ROMA 11

1Hay pastang ko ay ombayri: intakwil wari̇̀ nin Diyos ya tawtawo na? Ahè! Hiko mismo ay Israylita ya inapopò ni Abraham ta lahi̇̀ ako ni Binhamin ya miha ha Aw-israylita. 2Hay Aw-israylita ya pinili̇̀ nin Diyos nin pagtawo na pa-ibat hin hato ay agna intakwil. Wari̇̀ agmoyo tandà baytoy nakaholat ha Kaholatan nin Diyos ya tongkol koni propita Ilyas? Hi Ilyas ay naki-ilgo ha Diyos ta an-iriklamo na ya gawgawà nin Aw-israylita, ya wana, 3"Pangino--on, hay pawpropita mo ay pinatipati la boy hay aw-altar mo ay hinira-hirà la. Ha kaganawan anhomonol komo ay hikon bongat ya natilà boy ampagsikapan la ko et nin patyen." 4Piro ombayri ya intobay nin Diyos koni Ilyas: "Alwa mon mimiha ya anhomonol kongko, ta maski malakè ya anhomamba ha ribolto ni Ba--al ay ma--in et piton libo katawo ya ahè anhomamba bayro, ta an-i-atap ko hila para hila ay pagtawo ko." 5Ombayro et simpri hapa--eg. Ma--in et ongnoy Israylita ya pinili̇̀ nin Diyos ya intilà na banà ha kahampatan ingangalo na konla. 6Pinili̇̀ na hila nin banà ha kahampatan ingangalo na konla, alwan banà ha panggawà la nin kahampatan; ta no banà ha panggawà la nin kahampatan ya pamili̇̀ konla nin Diyos ay agana ka-ilanganen ya kahampatan ingangalo nin Diyos. Piro alwan ombayro. 7Hapa--eg, anya awod ya mahalità tamo ya tongkol bayri? Hay aw-inalalak ni Israyil ya ayin kanayon no alwan Hawhodiyo ay ahè imbilang nin Diyos nin hila ay mahampat maski anhangaren lay mag--in hilan ombayro. Ahè nangyari konla ta banà ha katya--an nin nakem la ay pina-olayan hila nin Diyos. Piro ma--in ongno konla ya pinili̇̀ nin Diyos. Hila baytoy imbilang nin Diyos nin mahampat. 8Ombayri ya nakaholat ha Halità nin Diyos: "Hay nakem la ay pinatyà nin Diyos emen aghila maka-intindi; kayà angga hapa--eg pana--on, maski mabaha la boy malengè lay kaptegan nin Mahampat ya Balità ay agla ma-intindiyan." 9Ha Halità nin Diyos ay ma--in et ombayri ya nakaholat ya hinalità ni Ari̇̀ Dabid ya tongkol konla: "Pangino--on, hay ampahimala--an la ay habayto dayi ya pakahagpan konla. Mali̇̀ ya pangingintindi la ha kawkapanogo--an; kayà habaytoy pamarosawan konla. 10Pareglemen mo dayi ya panenegteg la emen aghila makakit. Padya-dya--an mo hila nin emen pagdya--dyà nin tawoy ampamaba nin pagkabiyat." 11No ombayro awod, anyay mangyari ha Aw-israylita? Toloyan hilayna wari̇̀ itakwil nin Diyos banà ha agla pantompel? Ahè! Banà ha kasalanan ya agla pantompel ay nagkama--in nin kalibriyan ya alwan Hawhodiyo. Ombayroy ginawà nin Diyos emen hay Hawhodiyo ay mipanag-ili̇̀ ha alwan Hawhodiyo emen hila mipantompel nin bilang ha alwan Hawhodiyo. 12Hay kasalanan nin Hawhodiyo ay hay agla pantompel. Banà bayro, hay alwan Hawhodiyo ha maski ayrin dogal ha babon lotà ay nagkama--in nin kahampatan ya ikalibri la ha kasalanan. Piro lano ay malakè ya Hodiyo ya mipantompel; ha mangyari ana bayto ya ombayro ay lalò magkama--in nin kahampatan baytoy alwan Hawhodiyo. 13Habayti itaman ya labay kon halita--en komoyon alwan Hawhodiyo. Hiko ay pinili̇̀ nin Diyos nin mag--in hogò ya mangaral komoyo. Habayti ya ombayri ya sirbisyo ay inggawà kongko nin Diyos; kayà ampangataw-anan kon gaw--en. 14Hay bara--nan nin panggawà ko nin ombayro ay emen mipanag-ili̇̀ ya kawkapara kon Hodiyo. Ha ombayro ay ma--in pag-asan malibri ya ongno konla. 15Hay pangitakwil nin Diyos ha Hawhodiyo ay emen magkama--in nin pamakisondò ha Diyos ya alwan Hawhodiyo. Piro hay Hawhodiyo ay tanggapen oman nin Diyos ta mangoman hilan tompel kona. Habayto ay ahè makwan ihipen ta hay pangyayari konla ay emen ha nikati ya biniyay oman. 16Hay ka-ogali--an tamon Hawhodiyo ay ombayri: ha nilotò ya tinapay ya mihay bekley ya minasay arina ay mihay getget tinapay ya an-igwà tamo ha Diyos. Ombayro man, hay natilà ay ikon et simpri nin Diyos. Hi Abraham ay ka-alimbawa--an nin hatoy mihay getget tinapay boy hay aw-inalalak na ay ka-alimbawa--an nin hatoy natilà ya pinangetgetan. Hi Abraham ay tawo nin Diyos; kayà hay aw-inalalak na ay ikon simpri nin Diyos. Alimbawà itaman ha mihay po--on kayo. Hi Abraham ya kowinta yamot ay ikon nin Diyos; kayà hay aw-inalalak na ya kowinta hawhanga ay ikon simpri nin Diyos. 