1 Limaya aku magbayaˈan di-ku. Bay aku kawakilan eˈ Panghūˈ Isa, sinōˈ magnasihat lapalna. Bay iya taˈndaˈ mataku. Maka kaˈam ya kamaujuran hinangku ma Panghūˈ, pagka kam angandol na ma iya. 2 Minsan aku mbal kinahagad eˈ saga kaseheˈan in aku bay kawakilan eˈ si Isa Al-Masi, tantu du kahagadbi sabab kaˈam baranbi ya tandaˈ saksiˈ in aku kawakilan eˈna. Sabab aku ya poˈonan angkan kam ameyaˈ ma iya. 3 Bang aku pinariksaˈ eˈ sai-sai ma pasal kahinanganku, buwattitu ya panambungku: 4 halam bahāˈ aniyaˈ kapatutku binalanjaˈan eˈ saga aˈa panduˈanku? 5 Halam bahāˈ aniyaˈ kapatutku maghˈnda ma dˈnda angandol ma si Isa, supaya aniyaˈ seheˈku ma lˈngngananku? Taga-hˈnda saga danakan si Panghūˈ Isa lˈlla maka saga aˈa kawakilan kaseheˈan buwat si Petros. 6 Atawa hal kami bahaˈ maka si Barnabas ya subay magusaha supaya aniyaˈ napaka kami? 7 Bang saupama sundalu, aniyaˈ bahāˈ mbal binalanjaˈan eˈ parinta? Atawa aˈa maghuma, aniyaˈ bahāˈ mbal amangan min buwaˈ kayu ya tanomna? Atawa aˈa magipat sapiˈ atawa kambing, aniyaˈ bahāˈ mbal patut angāˈ gatas min saga hayop ya ipatna heˈ? 8 Nggaˈi ka isab hal kahālan manusiyaˈ ya pangāˈanta taˈu pasal kapatut ma saga aˈa maghinang, anguyun isab Kitab Tawrat. 9 Tasulat asal ma panohoˈan-saraˈ si Musa, yuk-i, "Daˈa sampongunbi sapiˈ sabuna anganggiˈikan pai". Pangannalbi bahāˈ sapiˈ sadja ya pinagkaˈinagonan eˈ Tuhan ma ayat Kitab eˈ? 10 Tuˈud manusiyaˈ ya pinagkaˈinagonan eˈna angkan pinasulat saraˈ inān. Paralilanta aˈa magararu maka aˈa magani. Ya angkan sigām maghinang ma deyom huma sabab aniyaˈ holat sigām kabuwanan palsukuˈan min buwaˈna. Kami itu saliˈ dalil aˈa maghuma inān. 11 Bay kami anganasihatan kaˈam lapal Tuhan, saliˈ dalil binhiˈ ma deyom pikilanbi. Angkan kam subay mbal takuddat bang kami binuwanan bahagiˈ min kaniyaˈbi. 12 Bang gurubi kaseheˈ taga-kapatut binalanjaˈan eˈbi, lubaˈ-lagiˈna kami itu. Saguwāˈ halam kami bay mikibalanjaˈ ma kaˈam minsan aniyaˈ kapatut kami. Gom paˈin kami anandalan kasigpitan boˈ supaya halam aniyaˈ makaˈagpangan lapal ahāp pasal Al-Masi. 13 Kataˈuwanbi asal, minsan saga aˈa maghinang ma deyom langgal pagkulbanan, langgal ya pangāˈan sigām kinakan. Maka saga imam ya anukbalan susumbaliˈan pagkulban, binahagiˈan du sigām isi hayop pagkulban. 14 Damikiyanna isab saga aˈa magnasihat lapal ahāp, aniyaˈ panohoˈan Panghūˈ Isa subay sigām binalanjaˈan eˈ sasuku magkahagad ma lapal inān. 15 Sagōˈ halam bay gunaku kapatutku. Maka nggaˈi ka balanjaˈ ya mohotku angkan anulat ni kaˈam. Padpad aku mikibalanjaˈ ma kaˈam, bilahi giˈ aku amatay, sabab ya pagbantugku in aku halam bay angamuˈ binalanjaˈan. 