1 Sulatanta kam pasal si Isa Al-Masi, ya palman pamoˈonan kallum. Min awal tagnaˈ asal palman itu. Bay iya takale kami, bay iya taˈndaˈ maka mata kami. Tatanding iya maka kaˈntanan eˈ kami. 2 Bay na palahil ya niōnan Poˈonan Kallum. Bay iya taˈndaˈ kami, jari kami itu saksiˈna angkan kami angahakaˈan kaˈam ma pasalna, ya amuwan kallum kakkal. Bay iya ma Mmaˈna Tuhan asal min kaˈasalna, boˈ bay paˈndaˈ ni kami. 3 Jari in bay taˈndaˈ maka takale kami, ya na heˈ pamataˈu kami ni kaˈam boˈ supaya kam pauyun ma kami magdaˈatay maka Mmaˈtam Tuhan sampay anakna si Isa Al-Masi. 4 Sulatanta kam sulat itu boˈ supaya ajukup kakoyagantam. 5 Ya na itu lapal bay takale kami min si Isa Al-Masi, lapal pangahaka kami ma kaˈam: in Tuhan asal poˈonan kasawahan. Halam aniyaˈ kalendoman ma kajarihanna minsan dangkuriˈ. 6 Angkan koˈ, bang kita gantaˈ magpaˈin in kita daˈatay maka Tuhan boˈ masi kita ma deyom kalendoman dusa, putingan kita pagka mbal ameyaˈ ma kasabˈnnalan. 7 Kakkal Tuhan ma deyom karantaˈan, jari bang kita pasengod ni iya pataptap ma karantaˈan, daˈatay kita. Maka sinussi kita min dusata kamemon sabab min lahaˈ si Isa Anak Tuhan. 8 Abila yukta halam aniyaˈ dusata, angakkalan kita di-ta maka halam aniyaˈ kasabˈnnalan ma deyom kajarihanta. 9 Sagōˈ bang kita magpasabˈnnal ni Tuhan pasal paldusahanta, tantu kita niampun. Sinussi isab kita min kalaˈatanta kamemon sabab tinuman eˈ Tuhan janjiˈna, maka abontol kahinanganna. 10 Bang yukta in kita halam bay makarusa, saliˈ pahiputingta Tuhan, ati halam pasobsob lapal palmanna ni deyom atayta.
