 Angkan kam subay angˈbbahan kamemon kahinanganbi ajahil. Daˈa kam magputing. Daˈa kam magbauˈ-bauˈ in kaˈam ahāp boˈ paˈin masi alaˈat deyom ataybi. Daˈa kam angalindi, maka daˈa kam angalimut seheˈbi. 2 Pasaliˈ kam ni ondeˈ-ondeˈ bahaˈu nianakan, ya aruruˈ na paˈin. Ya du kaˈam subay angabut-ngabut angadjiˈ palman Tuhan. Saliˈ dalil gatas ahāp koˈ inān, ya makapasangpot pangandolbi sampay taˈabutbi kasalamatanna, 3 pagka tananambi na bang buwattingga kahāp Panghūˈ ma kaˈam. 4 - 5 Pasekot na kam ni si Isa, ya dalil batu allum ni kasaumulan. Pasekot kam boˈ kam pinagguna eˈ Tuhan pangahinanganna lumaˈ patˈnnaˈan Rū-na. Pinaralil isab kam ni batu allum, maka si Isa iya batu aheya pamahogotan lumaˈ Tuhan. Bay tasulak si Isa Al-Masi eˈ saga aˈa, sagōˈ pineneˈ iya eˈ Tuhan sabab landuˈ ahalgaˈ ma atayna. Jari mainaˈan du kam ma lumaˈ Tuhan maghinang ni iya min itikad abontol, buwat dalil imam. Mainaˈan kam anukbal ni iya saga kapudjihanbi maka kahinanganbi ahāp. Jari kaˈamuhan iya ma panukbalbi sabab si Isa Al-Masi ya pamanyabutanbi. 6 Buwattitu ya tasulat ma deyom Kitab: "Aniyaˈ batu landuˈ ahalgaˈ tapeneˈku, patˈnnaˈku nihinang papagan lumaˈ ma daˈira Siyun. Jari sasuku angandol ma iya halam du aniyaˈ kapagsusunanna." 7 Tantu ahalgaˈ batu itu ma kaˈam ya magpangandol ma si Isa. Saguwāˈ aniyaˈ mbal bilahi magkahagad, ya sinambat ma ayat Kitab dakayuˈ, ya yuk-i, "Ya batu bay tasulak eˈ saga aˈa maghinang lumaˈ, kinabāˈ halam aniyaˈ gunana, ya na inaˈan batu aheya toˈongan kalagihanna." 8 Maka aniyaˈ giˈ ayat dakayuˈ, yuk-i, "Ya inaˈan batu parugtulan tapeˈ aˈa, batu pamahˈbbaˈan." Bˈnnal koˈ heˈ. Mbal sigām magkahagad ma palman Tuhan pasal si Isa, ya poˈon sigām saliˈ dalil aˈa makarugtul ni batu. Ya na tuˈud pangahandak Tuhan ma sigām. 9 Malaingkan tapeneˈ kam eˈ Tuhan boˈ kam tahinang kaimaman magsusultan, bangsa sussi, aˈa palsukuˈan Tuhan. Nilinganan kam eˈna paluwas min kalendoman, boˈ papinda ni kasawahanna makainu-inu. Tapeneˈ kam boˈ supaya patanyagbi pasal kahinangan Tuhan ahāp makalanduˈ. 10 Ma waktu bay dahū inān nggaˈi ka kam sukuˈ Tuhan, sagōˈ aˈa Tuhan na kam ma buwattitu. Bay kam aˈawam ma pasal kaˈaseˈ Tuhan ma waktu palabay, saguwāˈ tananambi na kaˈaseˈna. 11 Saga bagay kalasahanku, saliˈ kitam aˈa liyu ma dunya itu sabab aniyaˈ lahattam saddī. Angkan buwattitu panganjunjungku ma kaˈam: daˈa toˈongan dūlinbi napsu baranbi alaˈat, sabab napsuta itu magsaggaˈ asal maka kapameyaˈta ma Tuhan. 12 Ya kalˈngngananbi subay ahantap sadja minsan kam ma deyoman saga aˈa mbal ataˈuwan Tuhan. Minsan sigām bilahi anunaˈan kaˈam maghinang alaˈat, taˈndaˈ eˈ sigām saga hinangbi ahāp, ya poˈon sigām ananglitan Tuhan ma llaw kapiˈituna. 13 Subay kam magpabeyaˈ sadja ma saga aˈa kamemon sasuku taga-kagˈllal, ma sabab Panghūˈ Isa ya pameyaˈanbi. Kaissana, beyaˈunbi panohoˈan min sultan mahatinggi, ya alanga min kamemon ma lahat itu. 14 Pasunuˈ, beyaˈunbi panohoˈan min saga gubnul, ya kabuwanan kapatut aminasa sasuku maghinang alaˈat, maka ananglit ma sasuku maghinang ahāp. 15 Sabab ya na itu kabayaˈan Tuhan ma kaˈam, hinangunbi kahāpan. Jari pagˈndaˈ saga aˈa kulang panghati inān ma kahinanganbi, magtūy patambol bowaˈ sigām. Pahondong sigām amūng-mūng karupangan. 16 Limaya na kam, maka ahāp isab. Saguwāˈ daˈa kam anumagal in kaˈam makajari maghinang alaˈat ma sabab limaya na. Ata Tuhan na kam, angkan kam limaya maghinang panohoˈanna sadja. 17 Pagaddatinbi manusiyaˈ kamemon. Kalasahinbi pagkahibi magpangandol ma si Isa, pagmatāwinbi Tuhan, pagaddatinbi sultan mahatinggi. 18 Kaˈam saga sosohoˈan maghinang ma aˈa, angalillaˈ sadja kam ma aˈa ya paghinanganbi. Nggaˈi ka hal aˈa ahāp kasuddahanna, aˈa alasa ma kaˈam ya subay pagaddatanbi. Subay pagaddatinbi sigām minsan isab abˈngngis. 19 Bang kam gantaˈ bininasa ma halam aniyaˈ sāˈbi paminasahan kaˈam, boˈ paˈin sandalanbi ma sabab Tuhan ya paheyabi ma atay, kasulutan Tuhan ma kaˈam. 20 Sagōˈ bang kam angimanan katiksaˈan ya pinapagtongod maka hinangbi alaˈat, mbal kam patut sinanglitan. Sagōˈ bang kam anandal kabinasahan minsan bay makahinang ahāp, kasulutan du Tuhan ma kaˈam. 21 Ya na heˈ asal kabayaˈan Tuhan ma kaˈam, in kaˈam subay asandal ma deyom kabinasahan. Al-Masi ya panunuranbi sabab bay na iya anandalan kabinasahan ma sababanbi. Pasaliˈ kam ni iya. 22 Halam toˈongan iya bay makarusa, halam iya bay makapahˈlling puting minsan min tˈdda. 23 Ma waktu bay kapamūng-mūng alaˈat ma iya, halam iya bay anambung alaˈat. Waktu kapaminasa ma iya, halam iya bay ananggupan sai-sai. Gom paˈin pangandolna baranna ni Tuhan ya abontol hukumanna. 24 Bay tinanggung eˈ si Isa karusahantam pagka amatay ma hāg pangalansangan ma iya, supaya kitam angˈbba min dusatam boˈ amanuyuˈ kahinangan abontol. Kauliˈan kitam ma sabab saga bakat bay tananamna. 25 Bay kam saliˈ sapantun bili-bili alungay min paglabayan, sagōˈ ma buwattinaˈan pabibud na kam boˈ pabeyaˈ ma Al-Masi, ya angupiksaˈ kaˈam sampay anganjagahan nyawabi.
