Romans 6

1ኧጋ ምር ንበነ? ይእግዘር ፀጋ ይበዜ ባጢር ትንቾትነ ንምበነዌ? 2እክሽ አንኸረ፤ ይና በሞት የትቤተሮት አኽር ተባጢር ተቤተነምታነ ዘፒትነ መምር በባጢር ንምበነ? 3ተኢየሱስ ክርስቶስ ጋᎀ እማት ንኸኔ ብኻ የትጠመቅነ እንመንዳ በሞትመታ እማት ንኸኔ የትጠመቅነኸማ አትⷕሮዌ? 4በጥምቀት ተዀት ጋᎀ በትቀፐነ ግዝየ የዀት ሞት ተሻድነም፤ የኽክም ክርስቶስ ባባታ ክብር ተሞት የትረሳም ኸማ ይናም ገደር ሰብ ኸነም ንረብኔዉ። 5ተዀት እማት ኸነም የዀት ሞተታ በትሻድነ ዀትም ተሞት የትረሳም ኸማ ይናም ተዀት እማት ኸነም ተሞት ንትረሳነ ኸማ የትⷐረው። 6ባጢረተነ ገᎀጀንዳ ይፈኬም የባጢር ባርያ ወኽረንዳ ይቄዬም ርዝ አመረንዳ ተክርስቶስ ጋᎀ የትሰቀረኸማ ንⷕነ። 7የᎀተ ሰብ የባጢር ቤትገሴ ነጣው። 8ቢኸርም ተክርስቶስ ጋᎀ በᎀትነ ተዀትም ጋᎀ ኧያም ኸነም ንረብነ ኸማ ናምነ። 9ክርስቶስም ተሞት ተረሳም ዄተነ ኤሞት ኸማ ሞትም ኤጐዛን ኸማ ንⷕነ። 10ዀት በᎀተ ግዝየ ባጢር በዀት ᎈር ደረግ ኤረውንኸማ አተጋ ᎀተም፤ ኧዃም ኧያም ኸረም ይእግዘር ክብር ይረብር። 11ኼታ ባኹም ᎈር ባጢር ደረግ ኤነንምኸማ በኢየሱስ ክርስቶስ ወኸት ይእግዘር በኤያም ትረብሮኸማ ኻሮ። 12የኽየኸሬ ባጢር ቢሞት ገᎀጃኹ ዳነት ይረውንኸማም የበሰራኹ ተመኛት ትትገሶኸማ ያሜኹዌ አትፍቅዶለ፤ 13የኽክም ገᎀጃኹ ᎃጥጥ ቃር ያመሮዌ የባጢር አታትገሶዮ ተሞት ተቤተርኹም ኧያም ኸርኹም ትረብሮዌ ገጋኹ ይእግዘር አትቀንቦ፤ ገᎀጃኹ እንም የፅድቅ ግብር አምሮም ይእግዘር አትገሶ። 14ኧዃ አኹ ትረብሮ ተፀጋ ቦስጥ ባንኸሬ ተⷅጫ ቦስጥ አንኸረ የኸሬ ባጢር ይገዛኹዌ ኤዀለ። 15ኧጋ ምር ንበነ? ተⷅጫ ቦስጥ ወኽረንዳ ታውምታ ተፀጋ ቦስጥ የኸኔ ባጢር ንቶትነዌ? ስርም አንቾትነ። 16ያት ሰብ አገልጌ ኺትኹ ትታዘዞዌ ገጋኹ ትታትⷀንቦ የኽ ትታዘዞለ ምስ አገልጌ ወኽራኹ ትⷕሮ የኽክም የባጢር ትታዘዞ ሞት ያቸንብኹ ባጢር አገልጌ ትኸሮ፤ ይእግዘር በታዘዞት ጭን ፅድቅ ትረኽቦ። 17ይፍቴ አኹ የባጢር ባርያ ባነኹ፤ ኧዃ ጭን የትማርኹዊ ትምርት ቢኸርም ዝም በጨር የታዘዝኹዌ ይእግዘር ሽር የኽር። 18ተባጢር ባሪነት ነጣ ወጣኹምታነ የፅድቅ አገልጌ ኸርኹም። 19እያ ዝካ የሰብ ቢገዋን ቋንቋ ኧዝረⷍ ያነ ተⷀጨነ አሳባኹ የቸነው፤ ይፍቴ ገᎀጃኹ እንም ይጠግር ሜናም የባጢርም አገልጌ አመነኹም ያትⷀነብኹዮኸማ የኽክም ኧዃ ገᎀዳኹ እንም ይትቀደሶኸማ የፅድቅ አገልጌ አምሮም አትቀንቦዮ። 20አኹ የዝ ይፍቴ የባጢር ባርያ በኸርኹᎌ ግዝየ የፅድቅ ሜና ታመሮዌ አትሰቦ ባነ። 21ኧጋ በኽ ግዝየ ምር ጥቅምነከብኹም? ኧዃ ቲያቅመጭኹ ቃር እንጐድ አትም ጥቅም አነከብኹ፤ የዝ ባጢር የቀጥወታ ሞቱ። 22ኧዃ ጭን ተባጢር ባሪነት ነጣ ወጣኹም ይእግዘር አገልጌ በኽሮታኹ ቅዱስ ኸርኹም፤ ቅዱስም ኽሮት የቀጥወታ የዘላለም ኧያም ወኽርም ወምበሩ። 23የባጢር ደሞዝ ሞቱ፤ ይእግዘር ስጦታ ጭን በⷘታንዳ በኢየሱስ በክርስቶስ ወኸት የዘላለም ኧያም ኽሮቱ።

will be added

X\