John 11

1በቢታንያ ይረብር አላዛር ይውሪ ምስ ⷀᎀንም ባነ፤ ቢታንያ ማርያምም ኧተᎀⷕታ ማርታም ይረብረማᎌ ቀያ ባነ። 2ማርያም የⷘታ ኧግር ሽቶ ቀፓችም በነረⷕታ የᎃሻሸቸን ⷕትንያ፤ የⷀᎀን አላዛር የⷕት ጐፔ ባነ። 3ኧተማምኽነማ "ⷘታንዶ አኸ ትረᎃድን አላዛር ⷀᎀንም" ባረማም የኢየሱሴ ሰብ ናኸማም። 4ኢየሱስ ዝኽ በሰማ ግዝየ "የዝ ምስ ⷀምናት ይሞቴ አንኸረ፤ ዀት የⷀᎀን ይእግዘር ክብር በዝኸታ የቸነ ይትⷐሬው፤ ይእግዘር ኧርችም በዝኸታ ወኸት ይከብሬዉ" ባረም። 5ኢየሱስ የማርታም የተᎀⷕታም የአላዛርም ይረምድኖ ባነ። 6የአላዛር ⷀምናት ኢየሱስ ሰማም በረፐረወ መደር ዄት ከረ ኧከሰም። 7ተኽም አንⷀ ኢየሱስ የተማሪየታ "ይኹዳ ገነ ንትዘፐነ" ባረኖም። 8ተማሪየታ "አስተማሪዮ ተቀሪ ከረ ይፍቴ የይኹዳ ሰብ ያኸ ብምር ይወጎኬ ኤሎም ባነ፤ ኧዃም ኽኼ ትትዠፐርቴዌ?" ባረዊም። 9ኢየሱስም "ባት ከረ ዋና ያነ አስረዄት ሳት አንኸረዌ? በዋና ያር ሰብ የዝ አለም ጬት ያትየን የኸሬ ኤያጅጓጅን። 10በምሳረ ይትዥባፐር ሰብ ጭን በዀት ጬት ኤነ የኸሬ ይትጅጋጀግ" ባረኖም። 11ኢየሱስ ዝኽ ተባረኖ አንⷀ "አበጐዳንዳ አላዛር ንየም፤ እያም ቶሬተታ ኧረሳኔ አርቴ" ባረኖም። 12ተማሪየታም "ⷘታንዶ በንየ ተባሸታ አትፋዘዘም በሮቱ" ባረዊም። 13ኢየሱስም ዝኽ ወበረታ አላዛር የᎀተ ኸማ ኦዶተታ ባነ፤ ተማሪየታ ጭን ዮሬት ቃር የዝረⷈ መሰረኖም። 14በኽ የቸነ ኢየሱስ የᎃየም "አላዛር የᎀተኸማ ኦደኖም። 15አኹም አሸኹም ታምሮዌ ያኹ ትምብር እያ በኽ አንበሮተና ሳሬም፤ ኧዃ ጭን የዀትኼ ንወነ" ባረኖም። 16የለምችየ የዋሪ ቶማስ ይንጐድ ተማሪ "ተዀትም ጋᎀ ንሞትኔ ይናም ንወነ" ባረኖም። 17ኢየሱስ ቢታንያ ቀያ በሰና ግዝየ አላዛር ተቀᎌሪ አርበት ከረታ ዀረንም ባነ። 18ቢታንያ ቀያ ተኢየሩሳሌም ከተማ ሶስት ኪሎ ሜትር ያኽር ያረቅ ባነ፤ 19ብዘ የይኹዳ ሰብ የማርታም የማርያም ጐፔያኽነማ የᎀቴ "ሰብር ንኸበማ" ይብሮየሜ ቸነቦም ባነ። 20ማርታ የኢየሱስ ወተን በሰማች ግዝየ ትትⷀᎌኔ ወጣችም፤ ማርያም ጭን በቤት ቾናችም ባነ። 