James 3

1ጐፔቾ አስተማሪ የኸነ ይና የባሰ ፍርድ ንትⷀፐነ ኸማ ትⷕሮ የኸሬ ታኹም ብዘዀና አስተማሪ ኤኽሮ። 2ይና እንመንዳ ብዘ ጋᎀ ንትሳሰትነ፤ በዘንጋ ኤሰትንዀታ ᎃራ ገገታ ቀሮት ይዀለ ᎃራ ሰቡ። 3ፈረዝ ይታዘዝንዴ ባንቃታ ልጓም ንኸራኔᎌ፤ ፈረዝምዀታ የሸኔ መደር ንወስድኔ። 4መርከብ ሟኒም ንቅየ ቢኸር በርቅ ንፋስም የገᎊ ቢኸር መርከብ ይረዳ ምስ ብርስየ መሪ የሸን መደር ነዳም ይወስድን። 5የኽክም አነበት እርስየ የገግ ሰብነት ቲኸር በርቅ ዘንጋ ይትⷛⷘዝ፤ ንቅ ድብር ይረድድ ብርስየ እሳቱ። 6አነበትም እሳት ኸማው፤ አነበት በገግ ሰብነት ግብት ያነ የዝ አለም ᎃጥጥ የሜናው ፍጥረቱ፤ አነበት ሰብነተንዳ እንም ያሰርኽ፤ አነበት ያዛብ እሳት ኸማ ሰብነተንዳ እንም ይመⷍር። 7ያፈር አዊም፥ የሰሜ አᎋ፥ ባፈር ይትሸቦም፥ በባኽር እኻ ደን ይረብሮ ፍጥረት እንም በሰብ ይትገሶ፤ የዝም ይፍቴ ተገሶም። 8ቢኸርም አነበት ይገዜ ይዀለ ሟኒም ሰብ ኤነ፤ አነበት ይቀጥር መርዝ የሜናው ᎈያት ኤነን ᎃጥጥ ዘንጋው። 9በዀትም ያባንዳ ይእግዘር ሽር ንብነ፤ በዀትም ብእግዘር መርክ የትፈጠሮ ሰብ ንሰድብነ። 10ብማት አነበት ሽርትም ስዴበም ይወጦ፤ ጐፔቾ ዝካ ወኽር ኤኖ። 11ትማት ሚንጭ ይተም እኻም ይመርር እኻም ይወጣዌ? 12ጐፔቾ የሸብራ ኧጨ የዌራ ᎇስር ያᎊዬ ይዀለዌ? ዌሽ የዌን ኧጨ የሸብራ ᎇስር ያᎊዬ ይዀለዌ? የኽክም ቲመርር እኻ ይተም እኻ ይረኽዊዌ? 13ታኹ ግብት ኻሪም የቤሰረም ሰብ ሟኑ? በኻሪነትም በⷘርነት የቾተን ሜና ቢረውን ንብረተታ ያተዥ። 14ቢኸርም ይጠግር ᎀያትም ገግ ንመዶትም በⷕናኹ ቢረብር አትⷛⷘዞ፤ በውረም ቃርም አትፍጥሮ። 15ዝኽ ኤነት ኻሪነት ይረኽዊ ተአለም፥ ተሰብነተንዳም ተሼጣኑ ባንኸሬ ትእግዘሬ አንኸረ። 16ᎀያትም ገግ ንመዶትም ባነቦᎌ መደር ዘናም ᎃጥጥ ሜና እንም ነረቦ። 17ትእግዘሬ ይረኽዊ ኻሪነት ጭን ትንም ይፍቴ ጥርሩ፤ ተኽም አንⷀ ሻካቹ፥ ⷘራው፥ ይታዘዝ፥ አፍ ይብርቃሩ፥ ወኼ ᎇስር የሜናወው፥ ኤያበርጥ፥ ኸጥነት ኤነወው። 18ሽናት ይረምዶ ሰብ በሽናት ዘኖም የፅድቅ ᎇስር ይስበስቦ።

will be added

X\