17Hapa--eg, no pinotoh ya ongno ha hawhangan tanaman ya kayoy olibo ya ayin kanayon no alwan aw-inalalak ni Abraham, ta hikawo ya alwan Hawhodiyo ya kowinta hawhanga nin kayoy olibo ya balang ay intompang nin pabiyayen do ha pinotoy hawhanga nin tanaman ya olibo ay tomibay kawo. Emen kawo ha peteg hawhanga ya ampagkama--in nin yatek ya ampangibat ha yamot. 18Kayà agmoyo pagmalhayan ya Hawhodiyo ya kowinta peteg hawhanga ya pinotoh. Ihipen moyo ya alwan hikawo ya ampambin biyay ha kowinta yamot. Hay yamot ya ampambin biyay komoyo. 19Piro maka ma--in alwan Hawhodiyo ya maghalità nin, "Mas kayin ma-alagà ta pinotoh hila biha hikayi ya intompang." 20Peteg pa bayto, piro kowinta pinotoh hila nin banà ha agla pantompel ha Diyos. Hikawo itaman ay manatili nin banà ha pantotompel moyo. Kayà agmoyo ipagmalhay ya sarili moyo no alwan paka-atap kawo; 21ta maski nin Hawhodiyo ya talagan hanga ay ahè iningaw-enan nin Diyos nin pinotoh ha po--on. Kayà lalò na kawoynan ahè ingaw-enan nin potohen. 22Bayri tamo makit no pangno mangingangalo ya Diyos boy no pangno ya kahigpit nin mamarosa. Mahigpit ya pamarosa na ha Hawhodiyo ya ahè ampipantompel kona. Mahampat ya itaman komoyo no manatili kawo ha kahampatan na, piro no ahè ay potohen na kawo itaman. 23Hay Hawhodiyo ya kowinta hawhanga ya pinotoh nin Diyos ay tanggapen oman nin Diyos no agla patya--en ya nakem la nin ahè tompel kona, ta magawà nin Diyos nin kowinta ma-itompang na hilan oman do ha po--on ya pinamotohan na konla. 24Hikawo ya alwan Hawhodiyo ay kowinta hawhanga nin kayoy olibo ya balang. Pinotoh kawo ha talagan po--on moyo biha ingkambyan intompang nin pabiyayen ha po--on nin peteg tanaman ya olibo. Piro hay Hawhodiyo ya peteg hawhanga ay lalò ma-itompang ha talagan po--on ya pinamotohan konla. 25Pawpatel koy alwan Hawhodiyo, labay kon ipatandà komoyo baytoy ahè pon impatandà hin hato emen hay sarili moyo ay agmoyo ipagmalhay ha Hawhodiyo. Ombayri bayto: ma--in ongno ha aw-inalalak ni Israyil ya ahè pon antompel banà ha katya--an nin nakem la. Piro magkama--in hilan katetpel lano ha mipantompel ana ya kaganawan alwan Hodiyo ya pinili̇̀ nin Diyos. 26Kaganawan inalalak ni Israyil ay mikalibri ta hay nakaholat ha Halità nin Diyos ay ombayri: "Ma--in mangibat ha dogal ya an-ingaten Siyon ya Mapangilibri. Hay Hawhodiyo ya aw-inalalak ni Hakob ay patgenen na ha panggawà nin kala-etan. 27Alihen koy kawkasalanan la ta habayto ay pangakò ko konla ya toparen ko." 28Hay ahè pananggap nin Hawhodiyo ha Mahampat ya Balità ay nag--in hilan ka-away nin Diyos. Banà bayro, hay Mahampat ya Balità ay na-i-aral komoyon alwan Hawhodiyo. Ombayro man, hay Hawhodiyo ya pinili̇̀ nin Diyos ay anlabiyen na banà ha pangakò na hin hato ha kawka-apo-apowan la; 29ta ahè an-omanen nin Diyos ya nakem nan tongkol ha pangakò na konla boy pamili̇̀ na konla nin biyan kahampatan. 30Hin hato, hikawoy alwan Hawhodiyo ay ahè pon ampipantompel ha Diyos. Piro hay ahè pantompel nin Hawhodiyo ay habaytoy paraan nin hikawo ay iningalowan nin Diyos. 31Hikawoy alwan Hawhodiyo ay ma--in hapa--eg nin pantotompel ha Diyos. Hay Hawhodiyo itaman ay malakè ya panhomombalang ha Diyos. Piro no pangno kawo iningalowan nin Diyos ay ombayro hila itaman. Hila ay ingalowan nin Diyos pantompel la kona. 32Pinaptegan nin Diyos ya kaganawan tawo mag--in Hodiyo o alwa ay makasalanan emen na ma-ipatanam konlan kaganawan ya pangingangalo na. 33Hay kahampatan nin Diyos ha kaganawan tawo ay ahè mangaka-oboh, boy hay karonongan na boy tinandà na ay ahè makwan ihipen. Ayin tawoy magtandà no anyay labay gaw--en nin Diyos boy no pangno ya anggomawà. 34Ombayri ya impaholat hin hato nin Diyos: "Wari̇̀ ma--in tawoy magtandà nin pangingihip nin Diyos? Wari̇̀ ma--in ma-ari̇̀ makawawali kona? 35Wari̇̀ ma--in tawoy makab--i ha Diyos nin anyaman ya pamalayan otang ya nakem kona nin Diyos?" 36Piro anhalita--en ko komoyo, hay Diyos ya pinangibatan nin kaganawan, boy hiya ya makapangyayari ha kaganawan. Kaganawan ay pinalsa nin Diyos emen kaganawan ay mamori kona. Amin.

will be added

X\