ROMA 9

1Habayti ya halita--en ko ay kaptegan, ta hiko ay ma--in pamakilamo koni Pangino--on Hisokristo. Agko ampagtotol nin kabongkokan, ta hay Ispirito nin Diyos ya ampamo--on kongko ay an-omawoyon ha anhalita--en ko. 2Masyadoy kalele--an ko boy pirmi kon ikakhit nin nakem 3ya tongkol ha Hawhodiyo ya kawkalahi̇̀ ko. No ma-ari̇̀ bongat ya mismon sarili ko ya mipahiyay koni Pangino--on Hisokristo, ta mipalako ko ha impirno ya ayin anggay kaparosawan ay labay ko basta malibri hila. 4Malakè ya angka-ibintahi nin Hawhodiyo ta hila ya pinili̇̀ nin Diyos nin pag-ikon na, boy pinag-anak na hila. Impakit nin Diyos ya kagandawan nin hawang na konla. Hawhodiyo simpri ya pinangako--an nin Diyos, boy ha Hawhodiyo inggawà ya kawkapanogo--an. Intorò et konla no pangnoy tamà ya panhohomamba ha Diyos, boy malakè et ya bagay ya impangakò nin Diyos konla. 5Hay kawka-apo-apowan nin Hawhodiyo ay mangarangal. Hi Pangino--on Hisokristo ya nag--in tawo ay in-anak nin Hodiyo. Hiya ya Diyos ya ampamo--on ha kaganawan boy hiya ya poriyen nin ayin angga. Amin. 6Agko anhalita--en ya ahè matopad ya pangakò nin Diyos ya pagtawo nay Hawhodiyo ya aw-inalalak ni Israyil. Piro hapa--eg, alwan kaganawan inalalak ni Israyil ay pinili̇̀ nin Diyos, 7boy alwan kaganawan inapopò ni Abraham ay an-ibilang nin talagan aw-anak ya impangakò nin Diyos koni Abraham; ta hinalità kona nin Diyos, "Hay ma-i-alalak ni Isak ay hilan bongat ya aw-inapopò mo." 8Hay labay totolen, hay an-ibilang nin aw-anak nin Diyos ay alwan kaganawan inapopò ni Abraham, no alwan haton bongat ya na-i-alalak kompormi ha pangakò nin Diyos ya hay ampipantompel ay hila baytoy talagan aw-inapopò ni Abraham; 9ta ombayri ya hinalità nin Diyos hin nangakò ya koni Abraham: "Pangalabah nin mihay ta--on ay magbira ko, boy manganak hi Sara nin hay i-anak na ay lalaki." 10Hay kanayon et ya makapipalinaw kontamo ay pangyayari ha lambaw ya na-iboktot ni Ribika. Habaytoy lambaw ay mimihay tatay la ya ayin kanayon no alwan hi Isak ya ka-apo-apowan tamo. 11Impakit nin Diyos ya hay pamili̇̀ na ay kompormi ha kalabayan na, alwan emen ha pamili̇̀ nin tawo ya ka-ilangan pon makakit nin gawgawà. Biha in-anak baytoy lambaw, boy biha hila nakagawà nin mahampat o mala--et 12ay hinalità pon nin Diyos koni Ribika, "Hay kakà ay magsirbi ha ali." 13Hay nakaholat et ha Halità nin Diyos ay ombayri: "Hi Hakob ay nilabi ko, piro hi Isaw ay pinag-inakitan ko." 14No ombayro awod, mahalità tamo wari̇̀ nin hay Diyos ay ma--in ampili--en ta anlabiyen nay miha, hay miha ay ahè? Hay Diyos ay alwan ombayro, 15ta ombayri ya hinalità na koni Moysis: "Ampanlabi kon mangingangalo ha labay kon ingalowan." 16Kayà hay pamili̇̀ nin Diyos nin tawtawoy pag-ikon na ay banà ha ingangalo na konla, alwan banà ha kalabayan la o pagsikap lan manggawà nin kahampatan para mapalabi hila ha Diyos; 17ta hay nakaholat ha Halità nin Diyos ya tongkol koni ari̇̀ Para--on ay ombayri ya hinalità kona nin Diyos: "Ginawà kata nin ari̇̀ emen mo padya-dya--an ya tawtawo ko emen ha matalo kata, hay kapangyariyan ko ay ma-ipakit ko boy hay ngalan ko ay mibantog ha intiron babon lotà." 18Kayà an-ingalowan nin Diyos ya labay nan ingalowan, boy ampatya--en nay nakem nin tawtawoy ampipagmatyà nin ahè tompel kona. 19Maka ma--in tawoy maghalità nin ombayri: "No ombayro awod, antà amparosawan nin Diyos ya ahè tompel kona? Ma-ari̇̀ wari̇̀ omanen nin tawo ya kalabayan nin Diyos?" 