21ማርታ የኢየሱስ "ⷘታኖ አኸ በዝ ተኸርኸ ጐፔያና ቤሞት፤ 22ኧዃም ቢኸር እግዘር የጨቈስዀን እንም ኧጊ ይብርኸ ኸማ ኧⷕር" ቧረቸንም። 23ኢየሱስም "ጐፔያⷕ ተሞት ይትረሳቴ" ባረናም። 24ማርታም "በቀጥወ የᎀቶ ቢትረሶᎌ ከረ ተሞት ይትረሳ ኸማ ኧⷕር" ቧረቸንም። 25ኢየሱስም "ተሞት ኧረሳም ኧያም አሜ እያትንዀ፤ ብያ ያምር ቢሞትም ኧያም ኸረም ይረብር። 26ኧያም ኸረም ቲረብር ብያ ያምር እንም ስርም ኤሞት፤ ዝኽ ታሚዌ?" ባረናም። 27ⷕትም "ውረሙ ⷘታኖ አኸ ዝኽ አለም ትቸንቴ የዋሪ ክርስቶስ ይእግዘር ኧርች የኸርኸ ኸማ አምር" ቧረቸንም። 28ማርታ ዝም ተባረች አንⷀ ወረችም የተᎀⷕታ የማርያም "አስተማሪ ዝኼ ቸነም፤ ያⷕም ኔⷕ ይብርⷕ" ባረችም ብንዝረⷕታ ኦደቸናም። 29ማርያም ዝኽ ብትሰማ አፈጠረችም ተረሳችም የዀትኼ ወረችም። 30ኢየሱስ ማርታ የዀት በትⷀፐረቸው መደር ባነ ባንኸሬ፥ ቀያ አንገፓ ባነ። 31የⷕታ ሰብር ንⷐብ ይብሮዬ በቤት ደን ተⷕት የረፐሮ የይኹዳ ሰብ ማርያም አፈጠረችም ተረሳችም ትትወጣ አሰቦምታነ ⷕት የᎀገሜ ወረችም በዛኼ ትበⷕ ቃር መሰረኖም ተⷐተሮያም። 32ማርያም ኢየሱስ ያነወ መደር ቸነችም ባሸችን ግዝየ በግረቴ ወጠቀችምታነ፥ "ⷘታኖ አኸ በዝ ተረፐርኸ ጐፔያና ቤሞት" ቧረቸንም። 33ኢየሱስም ⷕት ትትበⷕም ተⷕትም ጋᎀ የቸነቦ የይኹዳ ሰብ ቲበኾ አሸም ንቃር አዘነም በትመጠጦት፥ 34"ቤቴ ቀፐርኹዊም?" ባረኖም፤ ኽኖም "ⷘታንዶ ኔኸም ኧዥ" ባረዊም። 35ኢየሱስም እምባ ወንደንም። 36የይኹዳም ሰብ "ኢየሱስ የአላዛር ምራኽር ቃር ይረᎃድን ኸማ ኧዞ" ባሮም። 37ተኽኖም አታተዀና ጭን "የᎋርጥዀታ ኤን ይከፍቴ የዀረረ ዝኽ ምስ ቲሞት ያተርᎋኔ ቤዀለዌ?" ባሮም። 38ኢየሱስም በትመጠጦት የᎀገሜ ወረም፤ ᎀገማታም ብምር የፈጠᎁ ወረ ባነ። 39ኢየሱስም "የᎀገማዀታ እምር አክበርሮም ክፍተዊ" ባረኖም። የᎀተዀታ ኧተᎃ ማርታ "ⷘታኖ ጐፔያና ተᎀተ አርበት ከረታው፤ ኧዃ ኔሳታ ይጭየ" ቧረቸንም። 40ኢየሱስም "ብታሚ ይእግዘር ክብር ታዥቴ አምባⷍዌ?" ባረናም። 41በኽ የቸነ ኽኖም የᎀገማዀታ እምር አንክበነሮም ከፈተዊም፤ በኽ አንⷀ ኢየሱስ ሰሜንየ አሸምታነ "አባኖ ይያ የሰማኼዬ ሽር የስራኸ። 