Philemon 1

1የኢየሱስ ክርስቶስ ቲብር የታገደ ተጳውሎስም ተጐፔየንዳ ተጢሞትዮስም፥ የትረመደ ጐፔየንዳም የሜና ቤሻንዳ የኸረ የፊልሞና፥ 2በቤታኸ ይትደመዶ በክርስቶስ ያመሮ ሰብ የተᎀንዳ የአፍያ፥ የኽክም ቲና ጋᎀ የክርስቶስ ወታደር የኸረ የአርኪፓስ፥ 3ታባንዳ እግዘርም፥ ተⷘታንዳ ተኢየሱስ ክርስቶስ ፀጋም ሽናትም ያኹ የኽር። 4በጠሎተና ትንዘግድኸ እንም ጋᎀ ይእግዘረና ሽራኸ ኧውን፤ 5ዝም የኸረወ ቢእግዘር ያመሮዮ ሰብ እንም ምራኽር ቃር ትረምድ ኸማም አኸም በⷘታ በኢየሱስ ኧመሮታኸ ሰማዀም፤ 6የክርስቶስ የኸኔ ያነንደ ወኼ ዘንጋ እንም የᎃየም ይትⷐሬ እምነታኸ ይንጐደዀና ባትⷕሮት ጃድ ትብሬ ጠሎት አሜ። 7ጐፔያኖ ቢእግዘር የᎂጠርዮ ሰብ ባኸ የሳረኖዌ እያም በርማጅነታኸ ንቃር ሳሬም አትቋመሬምም። 8በኽ የቸነ እንመንዳ የክርስቶስ የኸኔ አኸ ወቶት ያነብኸ ቃር ትቾትኸማ አዝዝኼ ይኸኒ ባነ፤ 9እካታምሮተና የኢየሱስ ክርስቶስ ትንብር የታገድኹ እያ ባሪቅ ጳውሎስ በርማጀ ኧጨስኸ። 10ኧጨስኸም ያነ ቦኽኔ ቤት ታነዀ በክርስቶስ አትየመርዀም በመንፈስ የጨነዀን ኧርቸና የአናሲሞስ ቃሩ። 11አናሲሞስ የዝ ይፍቴ ያኸ ኤጠቅምኸ ባነ፤ ኧዃ ጭን ያኸም ቢኸር ይያ ይጠቅምቃሩ። 12ዀትም ያኸኼ ዠፐርዀም ናዀንም፤ ትነኽንኸም ገገና ያኹዌ የቸነዀ አኽር ኧᎂዝን። 13የጔታ ቃር ቦዶተና በዝ በታገድዄ ባኸ ሟሬ ይⷀፕሬዬ ትያ ጋᎀ ተኸረ ይሳሬ ባነ። 14ቢኸርም ያኸ ወኼነት በግርድ ቴኸር ባመር የኽር ባዀም፥ አኸ ፍቃድ ታቲቤ አት ዘንጋ ኧቾቴ አንሸዀ። 15አናሲሞስ የቀርየጋ ታኸ የትቤተረ ተዝ አንⷀ ተዠፐረም እንም ጋᎀ ታኸ ይረብሬ ይኽርሸ። 16ተዝ አንⷀ ዀት ታኸ ጋᎀ ይረብር የቤት ኧርች ኸማ ቴኸር ተቤት ኧርች ይርቅ ይረᎃጂ ጐፔ ኸማው፤ ዀት ይያ ንቅ ናማጅየናው፤ ቢኸርም ዀት በአገክሮት ይጠቅምኸ የኸሬ በክርስቶስ ጐፔያኸ የኸረ ያኸ ይርቅ ናማጅያኸው። 17ይያ የጐፔያኸ ኸማ ባሸኼ ይያ ትትⷀፐሬም ኸማ የአናሲሞስም ተቀᎌን። 18ዀት በሟኒም ዘንጋ በበደለናኸ ዌም ከስ ቢረብርወ ብያ አውራ። 19እያ ጳውሎስ "ከሰታ እያ ኧከስኸቴ" ባዀም በገገና ኧጅ ዝኸታ ጣፍዀም አጬግንኸ፤ ከስ አኸ የገጋኸ ነብስ የተነፌ ይያ ያነብኸ ኸማ አዘግድኼ አንሸ። 20ጐፔቾ ዝኽወኼ ዘንጋ ታሜንዬ በⷘታ ኢየሱስ ኸርዀም ኧጨስኸ፤ በክርስቶስ ባነናኸ ንማጀ ⷕነና ባኸ የሳሬ። 21አኸም ይያ ትታዘዝኒ ኸማ በትመመሮተና ዝኸታ የጣፍንከ፥ አቸም አሚኒ ትምብርኸ ቃር በᎈር ታሜኒ ኸማ ኧⷕር። 22እግዘር ጠሎታኹ ሰማምታነ ያኹዌንየ ኧቸኔ ያሜዬኸማ ተስፋ ያኔ የኸሬ አᎊወ ቤት ሰክትም ቀዬ። 23በኢየሱስ ክርስቶስ የቸነ ትያ ጋᎀ የታገደ ኤፓፍራ ወኼምንኸዌ ይብርኸ፤ 24የኽክም ትያ ጋᎀ ይቾቶ ማርቆስ፥ አርስጥሮኮስ፥ ዴማስ፥ ሉቃስ ወኼምንኸዌ ይብሮከ። 25የⷘታ ኢየሱስ ክርስቶስ ፀጋ ታኹ ጋᎀ የኽር።

will be added

X\