MATIU 2

1Ba lul Yesu Bɛtilɛhɛm lɛ nɛ. Ta-bie-la fa hɛ Judiya tiŋteeŋ lɛ nɛ. Bua deeŋ lɛ baal kubala baa yirɛ Hɛrↄd nɛ fa ŋaa tiŋtee-la kuoro. Ba si lul Yesu, wu-jinnaa lii taŋ-bubuↄŋ a kↄ Jerusalɛm a piɛsɛ, "J_uu tiŋŋaa kuoru-la ba si lula hɛ nii nɛ? La na u chɛŋwuluŋ taŋ-bubuↄŋ nɛ a kↄ di la chuↄlu." 3Kuoro Hɛrↄd fa si nii wiiŋ deeŋ, fawulluŋ kɛŋ ba di Jerusalɛm niaa kala kiŋkɛŋ kiŋkɛŋ. 4Ŋii nɛ u yirɛ nialiŋ si kpu pusuŋ pipi Wia kuhiasiŋ ari Wia teniŋ kerichiba-la ba ku hilimi. U piɛsɛba a bul, "Nii nɛ ba jaŋ lul Kirisito, nii-la Wia si liisa?" 5Ŋii nɛ ba bula pu a bul, "Ba jaŋ lulu Bɛtilɛhɛm, Judiya tiŋteeŋ lɛ. Ŋla nɛ nialiŋ síi bul wiaa, Wia Diŋ-zↄŋ-la doluŋ lɛ ŋmuŋsɛ: 6Wia si, 'Bɛtilɛhɛm ŋaa ta-bie nɛ Judiya tiŋteeŋ lɛ. Ama Judiya tiŋteeŋ kala lɛ, Bɛtilɛhɛm niaa nɛ ŋaa ni-balaa, bɛɛ wiaa ba tuↄŋ nɛ Iziral kuoro jaŋ lii, nii-la si jaŋ beŋ mi niaa, Iziral tiŋŋaa.' " 7Ŋii nɛ Hɛrↄd luↄra yirɛ wu-jinna-la si lii taŋ-bubuↄŋ a kaa mu faa a piɛsɛba di ba dagu bua-la titia lɛ chɛŋwul-la si lia. Ba daga pu. 8Ŋii nɛ Hɛrↄd taba di ba mu Bɛtilɛhɛm, aŋ bula piba a bul, "Má mu chɛ bile ari siifiɛsiŋ. 'Di ma nɛ nau, má leŋ di mi ma jiŋ ŋii niiŋ lɛ, a ma mu chuↄlu." 9Ba si nii ŋii, ba lii joŋ woŋbiiŋ aa mu. Chɛŋwul-la ba fa si na taŋ-bubuↄŋ bira laa ba sipaaŋ. 10Ba bira si na chɛŋwul-la, ba tuↄŋ kala tↄrɛ, ba jujuↄsɛ. 11Ba si mu yi lee-la bii-mulo-la si hɛ, chɛŋwul-la chiŋ dia-la nyuŋ. Ba mu juu dia-la a na bii-mulo-la ari Mɛɛri, u naaŋ. Ba tuu kpirimi u sipaaŋ a chuↄlu. Ŋii nɛ ba puri ba chugusuŋ a liisɛ kiaa pu: Sɛlimɛ, tii-keli-zↄŋ baa yirɛ firaŋkiŋsɛŋs ari tii-keli-zↄŋ dↄŋↄ baa yirɛ mɛɛ. 12Ŋii nɛ titaŋiŋ Wia bula piba duosoo tuↄŋ ari ba sí miira mu Hɛrↄd teeŋ. Ŋii nɛ ba sii a to woŋbii-wogo a miira mu ba jaŋ. 13Ba si miira joŋ ba woŋbiiŋ a viiri, Josɛf piŋ doŋ a duosi a na Wia tiŋdaara di u kↄ u teeŋ a bula pu, "Sii a joŋ bii-mulo-la ari u naaŋ a fá mu Ijipiti tiŋteeŋ a hɛ dimɛ see di mi bira bula piŋ di ŋ lii dimɛ, bɛɛ wiaa Hɛrↄd chɛ di u kpu bii-mulo-la nɛ." Ŋii nɛ u sii a joŋ bii-mulo-la ari u naaŋ a mu Ijipiti tiŋteeŋ titaŋiŋ. U hɛ dimɛ nɛ deeŋ deeŋ Hɛrↄd ku suu. 15Wiiŋ deeŋ ŋaa di wii-la Wia fa si to nialiŋ síi bul wiaa, Wia Diŋ-zↄŋ-la doluŋ lɛ ku ŋaa wutitii. U fa bula ari u jaŋ yirɛ u bie duu lii Ijipiti tiŋteeŋ kↄ. 16Hɛrↄd si na ari wu-jinna-la nyisu nɛ, u faasa na baaniŋ. Wu-jinna-la fa si dagu bua-la lɛ ba si lul Yesu, u jiŋ ŋii. Ŋii nɛ u ta u laali-yuoroo di ba mu Bɛtilɛhɛm ta-biisi-la kala si gollu chu a kpu haŋbolibiisi-la kala si ha bi jisiŋ balia kiele. 17A tiŋ ŋla wiaa wii-la Jɛrimaya fa si bula ku ŋaa wutitii nɛ. U fa ŋaa nialiŋ síi bul wiaa, Wia Diŋ-zↄŋ-la doluŋ lɛ dↄŋↄ nɛ. 18Wialiŋ u fa si bula nɛ ŋla: U si, "Niaa níi yel Rama lɛ, niaa faasa yel nɛ. Haal kubala ba síi yirɛ Rechil yel u haŋbiisiŋ wiaa nɛ. U yele, u bi tↄrↄ, bɛɛ wiaa ba kala suba nɛ." 19Ŋii nɛ Hɛrↄd ku suu. U si suba ŋii, Josɛf bira duoso a na Wia tiŋdaara di u kↄ u teeŋ a bula pu, "Sii a kɛŋ bii-mulo-la ari u naaŋ a miira mu Iziral tiŋteeŋ. Nialaa fa síi chɛ di ba kpu bii-mulo-la, ba suba nɛ." Ŋii nɛ u kɛŋ bile ari u naaŋ a kaa mu Iziral tiŋteeŋ a hɛ dimɛ. 22Ama Josɛf si nia ari Hɛrↄd suba, ka u bie Akiliyas dii kuoruŋ Judiya tiŋteeŋ lɛ, fawulluŋ fa kɛnu ari u si jaŋ hↄŋ dimɛ. Ŋii nɛ Wia bira bula pu duosoo tuↄŋ duu mu hↄŋ Galilii tiŋteeŋ lɛ. 23U si mu Galilii tiŋteeŋ, u mu hↄŋ taŋ kubala lɛ baa yirɛ Nazarɛt. U ŋaa ŋii di wialiŋ nialiŋ fa síi bul wiaa, Wia Diŋ-zↄŋ-la doluŋ lɛ ŋaa wutitii nɛ. Ba fa bula a bul, "Ba jaŋ kɛnu yirɛ Nazarɛt tiina."

will be added

X\