42እንም ጋᎀ ትሰሜ ኸማ ኧⷕር፤ ቢኸርም ዝኽ የባከ በዝኽ የቈሞ ሰብ አኸ የራኽኼ ኸማ ያምሮዌ የኽኖ ትምብሩ" ባረም። 43ኢየሱስ ዝኽ ተባረ አንⷀ "አላዛር ኔኸ ውጣ" ባረም በርቅ ቃረታ ዝረⷈም። 44የᎀተም አላዛር ኧጅም ኧግረታ በከፈና በከᎈሪምኸማ ተᎀገማ ደን ወጣም፤ ይፍተታም በጨርቅ በጥመጠᎁም ኸማ ባነ፤ ኢየሱስም "ፍቶም ግፍረዊ የወር" ባረኖም። 45የማርያም ሰብር ያበⷕይብሮዬ የቸነቦ የይኹዳ ሰብ ብዘመዀና የቾተን ባሰቦ አንⷀ በኢየሱስ አመሮም። 46አታተዀና ጭን የፈሪሳ ሰቤ ወሮም ኢየሱስ የቾተ ቃር ኦዶዮም። 47የⷀስ አለቃም የፈሪሳ ሰብ የገን ባሪቅም ይትደመዶዌ ጠኖዮምታነ "ዝኽ ምስ ብዘ ወግ ቃር ቾተም ያትየሽ የኸሬ ምር ብናሜነ ይፈዝ? 48እክም ብንችኔ ሰብ እንም በዀት ያምርቴ፤ የሮማ ሰብ ተንተቦ ቤተመቅደስመንዳም ሰበንዳ እንም ያጠፎቴ" ባሮም። 49ተኽኖ አተታ በኽም ዘበር ዋና ⷀስ አለቃ የረፐረ ቀያፋ ዝካባረም፤ "አኹ አትም ቃር አትⷕሮ፤ 50ሰብ እንም ቢጠፋታ አት ምስ የሰብ እንም ቢሞት ይፈዝኹ ኸማ አምቤሰርኹዌ?" ባረም። 51ዀትም ዝኽ የዝረⷈ በገገታ አሳብ አነፐረ፤ ቢኸርም በኽ ዘበር ዀት ዋና ⷀስ አለቃ የረፐሬ ኢየሱስ የሰብ እንም ቲብር ይሞት ኸማ ቲያትየሽ ዝኽ ትንቢት ዝረⷈም። 52ዀት ይሞት እማት የይኹዳ ሰብ ቴኸር የትብራጠቦ ይእግዘር ሰብ ስበሰበም አት ያሜኖዌዉ። 53በኽ የቸነ ኽኖ ተኽ ከረ ቀነሶም የኢየሱስ ይቀጥሮዌ ተማከሮም። 54ተኽ ከረ አንⷀ ኢየሱስ በይኹዳ ሰብ ግብት የᎃየም ዉጨተ እንገፓ፤ የኽርምታነ ተኼወረምታነ በበረኻ ᎀሬ ያነ ኤፍሬም ቢውሪ ቀያ በኼ ተተማሪየታ ጋᎀ ኧከሰም። 55የይኹዳ ሰብ የፋሲካ ባር ተⷀነበም ባነ፤ ብዘመዀና የፋሲካ ባር ቴሰራ ይፍቴ ብዘ ሰብ ገገዀና ያመጥሮዌ ታነቦᎌ መደሬ ተረሶም ኢየሩሳሌም ከተማ ወሮም፤ 56ኽኖም የኢየሱስ ይሰበዊ ባነ፤ በቤተመቅደስም ቈሞምታነ "ምር ይመስርኹ? ዀት የዝ ባር ኤቸን ይኽርሸዌ?" ቲብሮ ኽኖም ተኽኖ ይትሰሰሮ ባነ። 57የⷀስ አለቃም የፈሪሳ ሰብ የኢየሱስ ይጠብጠውዬ ሳቦምታነ በኽ የቸነ ያነወ መደር ይⷕር ሰብ ቢረብር የኽኖ ዩዴ ትዛዝ አወጦም ባነ።

will be added

X\