ROMA 4

1Ihipen tamo no pangnoy nag--in karanasan ni Abraham ya ka-apo-apowan nawen Hawhodiyo. 2No banà ha panggawà nan kahampatan ay imbilang nin Diyos nin hiya ay mahampat ay ma--in yan katoynongan para magmalhay. Piro alwan ombayro ta ayin yan ma-ipagmalhay ha arapan nin Diyos, 3ta ha Kaholatan nin Diyos ay ombayri ya nakaholat: "Hi Abraham ay ninto--o ha impangakò kona nin Diyos; kayà imbilang nin Diyos nin hi Abraham ay mahampat." 4Tandà tamo ya hay tawoy ampaki-opà nin magtrabaho ay an-opa--an. Hatoy opà kona ay alwan rigalo kona ta pinagtrabahowan na. 5Ma--in tawtawoy ampipanggawà nin kahampatan ta andap la no ha ombayro ay tanggapen hila nin Diyos; piro alwan ombayro, ta hay tawtawoy makasalanan ya nipantompel ha Diyos ay an-ibilang nin Diyos nin hila ay ayin kasalanan. Banà ha pantotompel la ay an-ibilang nin Diyos nin hila ay mahampat. 6Hin hato, hinalità ni Ari̇̀ Dabid ya makalmà ya tawoy an-ibilang nin Diyos nin ma--in kahampatan. Alwan banà ha gawgawà na no alwan banà ha katetpel na. 7Nakaholat bayti ya hinalità ni Ari̇̀ Dabid: "Tongkol ha tawoy mala--et ya gawgawà ay makalmà ya no habaytoy gawgawà na ay pinatawad nin Diyos ta inalih nin Diyos ya kawkasalanan na. 8Makalmà ya tawo ya ahè an-ibilang nin Pangino--on nin hiya ay ma--in nin kasalanan." 9Hato nayi̇̀ ya pangyayari ya binanggit no pangno magkama--in nin kaligawan ay paran bongat ha tawtoli̇̀ o kateng ha alwan tawtoli̇̀? Habayto ay para ha kaganawan ta ihipen tamo et ya tongkol koni Abraham. Banà ha pantotompel na ay imbilang nin Diyos nin hi Abraham ay ma--in kahampatan. 10Nakano nangyari bayti koni Abraham? Hin agya et nayi̇̀ tinoli̇̀ o hin toli̇̀ yayna? Nangyari bayto kona hin alwa ya et toli̇̀. 11Hin agya et tinoli̇̀ ay imbilang ana nin Diyos nin hi Abraham ay mahampat nin banà ha pantotompel na. Hay panoli̇̀ kona ay pananda--an nin pinaptegan nin Diyos ya hiya ay imbilang ana nin mahampat. Ombayroy ginawà nin Diyos koni Abraham emen hay kaganawan nin ma--in katetpel ha Diyos ay hi Abraham ya pinagkatatay la. Hila ay an-ibilang nin Diyos nin ma--in kahampatan, maski alwa hilan tawtoli̇̀. 12Hi Abraham et ya tatay nin tawtoli̇̀ ya ayin kanayon no alwan Hawhodiyo. Nag--in la yan tatay, alwan banà ta toli̇̀ hila no alwan banà ta ma--in hilan katetpel nin emen ha katetpelni Abraham biha ya tinoli̇̀. 13Hay Diyos ay nangakò koni Abraham boy ha aw-inalalak na nin igwà na konla nin pag-ikon ya intiron babon lotà. Agna ya pinangako--an nin banà ha panhohomonol na ha kawkapanogo--an, ta hay kawkapanogo--an ay ahè et na-igwà hin habayto, no alwan pinangako--an ya nin Diyos banà ha pantotompel ni Abraham, ta ha ombayro ay imbilang nin Diyos nin hi Abraham ay mahampat. 14Piro no hay nakapag-ikon bongat nin impangakò nin Diyos ay hatoy ampipanhomonol ha kawkapanogo--an ay ayin awod kowinta ya pantotompel boy ayin alagà ya pagpangakò nin Diyos. 15Banà ha kawkapanogo--an ya ahè mahonol ay nagkama--in nin kaparosawan ya nangibat ha Diyos. No ayin kawkapanogo--an ay ayin panlolomabag boy ayin kaparosawan. 16Hapa--eg banà ha pangingangalo nin Diyos nin mambin kahampatan, hay impangakò na ay sigoradon matanggap nin kaganawan ma--in katetpel. Habayto ay inggawà na ha kaganawan ma--in katetpel, alwan bongat do ha ampipanhomonol ha kawkapanogo--an ya ayin kanayon no alwan Hawhodiyo. Habayto ay matanggap nin kaganawan ma--in katetpel nin bilang koni Abraham, ta banà ha pantotompel tamo, hi Abraham ay nag--in tamon tatay. 17Hay tongkol koni Abraham ay ombayri ya nakaholat ha Halità nin Diyos: "Hika ya ginawà kon tatay nin tawtawo ha malakè ya nasyon." Habaytoy impangakò ay sigoradon mangyari, ta hay nagpangakò ay Diyos ya ampinto-owen ni Abraham. Hiya ya Diyos ya ampamiyay oman nin nikati boy mamalsa nin hatoy ayin et. 18Hi Abraham ay ayin anan pag-asa nin magka-anak ta mato--a yayna. Ombayro man, hay impangakò kona nin Diyos ya hiya ya pagtatay nin tawtawo ha malakè ya nasyon ay pininto--o na. Ombayri ya hinalità kona nin Diyos: "Hay ma-i-alalak mo ay lomakè." 19Hin hinalità bayto nin Diyos, hay idad ni Abraham ay magmamagatoyna; maski impalagay na nin agyayna ma-ari̇̀ magka-anak banà ha kato-awan na boy tandà na ya ahè magka-anak hi Sara ay ahè kinomapey ya katetpel na. 20Agna pinagdodawan baytoy impangakò nin Diyos no alwan pinori nay Diyos boy lalò tinomibay ya katetpel na. 21Lobos ya pantotompel na ya kaya nin Diyos nin pangyariyen baytoy pangakò na. 22Banà ha pantotompel ni Abraham ay imbilang nin Diyos nin hi Abraham ay mahampat. 23Hatoy nakaholat ya tongkol koni Abraham ya imbilang nin Diyos nin hiya ay mahampat nin banà ha pantotompel na ay alwan bongat para koni Abraham, 24no alwan para et kontamo. An-ibilang nin Diyos nin hitamo ay mahampat banà ha pantotompel tamo ha Diyos ya namiyay oman koni Pangino--on tamon Hisos. 25Hi Pangino--on Hisos ay inggawà nin Diyos nin mati nin para ha kasalanan tamo, boy biniyay yan oman emen hitamo ay ibilang nin Diyos nin ayin kasalanan.

will be added

X\