1 John 5

1ኢየሱስ መሲኽ የኸረ ኸማ ያምር ሰብ እንም ይእግዘር ትከው፤ አባታ ይረምድ ሰብ እንም ትከመታ ይረምድ። 2ይእግዘር ደንⷛ ንረምድነ ሰብ የኸነ ኸማ ንⷕነ፥ ይእግዘር ትነምድነም ትዛዘታም ትንቅየነው። 3ይእግዘር ንመዶት ወበር ትዛዘታ ወቀየው፤ ትዛዘታም ያጀግሮ ቃር አንኸሮ። 4ይእግዘር ትከ የኸረ እንም የዝ አለም ይⷀም፤ ዝኽ አለምም ንⷀምኔ በእምነተንዳው። 5የዝ አለም ይⷀም ሟኑ? ዝኽ አለም ይⷀም፥ ኢየሱስ ይእግዘር ትከ የኸረ ኸማ ያምር ሰቡ። 6ጥምቀተታ ቢያትየሽ እኻም ሞትመታ ቢያትየሽ ደም የቸነ ኢየሱስ ክርስቶሱ፤ ዀትም የቸነ እማት ብኻ ቴኸር፥ ብኻም በደሙ፤ መንፈስ ቅዱስ ውረም የኸሬ ዝኽ ዘንጋ ውረም ወኽረታ መንፈስ ቅዱስ ይምሰክር። 7ሶስት ምስክር ነረቦ፤ 8ኽኖም መንፈስም፥ እኻም ደምምሎ፤ ዝኽ ሶስተዀና ቲምሰክሮ ይትስማሞ። 9የሰብ የምስክር ቃረዀና ንትⷀፐነ፤ ቢኸርም ይእግዘር የምስክር ቃረታ ትንም ይርቅ፤ እግዘር የትከታ ዮደለ የምስክር ቃረታ ዝኸታው። 10ብእግዘር ትከ ያምር ሰብ ዝኽ የምስክር ቃር በⷕነታ ነረን። ይእግዘር ኤያምር ሰብ ጭን እግዘር የትከታ ዮደለ የምስክር ቃር ባንመሮተታ ይእግዘር አሰተነ አᎀነንም። 11የምስክር ቃረታም እግዘር የዘላለም ጄነት ያበንደ ኸማም ዝም ኧያም ወኽር በትከታ ያነ ኸማ ዩድቃሩ። 12ይእግዘር ትከ ያነን ጄነት ይገባ፤ ይእግዘር ትከ ኤነንዀታ ጭን ጄነት ኤገባ። 13ብእግዘር ትከ ታምሮ እንማኹ የዘላለም ኧያም የኸርኹ ኸማ ትⷕሮዌ ዝኸታ ጣፍንኩም። 14ሟኒም ቃር የዀት ፍቃድ ኸማ ብንጨስነ ይሰማንደ ኸማ ንⷕነ፤ በኽ የቸነ ብእግዘር ይፍቴ ድፍረት ነረንደ። 15የጨቈስኔ እንም ይሰማንደኸማ በኻነ፥ ተዀት የጨቈስኔ እንም ኧዃ ንትⷀፐነ ኸማ ንⷕነ። 16ሟኒም ሰብ ጐፔያታ የሞት ኤያሰራ ባጢር ቲቾት ቢያዥን ይእግዘር የጠስረ፤ ባጢረታ የሞት ኤያሰራ ባጢር በኸረ እግዘር ኧያም ያᎂን፤ ቢኸርም የሞት ያሰራ ባጢር ነረ፤ የዝ ኤነት ባጢር ይእግዘር የጠስ አምብር። 17ᎃጥጥ ሜና እንም ባጢሩ፤ ቢኸርም የሞት ኤያሰራ ባጢር ነረ። 18ይእግዘር ትከ ኢየሱስ ክርስቶስ ይየን የኸሬ ይእግዘር ትከ የኸረ እንም ዥባፐረም ባጢር ኤቾት ኸማ ንⷕነ፤ ሼጣንም ኤረድን። 19ይና ይእግዘር ደንⷛ ወኽረንዳ ንⷕነ፤ አለም ጭን ᎃራመታ የሼጣን ተገሳም። 20ይእግዘር ትከ የቸነኸማም ውረም የኸረም ዀት ንⷕኔ ይቤስር ⷕን ያበንደኸማ ንⷕነ፤ ይናም በዝ ውረም በኸረ በኢየሱስ ክርስቶስ ንረብነ፤ ዀት ውረም የኸረ ⷘታ የዘላለም ኧያም ያሜ ዀትሙ። 21ደንⷞ የአሰተነ ቅሪነ ተስግዶት ገጋኹ ቀሮ።

will be added

X\