ROMA 6

1Banà bayro ha hinalità ko ay ipagpatoloy tamo wari̇̀ ya pagkasalanan emen hay Diyos ay lalò mangingangalo kontamo nin mambin kahampatan? 2Alwan ombayro! Bilang ha tawoy nati ya agana makagawà nin kala-etan ay nag--in tamon ombayro hin tinanggap tamo hi Pangino--on Hisokristo. Kayà agtamoyna manggawà nin kala-etan ya anggaw--en tamo hin hato. 3Wari̇̀ agmoyo tandà ya hay paminyag kontamon ampipantompel koni Pangino--on Hisokristo ay kaptegan nin ma--in tamon pamakilamo kona boy kowinta nati tamo hin nati ya? 4Hay paminyag kontamo ay kowinta nati tamo nin kalamo ni Pangino--on Hisos boy kowinta intabon tamo nin kalamo na. Piro banà ha panggogomawà nin masyadoy kapangyariyan nin Tatay ya Diyos ay nabiyay yan oman. Ombayro itaman ya pangyayari kontamo. Hay da--an pagkatawo tamo ay nabayo ta kowinta nati tamo biha nabiyay oman. 5Banà ta kowinta nati tamo nin kalamo ni Pangino--on Hisokristo, hitamo ay talagan nabayo, ta kowinta nabiyay tamon kalamo na hin nabiyay yan oman. 6Tandà tamo ya hay da--an pagkatawo tamo ay kowinta kalamo ni Pangino--on Hisos nin nati ha koroh ya pinangipako--an kona. Hi Pangino--on Hisos ay nati ha koroh emen hay da--an pagkatawo tamo ay agana makapangyayari kontamo, boy emen agtamoyna mag--in honolhonolan nin gomawà nin kasalanan. 7Hay tawoy nati ay nakalibri ana ha kasalanan ya makapangyayari kona. Hitamo ay dapat mag--in nin ombayro. 8Banà ta kowinta nati tamo nin nakalamo ni Pangino--on Hisokristo hin nati ya ay ampinto--o tamo nin ma--in tamon bayoy biyay ya emen ha biyay na. 9Tandà tamo ya hi Pangino--on Hisokristo ay nati biha nabiyay oman, piro hapa--eg ay agyayna mapatalon oman nin kamatyan. Hay Kamatyan ay alwaynan makapangyayari kona. 10Hi Pangino--on Hisokristo ay minghan bongat nati boy agyayna matin oman. kamatyan na ya pinamatalo na nin kasalanan ya ampakapangyayari ha tawtawo. Hapa--eg ay angkabiyay ya boy kaganawan anggaw--en na ay ha ikapori nin Diyos. 11Kayà hay sarili moyo ay dapat moyo itaman ibilang nin nati ya agana ampakapagkasalanan. Hapa--eg, ma--in kawoyna nin bayoy biyay nin makapagsirbi ha Diyos banà ha pamakilamo moyo koni Pangino--on Hisokristo. 12Kayà agmoyoyna payagan nin mag--in makapangyayari komoyo ya kasalanan ya labaylabay gaw--en nin nawini moyo ya ma--in kamatyan. 13Maski anyay parti nin nawini moyo ay agmoyo pa-olayan nin manggawà kasalanan, no alwan hay nawini moyo ay ipasakop moyo ha Diyos. Ombayroy gaw--en moyo ta hikawo ya kowinta nati ay nabiyay oman. Kayà hay sarili moyo ay ipasakop moyo ha Diyos emen kawo makagawà nin kahampatan. 14Hay kasalanan ay alwaynan makapangyayari komoyo hapa--eg, ta nakalagan kawoyna ha kawkapanogo--an ya kowinta nane--el komoyo. Hay pagkama--in moyo hapa--eg nin kalibriyan ay banà ha pangingangalo nin Diyos ya mambi komoyo nin kahampatan. 15Hapa--eg ha nakalagan tamoyna ha anhonolen tamoy kawkapanogo--an ya kowinta nane--el kontamo, boy nakalibri tamoyna nin banà ha kahampatan pangingangalo kontamo nin Diyos ay ma--in tamo wari̇̀ kalaya--an nin manggawà kasalanan? Talagan ayin! 16Wari̇̀ agmoyo tandà ya no hinoy anhonolen moyo ay habaytoy makapangyayari komoyo? No ampagkasalanan ya tawo ay kasalanan ya makapangyayari kona, boy hay risolta kona nin habayto ay mipalako ha impirno ya ayin anggay kaparosawan. Piro no Diyos ya anhonolen nin tawo ay Diyos ya makapangyayari kona, boy hay risolta ay ibilang nin Diyos nin hiya ay mahampat. 17Hin hato ay kasalanan ya makapangyayari komoyo, piro salamat ha Diyos ta hapa--eg ay na-itorò ana komoyo ya peteg ya torò boy lobos anay kalabayan moyo nin honolen bayto. 18Hapa--eg ha inlibri kawo nin Diyos ha kasalanan ya nakapangyayari komoyo, hay makapangyayari ana komoyo ay hi Pangino--on Hisos. Kayà ampakagawà kawo nin kahampatan. 19Hay bara--nan nin pangi-alimbawà ko komoyo no hinoy makapangyayari komoyo bayri ha an-itorò ko ay emen moyo tampol ma-intindiyan. Hin hato, hay nawini moyo ay pina-olayan moyo ha gawgawà ya maremek boy ha kaganawan klasin kala-etan. Piro hapa--eg, hay nawini moyo ay ipasakop moyo ha Diyos emen kawo mag--in mahampat boy magkama--in malinis ya pagnanakem. 20Hin hato, hay makapangyayari komoyo ay kasalanan; kayà agkawo makagawà nin kahampatan. 21Wari̇̀ ma--in kahampatan ya imbonga nin hatoy gawgawà moyo hin hato ya kala-etan ya an-ikareng--ey moyo hapa--eg ha tinompel kawo koni Pangino--on Hisokristo? Habaytoy mala--et ya gawgawà moyo hin hato ay makapipalako komoyo ha impirno ya ayin anggay kaparosawan. 22Piro hapa--eg ay nakalagan kawoyna ha kasalanan ya nakapangyayari komoyo. Diyos anay makapangyayari komoyo ta hiyayna ya anhonolen moyo. Kayà malinis anay pagnanakem moyo boy ma--in kawon biyay ya ayin anggawan ya bilang biyay nin Diyos. 23Hay kabayaran nin kasalanan ay kamatyan ya makapipalako ha impirno ya ayin anggay kaparosawan. Balè hay ayin bayad ya an-i-ingalon an-igwà nin Diyos ay biyay ya ayin anggawan ya risolta nin pamakilamo nin tawo koni Pangino--on tamon Hisokristo.

will be added

X\