1 Thessalonians 2

1ጐፔቸም ኧተᎀቾ ያኹዌ ተኖተንዳ ከንቱ አነፐረ ኸማ አኹም ትⷕሮ። 2አኹም ትⷕሮ ኸማ የዝ ይፍቴ በፊሊጶስ ከተማ ታነነ መከራም ስዴበም ሰናብንደም ባነ፤ ቢኸርም ንቅ መራክስ ቢሰራብንደም ዳር ይእግዘር ወኼ ወሬ ኑድኔ እግዘረንዳ ድፍረት አበንደም። 3ይና ያኹ የመከኔኩ በስተት ዌም በሰነኸ ዘንጋ ተመራነም ታነ አንኸረ፤ ያኹም ናታልልኔኩዌም አንሸነ። 4ይርቅመታ እግዘር ወንጌለታ ይና ባደራ ያበንዳ ቢና ተመመረም የኸሬ ይናም የታመረ ሰብ ኸነም ንዝረⷍነ፤ የⷕነንዳ ቃር ይⷕር እግዘር ይሽኔ ባነም ታነው ባንኸሬ ሰብ ይሽኔ ባነም ታነ አንኸረ። 5በቅማምሮት ዌም የዋጋ ንማጀ ንቤተንደ ዋጋ ንበራኔኩዌ ስርም አንዝረⷈነ ኸማ አኹም ገጋኹ ትⷕሮ፤ እግዘርም ምስክረንዳው። 6ታኹም ኸረም ትንጐድም ተሟኒም ሰብ ክብር አንሽነ። 7የክርስቶስ ናዀቸረነም በኸነሜ ባነንዳ ዳነት ንትጨርኔብኩዌ ይኸርንደ ባነ፤ ቢኸርም የዴንⷛⷕታ ትጬፕሮ አዶት ኸማ ያኹ ሜራ ኸነም። 8የኽክም ንቃር የረመድኔኩዌ ተርቅ ንማጀንዳ የቸነ ያኹ እማት ይእግዘር ወንጌል ኦዶት ቴኸር ነብሰንዳ ኒብኔኩዌ ይሽርንደ ባነ። 9ጐፔቸም ኧተᎀቾ፥ መምር የቾትነም የⷀጥነም ኸማ አኹም ትⷕሮ፤ ይእግዘር ወንጌል ያኹ ትኑድነ አትማኹ ባናጀግኔ ዋናም ምሳረ በሜና ንⷀጥነ ባነ። 10ይናም ባኹ ክርስቶስ ባመርኹ ሰብ ግብት ታነነ በቅድስናም በፅድቅም ⷅጥየ ቃር በቶቶት አት ባጢር ኤባር የረፐነ ኸማ አኹም እግዘርም ምስክርንኹ። 11አብ የዴንⷛታ ያሜሮም ኸማ ይናም ያኹ ያመነኔንኩ ኸማ አኹም ትⷕሮ። 12እንም ጋᎀ ትመኽኔኩም ትናትቋምርኔኩም ይእግዘር መንግስትም ክብርም ትትሸዶዌ የጠናናኹ እግዘር ቢሽን ኤነት ትረብሮዌ አደራ የባኔኩ ኸማ ትⷕሮ። 13አትም ያኹ ቃር እንም ጋᎀ ይእግዘር ሽኩር ንብኔᎌ ቃር ነረንደ፤ ቲና የሰማኹዊ ይእግዘር ቃር በትⷀፐርኹ ግዝየ ባኹ ክርስቶስ ባመርኹ ሰብ ይቾት ዝኽ ቃር የትⷀፐርኹዊ የሰብ ቃርኸማ ቴኸርም ይእግዘር ቃርኸማ አመነኹም ተⷀፐርኹም፤ ዝም ቃር ውረም ይእግዘር ቃሩ። 14ጐፔቸም ኧተᎀቾ በይኹዳ ገነ ያነቦ በኢየሱስ ክርስቶስ ይእግዘር ቤተክርስቲያን የኸሮኽኖ መሰርኹም፤ ኽኖም በይኹዳ ሰብ መከራ የትⷀፐሮም ኸማ አኹም በገጋኹ ገነ ሰብ መከራ ተⷀፐርኹም። 15የይኹዳ ሰብ የⷘታ ኢየሱስም የነቢም የቀጠሮ ይናም አሳደዶም ተገነ ያወጦንደኽኖሎ፤ ኽኖም እግዘር ያትማተቦ የሰብ እንም ይጠሮ ቃሎ። 16አረማዊ ሰብ ተባጢረዀና ይተርፎᎌ ቃር ኑድኔዮዌ ዳር ይኸሮንዴ ያትባቅሮ፤ በዝ ኤነት በባጢር ᎈር ባጢር በድብሮት ይረብሮ፤ በኽ የቸነ ይእግዘር ማት በቀጥወ ቸነቦም። 17ጐፔቸም ኧተᎀቾ የቀሪ ዳር ታኹ የትቤተኔ ያኹ ያነንደ ተመኛት ንቃር የኸሬ ተራከብነም ቤነንዳ ናዥኔኩዌ ሸነም። 18ይናም ያኹዌ ንቸኔ ኤላነም ባነ፤ እያ ጳውሎስማ ያኹዌ ኧቸኔ ብዘ ጋᎀ ተረሳዀም ባነ፤ ቢኸርም ሼጣን ቈፋ ኸረብንደም። 19ኧጋ ተስፋንዳም ብንⷅተንዳም ⷘታንዳ ኢየሱስ ክርስቶስ ቢቸንወ ከረ ቢፍተቴ ንሟቅጥኔᎌ የⷀሞት አክሊለንዳ አኹ ባንኸርኹ እንጐድ ሟኑ? 20በውረም ክብረንዳም ብንⷅትመንዳ አኹትንኹ።

will be added

X\