1 Corinthians 4

1ኼታ ይና የክርስቶስ ሜነነ የኸነ ኸማ፥ ሰብ አᎆሰረን ይእግዘር ቃር አጬግነም ኑድኔ አደራ ያውንደ ሰብ የኸነ ኸማ እንመታ የኻር። 2ዝም አደራ ያዊ ሰብ ብንም ቃር ᎃርቴ ሰብ ወኽር ነሮ። 3ቢኸርም አኹ ዌም እንጐድ ሰብ ብያ ብትፈርዶፒ ኤጐዴ፤ እያም በገገና ዳር አንፈርድ። 4እያ ብንⷕን አኽር ጥፋት ነረቢ አምብር፤ ቢኸርም ተባጢር መጠርዀም አምብር፤ ብያ ይፈርድ እማት ⷘታ ኢየሱሱ። 5የዝ እንም ⷘታ ኢየሱስ ቸነም ይፈርዴ ግዝየታ ቴሰራ ባት ሰብ እንፈንድኹ፤ ዀትም ቲቸን በጠነማ ደን የትሼመ በጬት ያወጣቴ፤ በሰብ ⷕን ያነ የትሼመ አሳብ አወጣም ያትየሽቴ፤ ኽም ጋᎀ ያታተታ ትእግዘሬ አጅገታ ይረኽብቴ። 6ጐፔቸም ኧተᎀቾ አኹ ኧጥቅምሸ ባዀም በዝ ዘንጋ እንም እያም አጵሎስም ዮማካ ኸማ ኤፐዀም ዝረⷈዀም፤ ዝክም ያመነዀ "ተጣᎉ ቃር አትድብርወ" ይብር ምኽር ቲና ትትመሮዬ ትምብሩ፤ በዝም የቸነ ባት ሰብ ወትሸመር እንጐድ ሰብ ጭን ቅርጦት ኤነብኹ። 7አኸ ትንጐድ ሰብ በንቃር ትርቅ? ትንጐድኼ አንትⷀፐርዀን ቃር ምርነረ? ኧጋ፥ እንም ቃር የትⷀፐርኸ ትንጐዴ በኸረ አንትⷀፐረ ሰብ ኸማ የምር ትትⷛⷘዝ? 8ኧዃማ ጠᎈኹም፤ ደንገነም ኸርኹም፤ ይናም ኤባር ተረገስኹም፤ ይናም ታኹ ጋᎀ ንትረገስኔ ብትረገሶ ይሳሬ ባነ። 9ፍጥረት እንም መሌካም ሰብም እንም ዳቆፕንደም። እግዘር ይና ናዀቸረነታ ሞት የᎈንጅᎌ ሰብ ኸማ ትንም ያንⷄ ያመነንደ ይመስሬ። 10ይና የክርስቶስ ባነም ጋዋ ኸነም፤ አኹ ጭን በክርስቶስ አዮ ኸርኹም፤ ይና ⷀጨነ ኸነም፤ አኹ ጭን ጦናማ ኸርኹም። አኹ ያኸውጅኩ፤ ይና ጭን ይቈርጭንደ። 11ይናም ኧዃ ዳር ይገድንደ ይጠማንደ፤ ንትኸተነ ቃር ንበኽነ፤ ንደነግነ፤ ቤት በከነም ንዦነ። 12በገገንዳ ኧጅ ቾትነም ንⷀጥነ፤ ቲቀርሞንደ ንደነ፤ ቲያጨንቆንደ ንፈርኽነ፤ 13ሽመንዳ ቲያጠፎንደ ቦኼ አመር ንዠፕነ፤ ኧዃ ዳር የዝ አለም ይቋሺ አረፋ ኸነም። 14እያ ዝኸታ ኧጠፍንኹ ኧረምድኹ ደንⷛና አመነዀም ኧመኽርኹዌ ባንኸሬ አቅመጭኹዌ አንኸረ። 15በክርስቶስ ያትረቆኩ ብዘ ሰብ ቢረብሮም ብዘ አብ ኤነናኹ፤ እያ የኢየሱስ ክርስቶስ ያተርፍ ቃረታ ቦዶተና አብ ኸርኩም። 16ኼታ እያ ምሰሮም ንበሮ ባዀም ኧጨስኹ። 17የዝ እንም ኧረᎃድን በⷘታ ኢየሱስ የታመረ ኧርቸና የኸረ ጢሞትዮስ ናዀም፤ እያም በመደር መደር በቤተክርስቲያን እንም ትናትመር በኢየሱስ ክርስቶስ ኧረውን ንብረት ዀት ዮድኹሸ። 18ቢኸርም እያ አዥኹዬ ያኹዌ አንቸን ቃር የመሰረኖ አታት ትቢተነ ሰብ ነረቦ። 19ቢኸርም እግዘር በባረ አፍጢትዀ ያኹዌ ኧተንሸ፤ ትቢተነኽኖ የዝረከበዊ ቃር ቴኸር አቅመዀና ኧⷕሬ ኧሸ። 20ይእግዘር መንግስት ይትⷐር ብእግዘር ደረጉ ባንኸሬ እማት በቃር አንኸረ። 21ምር ትሰቦ? ኧቀጣኹዌ እንጣር ንጥብጥም ንተንብኹ ዌሽ በርማጅነትም በሜርነትም መንፈስ ንተንንኹ?

will be added

X\