MATIU 1

1Yesu doho niaa nɛ ŋla. U naabalimaba nɛ fa ŋaa Abiraham ari Devit. 2Abiraham nɛ fa lul Aizik. Aizik ma sii lul Jekↄb. Jekↄb ma sii lul Juda ari u naaŋbiiriŋ. 3Juda ma sii lul Pɛrɛs ari Zɛra. (Ba naaŋ yiriŋ nɛ fa Tama.) Pɛrɛs ma bira sii lul Hɛzurↄŋ. Hɛzurↄŋ ma sii lul Ram. 4Ram ma sii lul Amiinadab. Amiinadab ma sii lul Naasuŋ. Naasuŋ ma sii lul Salimↄŋ. 5Salimↄŋ ma sii lul Buas. (Buas naaŋ yiriŋ nɛ fa Rehab.) Buas ma sii lul Obɛd. (Obɛd ma naaŋ yiriŋ nɛ fa Rut.) Obɛd ma sii lul Jɛsi. 6Jɛsi ma bira sii lul kuoro Devit. Devit ma fa lul Solomↄŋ (Solomↄŋ ma naaŋ fa ŋaa Uraya haala nɛ. Uraya suu aŋ ka Devit joŋo jaa.) 7Solomↄŋ ma sii lul Rihabam, Rihabam ma sii lul Abaaja, Abaaja ma sii lul Asa. 8Asa ma sii lul Jihosafat, Jihosafat ma sii lul Jↄram, Jↄram ma sii lul Uzaya. 9Uzaya ma sii lul Jotam, Jotam ma sii lul Ehas, Ehas ma sii lul Hizikaya. 10Hizikaya ma sii lul Manaasi, Manaasi ma sii lul Emↄŋ, Emↄŋ ma sii lul Jusaya. 11Jusaya ma sii lul Jekonaya ari u naaŋbiiriŋ. Bua-la lɛ nɛ ba kɛŋ Iziral tiŋŋaa mu Babilↄŋ. 12Ba fa si kɛŋ Iziral tiŋŋaa kaa mu Babilↄŋ ŋii, u ŋii hariŋ lɛ nɛ Jekonaya lul Sialitɛl, Sialitɛl ma sii lul Zerubabil. 13Zerubabil ma sii lul Abayat, Abayat ma sii lul Ɛlayakim, Ɛlayakim ma sii lul Azↄ. 14Azↄ ma sii lul Zadↄk, Zadↄk ma sii lul Akim, Akim ma sii lul Ɛlayat. 15Ɛlayat ma sii lul Eliyeza, Eliyeza ma sii lul Mataŋ, Mataŋ ma bira sii lul Jekↄb. 16Jekↄb ma sii lul Josɛf, Josɛf nɛ saa jaa Mɛɛri. U nɛ lul Yesu, nii-la ba sií yirɛ Kirisito. 17A suomi Abiraham si hɛ u miisiŋ lɛ a kaa kukↄ Devit si hɛ u miisiŋ lɛ, ba di u nihiliɛrɛba kala fa ŋaa fii ari banɛsɛ nɛ. Devit si hɛ u miisiŋ lɛ a kaa kukↄ bua-la lɛ ba fa si kɛsɛ Iziral tiŋŋaa kaa mu Babilↄŋ, Devit nihiliɛrɛba kala ma fa ŋaa fii ari banɛsɛ nɛ, a bira chiŋ bua-la lɛ ba si kɛsɛ Iziral tiŋŋaa kaa mu Babilↄŋ a kaa kukↄ bua-la lɛ ba si lul Kirisito, nialiŋ ba si kɛsɛ kaa mu Babilↄŋ nihiliɛrɛba ma fa ŋaa fii ari banɛsɛ nɛ. 18Ŋla nɛ ba ŋaa a lul Yesu Kirisito. Josɛf nɛ fa sugɛ u naaŋ Mɛɛri duu jaa. Ka di ba-na jaa dↄŋↄ, Mɛɛri na duu kɛŋ luoruŋ nɛ. Wia Diŋ-zↄŋ-la nɛ hɛ pu. 19Josɛf fa ŋaa ni-pula nɛ. U fa bi chɛ duu hiisɛ Mɛɛri niaa tuↄŋ. Ŋii nɛ u kɛŋ u tuↄŋ lɛ duu viau. 20U fa síi biinɛ ŋii, Wia tiŋdaara dↄŋↄ kↄ u teeŋ ari duosoo tuↄŋ a bula pu a bul, "Josɛf, Devit doho nuu, sí leŋe di fawulluŋ kɛniŋ ŋ síi chɛ di ŋ jaa Mɛɛri, bɛɛ wiaa luoru-la u si kɛnɛ ŋaa Wia Diŋ-zↄŋ-la nɛ hɛ pu. 21U jaŋ lul baal, ŋ jaŋ hɛ u yiriŋ Yesu, bɛɛ wiaa u nɛ jaŋ laa u niaa haachɛba ta." 22Wiiŋ deeŋ kala ŋaa di wialiŋ la Tiina Wia fa si bula ku ŋaa wutitii. U fa to u nialiŋ síi bul wiaa, Wia Diŋ-zↄŋ-la doluŋ lɛ nɛ a bul ŋii. 23Wialiŋ u fa si bula nɛ ŋla: "Ha-tolo kubala ha si bi baal jiŋ jaŋ kɛŋ luoruŋ a lul bie. Ba jaŋ hɛ u yiriŋ Imanuɛl." (U yiri-la bubuↄŋ nɛ Wia hɛ la teeŋ.) 24Josɛf si sii doŋ lɛ, u ŋaa ŋii Wia tiŋdaari-la si bula pu a jaa Mɛɛri. 25U si jaau ŋii, ba duu bi dↄŋↄ jiŋ, ka u lul u ha-toli-bie. Ŋii nɛ Josɛf hɛ u yiriŋ Yesu.

will be added

X\