Philippians 1

1የኢየሱስ ክርስቶስ አገልጌ ተኸሮ ተጳውሎስ ተጢሞትዮስም። በፊሊጶስ ከተማ ያነኹ በክርስቶስ ኢየሱስ አመርኹም ታነ የዀት የᎂጠርኩ ሰብ እንማኹ፥ የበተስⷋን አለቃም ተኽኖም ትቾቶ ሰብ፥ እንማኹ ወኼምንኹዌ? 2ተአባንዳ እግዘርም ተⷘታ ኢየሱስ ክርስቶስ ፀጋም ሽናትም ያኹ የኽር። 3አኹ ብንዘግድወ ግዝየ እንም የⷘታና ሽር አትⷀንብ፤ 4ይንማኹ ጠሎት ትናሚንኹ ይሽሬ። 5የምር ብትብሮን ቲፍቴ ከረ ቀነስዀም ኧዃ ዳር ይእግዘር ቃር ወኼ ወሬ ትኑድ አኹ ትያ ጋᎀ የⷀጥኹ የኸሬ ይእግዘርና ሽር ኧውን። 6ዝኽ ወኽ ሜና ባኹ የቀነስ ⷘታ ኢየሱስ ክርስቶስ ይፈርዴ ቲቸን ቾተም ይጀፕርኸማ አጬግዀም ኧⷕር። 7ወኼ ወሬ ይቤትትኸማ ዝካ አሜዬም ዩኼወሬ ትንምብር ብንቸትወ ግዝየ የኽክም በታገዶተና እንማኹ ቲያ ጋᎀ የፀጋታ ሟር ትትሸዶ ቃር በኽሮታኹ በᎃራ ⷕነና ኧረምድኹ የኸሬ እያ ያኹ ዝካ ኧስቦተና ወኼቃሩ። 8በክርስቶስ ኢየሱስ ንማጀ ኸርዀም እንማኹ ምራኽር ቃር ኧረምድኹኸማ እግዘር ምስክረናው። 9ንማጃኹ ኻሪነትም በስሮትም የሜናወኸረምታነ ቲደብር ይቸንኸማ ጠሎት አሜንኹ። 10ዀትም ይፈዝዀታ ቤሰርኹም ትⷕሮኸማም ክርስቶስ ቢቸንወ ከረ አᎃር ኤባር ኸርኹም ትቀሮኸማው። 11በኢየሱስ ክርስቶስ አመርኹም በምጠሮታኹ ይእግዘር ይሽን ወኼ ዘንጋ እንም ይተየብኹሸ፤ ዝኽ እንም ቲኸር ይእግዘር ክብርም ምስጋና ይኽርሸ። 12ጐፔቾ ብያ የሰናቢ ቃር እንም ወኼ ወኼ ቲፍቴ ይርቅ ቲቤትት ያርኸማ ያመነኸማ ኻሮት ነረብኹ። 13ይያም ወታገድ የክርስቶስ የኸረ ኸማ የርቅ ንስ ወታደርም እንጐድ ሰብ እንም ኻሮኒም። 14ብያ ወታገድ የቸነ በⷘታ ኢየሱስ ታመሮ ጐፔቸ ብዘመዀና ቲፍቴ ይርቅ ገገዀና አትቋመሮም፤ የኽየኸሬ ቴሰርፎም ቲፍቴ ይርቅ ይእግዘር ቃር ደፈሮም ዩድ። 15አታተዀና ብያ ቲሟነቦም ይትራከሶኔ ቲብሮ የክርስቶስ ቃር ዩዶ፤ እንጐደዀና ጭን በሰትት ⷕነዀና ዩዶ። 16ኽኖም ይእግዘር ቃር ወኼ ወሬ በⷘራⷕን ዩዶ ያነ ተርማጀ የቸነው፤ ኽኖም ዝካ ያመሮ ያነ እያ ወኼ ወሬ አትⷀምዌ አደራ ያውን ኸማ ኻሮም በርማጀ ዩዶ። 