16 Mbal aku makajari magbantug pasal pagnasihatku lapal ahāp, sabab hinangku asal bay panohoˈan aku eˈ si Isa Al-Masi. Aheya kasusahanku bang mbal pagnasihatku. 17 Bang aku bay makapeneˈan di-ku maghinang buwattitu, patut du aku ginadjihan. Sagōˈ nggaˈi ka min bayaˈku hal, tuˈud hinang bay pangandol eˈ Tuhan ma aku angkan wajib hinangku. 18 Manjari ai panambahan aku? Katambahan aku bang paˈin tapagnasihatku lapal ahāp ma halam aniyaˈ bayadna, minsan aniyaˈ kapatutku binalanjaˈan. 19 Luhaya aku magbayaˈan di-ku, nggaˈi ka aku banyagaˈ. Sagōˈ minsan buwattēˈ, magpabanyagaˈ aku di-ku maghinang ni aˈa kamemon supaya aheka tabowaku angandol ma si Isa. 20 Angkanna, bang aku palamud ma saga bangsa Yahudi, beyaˈku addat sigām Yahudi boˈ supaya sigām tabowaku angandol ma si Isa. Minsan aku apuwas min saraˈ si Musa ya niusul na paˈin eˈ bangsa Yahudi, beyaˈku sadja satˈggolku ma deyoman sigām, boˈ sigām tabowa angandol ma si Isa Al-Masi. 21 Boˈ arapun bang aku magbeyaˈ maka saga aˈa nggaˈi ka Yahudi, mbal beyaˈku saraˈ agama Yahudi. Beyaˈku addat saga bangsa liyu boˈ supaya sigām isab tabowaku angandol ma si Isa. Sagōˈ minsan mbal beyaˈku saraˈ agama Yahudi, masi du aku ameyaˈ ma saraˈ Tuhan sabab beyaˈku du panohoˈan Al-Masi. 22 Bang aku gantaˈ magbeyaˈ maka saga aˈa ya halam giˈ ahogot pangandol sigām tudju ni si Isa, amasaliˈ aku di-ku ni sigām boˈ supaya tabowaku angandol toˈongan. Manjari minsan ai bangsa, pasaliˈ aku ni sigām supaya aniyaˈ min sigām lappasan min hukuman dusa. 23 Angkan buwattēˈ hinangku, supaya pasaplag lapal ahāp pasal si Isa Al-Masi ni saga aˈa kamemon, boˈ aku isab palamud ni kahāpan ya tumabeyaˈ ma lapal ahāp. 24 Biyaksa kam ma hatulan paglomba, aheka aˈa pasōd maglomba sagōˈ dangan du angandaˈug boˈ anambut kahāpan ya panungbas ma aˈa angandaˈug. Paralilan koˈ itu ma kaˈam ya bebeyaˈan Al-Masi, angkan kam sohoˈku maglomba toˈongan boˈ kam makasambut kahāpan ma sinosōng. 25 Taliˈ-taliˈunbi isab ya addat saga aˈa bilahi maglomba. Magmahil sigām maka amaggat napsu sigām supaya makaraˈug sampay minahaldikaˈ maka korona dahun kayu, ya alˈkkas alanos. Sagōˈ kitam bebeyaˈan si Isa angangut pinaniyaˈan kamahaldikaˈan ya anatas ni kasaumulan. 26 Angkan sengoranku aˈa maglomba, ya mbal paragan mˈssaˈ-biddaˈ sabab aniyaˈ tudjuna tantu. Sengoranku isab aˈa magsuntuk, ya mbal anuntuk pehēˈ-piˈitu sabab aniyaˈ tigiˈna. 27 Paggatku napsuku sabab mbal aku bilahi sinulak eˈ Tuhan minsan bay makapagnasihat lapalna ma aˈa kaseheˈan.
