1 Takaleku suli-suli, aniyaˈ konoˈ ma deyomanbi ilu aˈa maghinang kalaˈatan dˈnda maka lˈlla. Minsan saga aˈa mbal angisbat Tuhan, mbal makaharus maghinang buwattēˈ. Kahakaˈan aku aniyaˈ ma kaˈam lˈlla maghulid maka inaˈna tapeˈ! 2 Boˈ ilu kam magmalangkahian di-bi. Arapun kam magkarukkaˈan ma sabab aniyaˈ aˈa ma pagtipunanbi magkasumbang. Aˈa inān subay pinaluwas min kaˈam saga jamaˈa si Isa. 3 Minsan aku halam mailu magbaran, mailu du aku ma deyom pamikil sabab mbal kam alungay min pangannalku. Taga-kapatut aku min Panghūˈ Isa amatˈnnaˈan hukuman ma aˈa maghinang kalaˈatan ilu, buwat eˈku mailu ma kaˈam. 4 Bang kam gantaˈ magtipun min ōn Panghūˈ Isa, bistahunbi aku saliˈ mailu ma tˈngngaˈbi, maka ilu isāb ma kaˈam kapatut min Panghūˈtam Isa. 5 Tukbalinbi aˈa magdusa ilu ni pangˈntanan nakuraˈ saitan boˈ bininasa baranna, ati kalappasan nyawana bang taˈabut llaw kapangahukum Panghūˈtam ma bangsa manusiyaˈ. 6 Mbal taluwaˈ bang kam maglanga-langa di-bi. Kataˈuwanbi bissala, ya yuk-i, "Dangkuriˈ du pasulig ati pabuskag katibuˈukan addunan." In pasulig itu pamaralil aˈa angandusa. Minsan iya dakayuˈ du, palemed laˈatna ni kamemon. 7 Laˈaninbi pasulig ndang boˈ supaya kam sapantun addunan bahaˈu ya halam aniyaˈ pasuligna. Kataˈuwanku in kaˈam asussi asal ma sabab Al-Masi bay amatay, sapantun bili-bili sinumbaliˈ ma waktu kapaghinang Hinang Paglakad. 8 Angkan kitam subay maghinang ni Tuhan ma halam aniyaˈ kalaˈatantam atawa kalumuˈan. Subay tuyuˈantam addat-tabiˈat ahāp toˈongan, min atay sussi maka min kasabˈnnalan. 9 Na, ma lapal sulat bay pabeyaˈanku kaˈam tagnaˈ, bay kam sohoˈku paokat min aˈa magdˈnda atawa maglˈlla. 10 Nggaˈi ka saga aˈa ya mbal amˈnnal ma si Isa ya sibahatku, buwat saga aˈa maghinang kalaˈatan dˈnda maka lˈlla, magnapsu karalaman, magpanangkaw, magsumba ni taˈu-taˈu. Subay kam halam na maitu ma dunya boˈ paokat katūyan min kamemon saga aˈa dusahan. 11 Sagōˈ ya yukku heˈ, daˈa kam palamud ma aˈa ya amūng-mūng in iya pagkahibi bebeyaˈan si Isa, boˈ paˈin masi magdˈnda, atawa anganapsuhan altaˈ seheˈna, atawa anumba ni taˈu-taˈu, atawa angalimut, atawa maglalango atawa panangkaw. Daˈa kam minsan pasalu ma saga aˈa buwattēˈ. 12 - 13 Halam aniyaˈ kapatutku analassay palkalaˈ ma saga aˈa ma luwasan palhimpunan jamaˈa Al-Masi. Tuhan sadja ya angahukum sigām. Sagōˈ kitam saga jamaˈa si Isa Al-Masi wajib amatˈnnaˈ hukuman saga seheˈtam dapalhimpunan. Tasulat asal ma deyom Kitab, yuk-i, "Palaˈanunbi aˈa alaˈat min deyomanbi."
