1 Thessalonians 3

1የኽየኸሬ በኽ የቸነ ተዝ አንⷀ ቀሮት አንኸረንዴ ይማተንዳ በአቴና ከተማ ኧክሶት ወኼ ቃር ኸረም ትየንደም። 2ጐፔቸንዳ የኸረ የክርስቶስ ወኼ ወሬ ቦዶትም ቲና ጋᎀ ይእግዘር አገልጌም የኸረ ጢሞትዮስ ያኹዌ ናኽኔንኩም፤ የራኽኔም አኹ ባመርኹዊ እምነት ያትቋምርኹዌም ይመኽርኹሜዉ። 3ዝም በሰናብኹ መከራ ያንⷄንየ ባትዠፐሮዌ ተቋመርኹም ትቈሞዌው፤ ይናም እንመንዳ ዝኽ መከራ ንትⷀፐኔ የትወሰነ ኸማ አኹም ገጋኹ ትⷕሮ። 4ታኹም ጋᎀ በረፐኔ መከራ ብንመንዳ ይሰራብንደ ኸማ አወተራቸም ኑድኔኩ ባነ፤ ያሸኹም ኸማ ባኹም ቢናም መከራ ሰናብንደም። 5በኽ የቸነ ተዝ አንⷀ ኧክሶት አንኸረንዬ የእምነታኹ ቃር ኧⷐሬ ሸዀምታነ፥ ጢሞትዮስም ያኹዌ ናኽንኩም፤ ዀትም የራዀን ያነ ዌም አቱ ሼጣን ፈተረናኹም ይኽርሸ ሜናንዳ ከንቱ ኸረም ቀነም በበሮት አጣነቅኹም ታነው። 6ኧዃ ጭን ጢሞትዮስ ታኹዌ ይናኼ ቸነምታነ የመሮታኹም የርማጃኹም ይሽር ወሬ ኦደንደም፤ አኹም እንም ግዝየ ቲሽርኹ ትዘግዶንደ ኸማም ይናም ናዥኔኩዌ ንትሜነም አኽር አኹም ይና ታዞንዴ ትትሜኖ ኸማ ኦደንደም። 7ኧጋ ጐፔቸም ኧተᎀቾም ይና ንረብነ በጅጓረም በምካትም ደን ቢኸርም በመሮታኹ የቸነ ባኹ ሰብር አመነነም። 8ዝም የኸረወ ቢእግዘር ተመመርኹም ተቋመርኹም በምበሮታኹ የቸነ በውረም ኧያም ኸነም። 9ባኹም የቸነ ቢእግዘርንዳ ይፍቴ ባነንደ ብንⷅት የዀት ንቃር ሽር ንብኔ። 10ቤነንዳም ናዥኔኩዌም በመሮታኹም የቀፐረ ንመራኔ ይኸርንደ ኸማ ዋናም ምሳረ ይእግዘር ንቃር ንጨስኔ። 11ኧዃም ያኹዌ ንቸኔ አባንዳ እግዘርም ⷘታንዳ ኢየሱስም ኤማንዳ የሰክትንደ። 12ይና ያኹ ንረምድኔኩ አኽር አኹም ታኹ ያነናኹ ንማጀ ይንጐድመዀና ባነናኹ ንማጀ የኽክም ⷘታ የድብርም ያብዛንኹ። 13በዝ ኤነት ⷘታንዳ ኢየሱስ ተቅዱሳነታ እንም ቢቸንወ ግዝየ አባንዳ በኸረ ቢእግዘረንዳ ይፍቴ ᎃጥጥ ኤነብኹም የትቀደስኹም ትኸሮዌ ⷘታ በእምነታኹ ያትቋምርኹ።

will be added

X\