2 Corinthians 10

1እያ ጳውሎስ ባኹ ይፍቴ ታነዀ ይቅመጭ ቧንም፤ ታኹ ትንትቤተር ጭን ኤነጠረቅ ቧንም፤ እያም በክርስቶስ ፋራⷕነትም ⷘርነት ኧጨስኹ። 2ኧጨስኹም ያኽዌንየ ትንቸን ደፈርዀም ኧዝረⷍኸማ ባታመሮኔው፤ የዝ አለም ሰብ አሳብኸማ ንረብነቃር ኤፐቦም ቢያዞንደ ባታት ሰብ ይፍቴ ጭን ደፈርዀም ኧዝረⷌ ይኸኒ። 3ይናም በዝ አለም ብነብነም ንትዋካነ የዝ አለም ሰብ ኸማ አንኸረ። 4ይና ንትዋካኔᎌም ግብረንዳ የዝ አለም ግብር ኸማ አንኸረ፤ ይና ግብረንዳ የሼጣን ወረ ባነሮም ይወጎዌ ይኸሎ ይእግዘር ደረግ ያነቦ ቃርሎ። 5እግዘር ባኻሮት ᎈር ቈፋ ኸሮም ይትረሶ ሸርም ትቢትም ናጠፋነቴ፤ በሰብ ቀልብ ያነ አሳብ እንም ማነኽነም የክርስቶስ ይታዘዝ ኸማ ናሜነቴ። 6አኹ በውረም ትታዘዞ ኸማ በኻነ ጋᎀ ሟኒም ኤታዘዝዀታ ንቀጣኔዬ ተረሳነም። 7አኹ ታዞ ቦጤ ቢትየ ዘንጋው፤ ሟኒም ሰብ "እያ የክርስቶስንዀ" ባረም ቢያስብ ይናም የዀትም ኸማ የክርስቶስ ወኽረንዳ የኻር። 8ⷘታ ኢየሱስ ባበንደ ዳነት ንቃር ብንትሸመርወም ኤያቅመጬ፤ ዝኽ ዳነት ያውንደ ያኹ ናትቋምኔኩዌው ባንኸሬ ንብራጭኔኩዌ አንኸረ። 9ጣፍዀም በራኽንኩ ደብዳቤ አሽራንፍኹ ቃር ኤምሰርኹ። 10አታተዀና "ጳውሎስ ጣፈም ይረኽኖ ቃር ይረዞም ትወ ዘንጋሎ፤ ቲና ጋᎀ ቲኸር ጭን ⷀጨነው፤ ቲዝረⷍም ይቈርጪ" ይብሮ ይኽርሸ። 11ይና በረቌ ኸነም በጣፍኔም ታኹ ጋᎀ በርብ ኸነም ትንቾትኔ ቃር እማትም ᎇችርነት ኤነን ኸማ ኽኖ የኻሮ። 12ቢኸርም ገገዀና ቲያⷛⷝዞ አታት ሰብ ጋᎀ ገገንዳ ናⷛⷝዝኔ ዌም ገገንዳ ናትዋናኔ አንደፍነ፤ ኽኖ ጭን ገግ ተገገዀና ⷃጦም ኽኖም ተኽኖም አትዋኖም ይፈርዶ የኸሬ ይቤስሮ ሰብ አንኸሮ። 13ይና ጭን ያኹዌ ዳር ቸነነም ኑድኔኩዌ እግዘር ⷃጣም ባበንደ ሜናንዳ ንትሸመነ ባንኸሬ ታቅም በᎈር አንትሸመነ። 14አኹም ያነኹ በሜናንዳ ደን የኸሬ የክርስቶስ ቃር ዩድ ወኼ ወሬ ኑድኔ ያኹዌ በቸነኔ ተኽ ውጤ አምᎄጣነ። 15ዝም የኸሬ እግዘር ይና ⷃጣም ታበንደ መደር ወጣነም ብንጐድ ሰብ ሜና አንትሸመነ፤ ይርቅመታ አኹም ባመርኹᎌ ትትረቆዌ ይናም ሜናንዳ እግዘር ⷃጣም ባበንደ መደር ባኹ ግብት ይርቅ ይትረቄ ተስፋ ናሜነ። 16ኼታ ብንጐድ ሰብ የሜና መደር ገፓነም አወተርም በቾቺ ሜና ታንትሸመነ ታኹ ገን በኸች ወነም የክርስቶስ ቃር ዩድ ወኼ ወሬ ኑድኔ ይኸርንደ። 17ቢኸርም "ይትሸመር ሰብ ብእግዘር የትሸመር።" 18ሰብ ያⷛⷝዥዬ ይሰራ እግዘር ቲያⷛⷝዝኑ ባንኸሬ ገግ በገገታ ቲያⷛⷝዝ አንኸረ።

will be added

X\