1 In kami maka si Apollos subay itungbi sosohoˈan Al-Masi. Bay pangandol ma kami eˈ Tuhan saga panduˈ bˈnnal ya halam bay pinataˈu ma bangsa manusiyaˈ dahū. 2 Bang saupama aniyaˈ pamahinang aˈa eˈ nakuraˈna, patut bang aˈa inān kapangandolan ma ai-ai bay pamahinang iya. 3 Mbal pamagayku bang kaˈam atawa saraˈ manusiyaˈ anallaˈ aku. Mbal na aku anallaˈ atawa angandapit di-ku. 4 Halam aniyaˈ kasāˈan tananamku ma deyom pangatayanku, sagōˈ minsan buwattēˈ, kalu aniyaˈ kasāˈan tuˈud halam bay tananamku. Panghūˈ Isa ya taga-kapatut anallaˈ aku. 5 Angkan kam subay daˈa magdaiˈ-daiˈ amatˈnnaˈ kasāˈan ma kaseheˈanbi ma halam giˈ waktu pangahukum. Subay na pabīng Panghūˈ Isa boˈ yampa aniyaˈ hukuman. Pinatampal du eˈna ai-ai bay tatauˈ ma deyom kalendoman. Pinaluwas eˈna saga maksud maka niyat bay tinapukan eˈ manusiyaˈ ma deyom panahuˈan. Manjari sinanglitan saga manusiyaˈ eˈ Tuhan, pinapagtongod maka bay kahinangan sigām. 6 Saga dauranakanku, bay sambatku si Apollos maka aku baranku supaya aniyaˈ kapamintānganbi, ati boˈ taˈanadbi bang ai hatina bissala itu, ya yuk-i, "Daˈa kam palabi min bay pamatˈnnaˈ eˈ Tuhan ma kaˈam." Mbal ahāp bang bantugbi aˈa dakayuˈ, boˈ pareyoˈbi isab aˈa dakayuˈ. 7 Angay yukbi in kaˈam alanga min kaseheˈanbi? Tuhan ya bay amuwanan kaˈam ai-ai kaniyaˈbi. Angay kam magbantug in kaˈam taga-kaniyaˈ, boˈ paˈin hal pamuwan ma kaˈam? 8 Ajukup kam bahāˈ ma pikilanbi? Dayahan bahāˈ kam? Tahinang kam sultan bahāˈ, boˈ paˈin kami itu halam? Ahāp du isab ma aku bang kam sabˈnnal-bˈnnal tahinang sultan boˈ supaya kitam makapagnakuraˈ sama-sama. 9 Angkan buwattēˈ bay pahˈllingku ma kaˈam, sabab bang ma bistahanku in kami saga aˈa kawakilan pinareyoˈ toˈongan eˈ Tuhan, min deyoˈan aˈa kamemon. Saliˈ kami aˈa sapantun nihukum subay pinapatay ma mairan. Tahinang kami pangˈndaˈ-ndaˈan eˈ bangsa malaˈikat maka bangsa manusiyaˈ. 10 In kami saga kawakilan itu kinabāˈ dupang ma sabab Al-Masi ya pameyaˈan kami, boˈ kaˈam ilu, ahāp konoˈ kōkbi pagka sōd kam ma si Isa. Angay bahāˈ? Kami itu binista alamma, boˈ kaˈam ilu abasag. Kami itu pinagudjuˈ, boˈ kaˈam ya pinagmahaltabatan. 11 Sampay ni kabuwattituhan magsandal kami ma lingantu maka ma patay boheˈ. Ya pasˈmmek kami basak sˈmmek. Araran isab kami pinaglaˈugan, maka halam aniyaˈ patˈttogan kami. 12 Magsangsāˈ kami maghinang boˈ aniyaˈ napaka kami. Bang kami sinuknaˈan eˈ aˈa, gom paˈin sigām amuˈan kami lidjikiˈ ni Tuhan. Bang kami pininjalaˈ, hal imanan kami. 13 Bang kami nihinaˈ eˈ sai-sai, bissala sangkahāpan ya panambung kami ma sigām. Sampay ni kabuwattinaˈanan binista kami eˈ sigām saliˈ halam aniyaˈ kagunahan ma babaw dunya itu, saliˈ sˈggit ma deyoˈ tapeˈ sigām. 14 Sulat itu nggaˈi ka pamaiyaˈ-iyaˈ sagōˈ pamanduˈku, sabab kaˈam ilu saliˈ saga anakku ya kalasahanku toˈongan. 15 Sabab minsan ibu-ibuhan aˈa magpanduˈan kaˈam ma pasal Al-Masi, dakayuˈ du pagˈmmaˈanbi. Luwal aku ya pagˈmmaˈanbi sangay min waktu kasōdbi ma Al-Masi, sabab aku ya bay makatagnaˈ amowahan kaˈam lapal ahāp. 16 Angkan koˈ, pagka aku mmaˈbi, ya na itu junjungku ni kaˈam: panunurinbi addat-tabiˈatku. 17 Ya ilu poˈonna angkan pabeyaˈku si Timuti itu ni kaˈam, supaya kam ataˈu anunud. Kalasahanku iya saliˈ anakku lissi, sabab aku ya bay amowa iya angandol ma Panghūˈ Isa. Kapangandolan du si Timuti, maka iya ya amaentoman kaˈam bang buwattingga ya kalˈngngananku pagka si Isa Al-Masi ya parakayuˈanku. Ya na koˈ inān pamanduˈku ma saga jamaˈa si Isa Al-Masi, sasuku magpalhimpunan ma sabarang lahat bay papehēˈanku. 18 Na, aniyaˈ ma deyomanbi ilu saga aˈa alanga atay sigām, sabab pangannal sigām in aku mbal du piˈilu anibaw kaˈam. 19 Sagōˈ pasaˈut du aku piˈilu bang min kabayaˈan Tuhan, ati ndaˈku bang kawasa ai ya ma saga aˈa ilu, kawasa bˈnnal ka atawa hal min bowaˈ sigām. 20 Sabab nggaˈi ka pagsuli-suli aˈa ya makapoˈonan pagparinta Tuhan, sagōˈ kawasa Tuhan. 21 Na, ai kabayaˈanbi? Bilahi kam subay pahˈllinganku boˈ kam bininasa? Bang hati mbal, bang kam bilahi pinananaman lasaku, maka bang kam bilahi pinakalehan kahanunut bissalaku, pindahinbi hinangbi.