20Alwan ombayro ya halita--en mo ha Diyos ta hika ay tawon bongat. Ipag-alimbawà ha manggagawà keren: hay keren ya ginawà na ay ma-ari̇̀ nayi̇̀ maghalità kona nin, "Antà ombayri ya pagkagawà mo kongko?" 21Hay manggagawà nin keren ay ayin wari̇̀ karapatan nin ha mihay bekley pità ya gagaw--en nan loway keren, hay miha ay gaw--en nan maganda piro hay miha ay gaw--en nan pangkaraniwan bongat gamit? 22Bilang ombayro itaman ya Diyos. I-alimbawà tamoy tawtawo hin hato ya mawmakasalanan. Katongkolan nin Diyos nin mamahang konla ta ipakit nay kapangyariyan na, piro agna ginawà ta mapasinsya ya. Pinagpasinsyawan na hila maski dapat na hilayna dayin parosawan. 23Hay bara--nan nin ombayro ya ginawà nin Diyos ay emen na ma-ipakit ya masyadoy kahampatan na do ha tawtawoy an-ingalowan na ya da--an naynan inhandà para mag--in karapatdapat nin magkama--in kagandawan do ha katatag-ayan ha kama-inan nin Diyos. 24Hitamo baytoy tawtawoy pinili̇̀ na. Alwan bongat Hawhodiyo no alwan kateng alwan Hawhodiyo, 25ta ha libro ya hinolat ni propita Osyas ay ma--in ombayri ya impaholat kona nin Diyos: "Hay tawtawo ya alwa ko pon ikon ay hila ya ingaten kon tawtawo ko. Hila ya agko pon anlabiyen ay labiyen ko. 26Do ha dogal ya pinaghalita--an ko hin hato nin alwa ko hilan tawo ay bayro hapa--eg nin hila ay ingaten nin aw-anak nin Diyos ya angkabiyay." 27Hi propita Isayas hin hato ay ombayri ya impahalità kona nin Diyos ya tongkol ha Hawhodiyo ya aw-inalalak ni Israyil: "Maski emen hilan kalakè kapati--an ha ambay dagat ay amò bongat konla ya malibri; 28ta hay Pangino--on ay mahigpit manosga nin tawtawo ha babon lotà boy tampol nan gaw--en." 29Hay kanayon et ya holà hin hato ni propita Isayas ay ombayri: "No hay Pangino--on ya ampamo--on ha kaganawan ay ahè nangilibri nin ongno kontamon Hawhodiyo hin pinarosawan na tamo ay nag--in tamo dayi nin emen ha tawtawo ha banowan Sodoma boy banowan Gomora." 30Anya hapa--eg ya mahalità tamo? Hin hato, hay alwan Hawhodiyo ay ahè ampipagsikap emen hila ay ibilang nin Diyos nin hila ay mahampat. Piro hapa--eg ay imbilang ana nin Diyos nin hila ay mahampat nin banà ha pantotompel la koni Pangino--on Hisos. 31Hay Hawhodiyo balè ay ampipagsikap nin homonol ha kawkapanogo--an, ta andap la no ha ombayro ay ibilang hila nin Diyos nin hila ay mahampat piro ahè nangyari. 32Antà nin hay Hawhodiyo ay ahè imbilang nin Diyos nin hila ay mahampat? Kayà aghila imbilang ta aghila antompel koni Pangino--on Hisos, no alwan hay ampagsikapan lan gaw--en ay sarili lan kalabayan ya mangahampat ya bawbagay. Hi Pangino--on Hisokristo ya agla labay pinto-owen ay kowinta bato ya pinibatolan la. 33Talagan peteg ta hay impaholat nin Diyos ay ombayri: "Ha dogal ya an-ingaten Siyon ay igwà koy bato ya pibatolan nin tawtawo. Habaytoy bato ay makapipatomba konla. Piro hay tawoy tompel kona ay ahè mareng--ey nin banà ha pantotompel na."

will be added

X\