1 Na, bang aniyaˈ palsaggaˈanbi maka pagkahibi bebeyaˈan si Isa, angay tˈkkahanbi ni saraˈ luwasan, ni nggaˈi ka bebeyaˈan si Isa? Arapun pasaraˈbi ma saga aˈa sukuˈ Tuhan. 2 Araiˈ mbal kataˈuwanbi in kitam saga sukuˈ Tuhan angahukum bangsa manusiyaˈ kamemon ma llaw damuli. Jari bang kitam angahukum saga aˈa ma sinosōng ma palkalaˈ aheya, lubaˈ-lagiˈna na kam makapangahukum saga palkalaˈ arikiˈ. 3 Maraiˈ mbal kataˈuwanbi, in kitam angahukum isab bangsa malaˈikat ma waktu sinōng. Jari bang tahukumtam saga malaˈikat, lubaˈ-lagiˈna na saga palkalaˈ ya kalabayanbi ma dunya itu. 4 Angkan bang aniyaˈ palkalaˈbi, subay pasaraˈbi ma saga aˈa areyoˈ kapagaˈa sigām ma deyomanbi saga jamaˈa Al-Masi. 5 Buwattitu pahˈllingku supaya kam aiyaˈ. Angay bahāˈ, halam aniyaˈ aˈa ma deyomanbi minsan dakayuˈ taga-pangitaˈu angahukum kaˈam bebeyaˈan Al-Masi bang aniyaˈ palsaggaˈanbi? 6 Sagōˈ biyaksa kam anˈkkahan palkalaˈbi ni saraˈ luwasan, ati mikisaraˈ kam ma sigām ya mbal angandol ma si Isa. 7 Saliˈ halam aniyaˈ dapatbi sabab aniyaˈ na paˈin palkalaˈbi ma deyomanbi. Bang kam saupama nilaˈat atawa kinulliˈan eˈ pagkahibi bebeyaˈan si Isa, ahāp lagiˈ imananbi. 8 Sagōˈ ilu kam angulliˈ maka angalaˈat boˈ paˈin danakanbi ya nilaˈat. 9 Halam bahāˈ kataˈuwanbi? Bang aˈa alaˈat kajarihanna mbal pinahampitan pusakaˈ ma pamarintahan Tuhan. Pahalliˈ kam boˈ mbal niakkalan. Sasuku maghinang kalaˈatan dˈnda maka lˈlla, atawa pasumba ni taˈu-taˈu, atawa angaliyu-lakad min pagholaˈna, sasuku isab lˈlla atawa dˈnda maghinang kahinaˈan maka pagkahina lˈlla-dˈnda, tantu halam aniyaˈ palsukuˈan sigām ma okoman pagparinta Tuhan. 10 Damikiyanna saga aˈa anangkaw, aˈa anganapsuhan altaˈ seheˈna, aˈa paglalango, aˈa pangalimut, maka aˈa pangalangpas. 11 Ma waktu tagnaˈ aniyaˈ min kaˈam bay buwattēˈ, sagōˈ buwattinaˈan sinussi na kam min dusabi. Pinasukuˈ na kam ma Tuhan sadja maka taitung kam abontol ma sabab Panghūˈ Isa Al-Masi maka Rū Tuhantam. 12 Aniyaˈ ahˈlling yukna, "Makajari aku angahinang ai-ai kabayaˈanku bang paˈin nggaˈi ka langgal saraˈ." Bˈnnal koˈ inān, sagōˈ aniyaˈ bayaˈbi mbal makahāp. Aniyaˈ isab aminaˈin, yukna, "Makajari aku magdūl-bayaˈ ma baranku." Bˈnnal isab, sagōˈ mbal aku bilahi binanyagaˈ eˈ napsuku. 13 Yuk dakayuˈ isab, "Pagkakan itu bay pinaniyaˈ boˈ niˈisi ni bˈttong, maka bˈttongta itu bay pinaniyaˈ pangisihan pagkakan." Bˈnnal koˈ inān, sagōˈ in pagkakan maka bˈttong pinatobtob saliˈ-saliˈ eˈ Tuhan. In ginhawa-barantam itu mbal patut pinagguna maghinang kahinaˈan dˈnda maka lˈlla. Ya angkan aniyaˈ ginhawa-barantam sabab si Isa ya pagpanghūˈantam, maka Panghūˈ Isa ya tag-kapatut ma ginhawa-barantam. 14 Bay iya pinakallum eˈ Tuhan pabīng min kamatayna, maka ya du kitam pinakallum ma sinosōng sabab min kosogna. 15 Kataˈuwanbi na in kitam angandol ma Al-Masi, saga barantam itu saliˈ dalil pagdayaw pamaranan Al-Masi. Angkanna, bang aˈa binista saliˈ pagdayaw baran Al-Masi, mbal patut bang iya pahulid ni dˈnda alaˈat hinangna. 16 Kataˈuwanbi du, sai-sai pahulid ni dˈnda alaˈat, magdakayuˈ iya maka baran dˈnda heˈ, buwat bay tasulat ma deyom Kitab, ya yuk-i, "Lˈlla maka dˈnda bay duwa baran tahinang dabaran na." 17 Sagōˈ bang kitam parakayuˈ ni Panghūˈ Isa, magdakayuˈ atay kitam maka iya. 18 Amay-amay. Daˈa kam maghinang kalaˈatan dˈnda maka lˈlla. Dusa saddī minnēˈ mbal makainay baranta, sagōˈ bang kita pabihing ni nggaˈi ka pagholaˈta, makabuwan kita dusa ni baranta. 19 Halam bahāˈ kataˈuwanbi? In ginhawa-baranbi saliˈ sapantun lumaˈ patˈnnaˈan Rū Sussi ya pamuwan kaˈam eˈ Tuhan boˈ patˈnnaˈ ma deyom baranbi. Tuhan ya tag-dapu baranbi, nggaˈi ka kaˈam. 20 Bay kam nilˈkkat eˈna boˈ kam makapuwas min karusahanbi, maka ahalgaˈ pangalˈkkatna. Angkan subay gunabi ginhawa-baranbi pamaheyabi ōn Tuhan.