17ኻዀና ጭን የክርስቶስ ቃር አጣመሞም ይሰብኮ ያነ በⷘርነት ቴኸርም የገገዀና ጥቅም ቲሰቦም እያ በታገዶተና መከራ ይቸንቢ ቃር መሰረኖም። 18ሟኒም ቃር ቢኸር በዝኽ እንም ይሽሬ፤ ኽኖ በብዘ ቃር ቢያብረክሶም ዌም ናሰዀና በሰትት ⷕነዀና ቢኸር የክርስቶስ ቃር ዩጂ። 19እንጐድም ይሽሬ ያነ በጠሎታኹም በኢየሱስ ክርስቶስ መንፈስ እገዠ ቶኽኔ ኧወጣ ኸማ ኧⷕር የኸሬው። 20ቢኸርም እያ ብነብርም ብሞት ተመኛተናም ተስፋና ክርስቶስ አኽብዶቱ፤ ባት ዘንጋ ዳር እያ በገገና ይፍትሜ ኸማ ኧዃም ደፈርዀም ብንቾት ቃር እንም ክርስቶስ አኸብድ። 21እያ ብነብር ክርስቶስ ይከብሬዉ፤ ብሞትም ጥቅመናው። 22የኽርምታነ ታሞት ንበሮተና ጥቅም ያነን የክርስቶስ ይርቅ ሜና ኧቾቴዉ፥ ቢኸርም ምር ኧሸፕት ኸማ እያም ገገና አንⷕር። 23ሞትም ንበሮትም ዄት ዘንጋ ጠበጤም ኧትጨነቅ፤ ᎃችትዀ ተክርስቶስ ጋᎀ ኧረብሬ ይሽሬ፤ የምር፥ ትንም ቃር ይርቅ ንቃር ይፈዝ ዀታው። 24ቢኸርም ያኹ አⷘⷍርኹዌ ታሞት ንበሮተና ንቃር ያትⷈሽኹ። 25እያም ዝመታ ኻርዀም ታሞት ኧረብር ኸማ ኧⷕር፤ ባመርኹᎌ ክርስቶስ ትትረቆዌም በመሮታኹ ሳረናኹም ትረብሮዌ እያም ቶኽኔ ወጣኹም ታኹ ጋᎀ ኧረብር ኸማ ኧⷕር። 26እያም ያኹዌ ትንቸን ክርስቶስ ኢየሱስ ብያ የቾቴ ቲፍቴ ይርቅ የዀት ንቅነተታ ቶዶሸ፤ በዀትም ይሳርኹም ትሟቅጦሸ። 27ትንም በᎈር አኹ ገጋኹ የክርስቶስ ወኼ ወሬ ሽኩር ታትⷀነቦ ቃር ኽሮ፤ ቢኽርም እያ ቸነዀም ብናዥኹም ባናዥኹም እማቴ ባት አሳብ ሞምታነ የክርስቶስ ቃር ወኼ ወሬ ትቱዶ እማቴ አትባቅሮ፤ የዝ እንም መምር ትረብሮ ኸማ ኧሰሜ ኧሸ። 28በክርስቶስ አናመሮ ሰብ ቢትራከሶኩም ስርም እንጠነቀናኹ፤ ዝም ድፈሮታኹ የኽኖ የትⷀሞት ቲኸር ያኹ ጭን ቢእግዘር ደረግ የⷀሞት መርኸቱ። 29አኹ የክርስቶስ ትትብሮ መከራ ትትⷀፐሮዌ ባንኸሬ እማት ታምሮዌ አንኸረ፤ ዝም ይሽር የክርስቶስ ሟር ያኹ አውኩም። 30ኧዃ ዝኽ መከራ ትያም ጋᎀ ተቀፐሮት ነረብኹ፤ በዝም መከራ ይፍቴ እያ ትናትባቅር ያሸኹዊም ኸማ የሰማኹዊም ኸማ እያ ኧዃም ዳር በዝ መከራ ደን ነርዀ።

will be added

X\