1 Thessalonians 4

1በቀጥወም ጐፔቸም ኧተᎀቾ እግዘር ይሽኔ መምር ንበሮት ያትⷈሽ ኸማ አትመኔኩም፤ ኧዃም የኽክሙ፤ በⷘታ ኢየሱስ ሽም ንጨስኔኩም ንመኽኔኩም ያነ የዝ ይፍቴ ታመነኹዊ ይርቅ ድበያ ታመሮዌው። 2በⷘታ ኢየሱስ ሽም ምር ኤነት ትዛዝ ያብኔኩ ኸማ አኹም ትⷕሮ። 3ይእግዘር ፍቃድ አኹ ትትቀደሰዌም ተረከብኹ ሰብ ዀጅር ባደምዶዌው። 4ታኹ ያታተታ ምሽተታ በቅድስናም በክብርም ወቀየ ያነወኸማ የኻር። 5እግዘር ኤⷕሮ አረማዊ ሰብ ኸማ ᎃጥጥ የገግ ተመኛት ኤምበርብኹ። 6ሟኒም ሰብ በዝ ዘንጋ በክርስቶስ ያመሮ ሰብ ኤበድል ዌም ኤያታልል፤ የዝም ይፍቴ ኦድነም ያትጬፐኔኩም ኸማ ዛዀና ይቾቶ ሰብ እንም ⷘታ ይቀጣኖ። 7እግዘር ይና የጠናንደ ተባጢር መጠነም ንረብኔዉ ባንኸሬ ሰነኽነም ንረብኔ አንኸረ። 8ኧጋ ዝኽ ወባጀ የቀንጠ የገገታ መንፈስ ቅዱስ ይብኹ ይእግዘር ይቀርጥ ባንኸሬ የሰብ አንኸረ። 9በክርስቶስ ያመሮ ጐፔቸም ኧተᎀቸም ተራመዶ ባረም ሟኒም ሰብ ይጠፍንኹዌ ኤያትⷈሽ፤ ዝም የኸረወ አኹም ታኹ ወትራመድ ያነበብኹኸማ ገጋኹ ቲእግዘሬ ተማርኹዊም። 10በመቄዶንያ ገነ እንም ያነቦ ጐፔቻኹም ኧተᎀቻኹም ትረምዶ፤ ቢኸርም ጐፔቸም ኧተᎀቾ ኧዃ ንመኽኔኩ ይርቅ ትረምዶኸማም፥ 11በሽናት ትረብሮዌ ታትባቅሮኸማም የገጋኹ ቃር ታስቦዌ፥ የዝም ይፍቴ ያዘዝኔኩም ኸማ በገጋኹ ኧጅ ትቾቶኸማው። 12በዝ ኤነት ቤያምሮ ሰብ ግብት ያኽውጅኩሸ፤ የሟኒም ሰብ ኧጅ ታታዞ ትምበሮሸ። 13ጐፔቸም ኧተᎀቾ ተስፋ ኤነኖ ሰብ ያዝኖ ኸማ ባታዝኖዌ፥ የᎀቶ ሰብ ቃር ውረም ቃር ትⷕሮዌ ንሸነ። 14ኢየሱስ የᎀተም ኸማ ተሞትም የትረሳ ኸማ ናምነ፤ የኽ የኸሬ በኢየሱስ አመሮም የᎀቶ እግዘር ተሞት ነሳም ተኢየሱስ ጋᎀ ያቸንኖቴ። 15ይናም ተⷘታ በትⷀፐኔ ቃር ኤነት ኑድኔኩ ዝኸታው፤ ⷘታ ኢየሱስ ቲቸን ዳር በያመንዳ ያነነ ይና የᎀቶኽኖ አንበድኔዮ። 16የትዛዝ ቃር፥ የመሌካ አለቃ ቃርም፥ ይእግዘር ጥሩምባም ይትሰማቴ፤ ⷘታ ገገታ ተሰሜ ይወርድቴ፤ በክርስቶስ አመሮም የᎀቶ አወተራቸ ይትረሶቴ። 17ተኽም አንⷀ በያመንዳ ያነነ ተረሳነም ⷘታ ኢየሱስ በዳበራ ንትⷀፐኔ ተኽኖ ጋᎀ በዳበራ ᎈንየ ንወጣነቴ፤ ተዀትም ጋᎀ የዘላለም ንረብነቴ። 18ኧጋ በዝ ቃር አኹም ታኹ ተቋመሮ።

will be added

X\