1 John 4

1ናማጂዮ! በዝ አለም ብዘ አሰተነ ነቢ የትረሶዬ መንፈስ እንም አትመሮ፤ መንፈስ እንም ትእግዘሬው ዌም አንኸረ በሮም መርምሮ። 2ይእግዘር መንፈስ ቤተርኹም ትⷕሮ በዝኸታው፤ ኢየሱስ ክርስቶስ ሰብ ኸረም ቸነም ወተየታ ዩድ መንፈስ እንም ይእግዘር መንፈሱ። 3ኢየሱስ ክርስቶስ ሰብ ኸረም ቸነም ወተየታ ኤዩድ መንፈስ እንም ይእግዘር መንፈስ አንኸረ፤ ዝም መንፈስ ይቸንቴ ቲውሪ የሰማኹዊ የክርስቶስ ጠላቱ፤ ዀት ኧዃም ቢኸር በዝ አለም ነረ። 4ደንⷞ አኹ ይእግዘርንኹ፤ ባኹ ያነ መንፈስ በአለም ታነ መንፈስ ይርቅ፤ በኽም የቸነ የአሰተነ ነቢ ⷀመኹዮም። 5አሰተነ ነቢ የዝ አለምቃርሎ፤ ይዝረከዊም የዝ አለም ዘንጋው፤ የዝ አለም ሰብም የኽኖ ይሰማኖ። 6ይና ይእግዘርንደ፤ እግዘር ይⷕር ሰብ እንም ይሰማንደ፤ ይእግዘር አንኸረ ሰብ ጭን ኤሰማንደ፤ ውረም የኸረ መንፈስም አሰተነ መንፈስም ቤተነም ንⷕነ በዝመታው። 7ናማጂዮ! ንማጀ ትእግዘሬ የኸሬ ገግ ተገገንዳ ንትራመድነ፤ የሰብ ይረምድ ሰብ እንም ይእግዘር ትከው፤ ይእግዘርም ይⷕን። 8እግዘር ንማጀ የኸሬ፥ እግዘርም ሰብም ኤረምድ እንም ይእግዘርም ኤⷕን። 9በትከታ ወኸት ኧያም ኸነም ንረብኔ እግዘር እማት ትከታ የዝ አለም ሰቤ ናዀንም፤ በዝመታ ይእግዘር ንማጀ ቢና ግብት ታሸም። 10ንማጀ ወበር ዝካው፤ ይና እግዘር የረመድኔዬ ቴኸር፥ ዀት ይና የረመደንዴም ባጢረንዳም ይትፈቄ ትከታ የራኸንዴው፤ ትከታም ይና ኽትም ኸረም። 11ናማጂዮ! እግዘር ዛኽር ቃር በረመደንደ፥ ይናም ገግ ተገገንዳ ወትራመድ ነረብንደ። 12ይእግዘር ያሸን እማትም ሰብ ኤነ፤ ይና ገግ ተገገንዳ ብንትራመድነ እግዘር ቢና ይረብር፤ ንማጀታም ቢና ᎃራ ይኸር። 13እግዘር መንፈሰታ ያበንዴ፥ በዀት ንረብነ ኸማም ዀትም ቢና ይረብር ኸማ ንⷕነ። 14አብ እግዘር የትከታ የዝ አለም ሰብ ያተርፌ የራዀን ኸማ አሸነም፤ ምስክርንደ። 15ኢየሱስ ይእግዘር ትከ የኸረ ኸማ ቢዩድ ሰብ እንም እግዘር ይረብር፤ ዀትም ብእግዘር ይረብር። 16በዝም የቸነ እግዘር ይና ያነን ንማጀ ንⷕነ፤ ናምነም። እግዘር ንማጀው፤ በርማጀ ይረብር ሰብ ብእግዘር ይረብር፤ እግዘርም በዀት ይረብር። 17በዝ አለም ይና ንረብኔ ክርስቶስ ይረውንም ኸማ የኸሬ፥ ንማጀንዳ ᎃራ ቢኸር፥ በፍርድ ከረ ታንሰርፍነ ቢፍተቴ ንትⷀነብኔ ድፍረት ይረብርንደ። 18ᎃራ ንማጀ ስኔፈ ኦጣም ይቃሽ ባንኸሬ በርማጀ ግብት ስኔፈ ኤነ፤ ስኔፈ ተቅጣት ጋᎀ የትጣበጠ የኸሬ ቅጣት ያትሸንፍ የኸሬ ይሰርፍ ሰብ ንማጀታ ᎃራ አንኸረ። 19እግዘር በተረም የረመደንዴ ይናም ንረምድነ። 20"ይእግዘር ኧረምድ" ባረም ጐፔያታ ኤረምድ ሰብ ይፈጥር፤ ያሸን ጐፔያታ ኤረምድ በኸረ፥ አናሸን እግዘር ይረምዴ ኤዀለ። 21በኽም የቸነ ክርስቶስ ያበንደ ትዛዝ "ይእግዘር ይረምድ ሰብ ጐፔመታ የርመድ" ይብር ቃሩ።

will be added

X\