2 Thessalonians 3

1ጐፔቸም ኧተᎀቾ የቀጥወ ይእግዘር ቃር ባኹሜ የኸረም ኸማ ብንጐድሜ ይቤትቴም ይከብሬ ይናም ጠሎት አምሮንደ። 2የኽክም ቃረታ ሰሞም ያምሮ እንመዀና አንኸሮ የኸሬ ተᎃጥጥም ተᎇሼ ሰብ አደጋ ንተርፍኔ ይእግዘር ጠሶንደ። 3ቢኸርም እግዘር የታመረው፤ ዀት ያትቋምርኹሸ፤ ተሲጣርም ይቀየኹሸ። 4ናዝዝኔኩም እንም ኧዃም ቢኸር የዝ አንⷀ ትቾተዊ ኸማ በⷘታ ኸነም ንትመመኔኩ። 5ⷘታ ⷕናኹ ይእግዘር ንማጄም የክርስቶስም ፍናⷔ ያስራኹ። 6ጐፔቸም ኧተᎀቾ በክርስቶስ ቢያምሮም ሜና ቴቾቶ ሰብ፥ ቲናም በትⷀፐርኹዊ ትምርት ኤነት ቴረብሮ ክርስቲያን እንም ትትቤተሮዌ በⷘታንዳ በኢየሱስ ክርስቶስ ሽም ናዝዝኔኩ። 7ይና መሰርኹም ንበሮት ያነብኹ ኸማ አኹም ገጋኹ ትⷕሮ፤ ይና ታኹ በረፐኔ ሜና ኤባር አንቾናነ። 8የሟኒም ሰብ ሸረት እክም አንበናነ፤ ባኹ ባትማኹ አንትጨርኔብኩዌ ዋናም ምሳረ ⷀጥነም ጃድ ባነም ንቾትነ ባነ። 9ዝም የቾትነ ይና ያኹ መሰሮ ንኽነሸ በበሮተንዳው ባንኸሬ አኹ የⷅጭነረንዳ ዋጋ ቲቦንዴ መብት አነፐረንዴ አንኸረ። 10ታኹ በረፐኔ "ሜና ቶቶት ኤሽንዀታ ኤብራ" ይብር ትዛዝ አዘዝኔኩም ባነ። 11ዝም የባኔᎌ አታት ሜና ኤቾቶ ሰብ በግብታኹ ያነቦ ኸማ ሰማነምታነው፤ ኽኖም ቤያገባኖ ዘንጋ ገፖም ይንጐድ ሰብ አደግሮት ባንኸሬ አት ዘንጋ ቴቾቶ ይረብሮ ሰብሎ። 12የዝካ ኤነት ሰብ በጨር ይረብሮዌ ቾቶም ይበሮዌ በⷘታ በኢየሱስ ክርስቶስ ሽም ናዝዝነም ናጬፕኔዮ። 13ጐፔቸም ኧተᎀቾ አኹም ⷀጥነም ቤትኹ ወኼ ዘንጋ ተቶቶት አታክቦ። 14በዝ ናዀቸር የራኽኔንኩ ወባጀ ኤትⷀፐር ሰብ ቢረብር መርኬ በረዊ፤ ይቅመጭምኸማ ተዀት አትኽሮ። 15ቢኸርም የጐፔ ኸማ ምኽረዊ ባንኸሬ ጠላት ኸማ አትዘዊ። 16ሽናት ይብ ⷘታ ገገታ እንም ጋᎀ ብንም ዘንጋ ሽናት ያብኹ፤ ⷘታ ትንማኹ ጋᎀ የኽር። 17ዝኽ ወጌምት በገገና ኧጅ የጣፍንኩ እያ ጳውሎስንዀ፤ ብያ ናዀቸር እንም ይረኽዊ መርኸት ዝኸታው። እያ ኧጠፍ ዝካው። 18የⷘታንዳ የኢየሱስ ክርስቶስ ፀጋ ትንማኹ ጋᎀ የኽር።

will be added

X\