IMPATNAG 22

1Hapa--eg hay lanom nin balah ya ampakab--in biyay ya ayin anggawan ay impakit et kongko nin hatoy anghil. Habaytoy lanom ya emen kalinaw kristal ay ampangibat do ha trono nin Diyos ya trono simpri nin hatoy Oybon Topa. 2Habayto ya lanom ay ampan-agoh ha botlay kalsara nin siyodad. Ha mitaligmang nin habaytoy lanom ya ampan-agoh ay bayro makit ya po--on kayoy ampakab--in biyay ya ayin anggawan. Ampamonga bayto boy balang bowan ay kahalakoy klasin an-ibonga. Hay bawbolong nin habaytoy kayo ay tambal ya makapakahampat mawmasakit nin tawtawo ha nawnasyon. 3Ha siyodad ya habayto ay ayin makit ya ahè labay nin Diyos, hatoy maski anyay kala-etan. Anti bayro ya trono nin Diyos ya trono et simpri nin hatoy Oybon Topa. Ha siyodad et ya habayto, hay Diyos ay anhambawan nin mawmagsisirbi na. 4Hay lopa na ay makit la boy hay ngalan na ay nakaholat ha waweng la. 5Bayro ay ahè anyomabi boy alwan ka-ilangan bayro ya kingki o hilà nin allo, ta hay mismon hawang la ay Pangino--on Diyos; boy kateng hila ya magsisirbi ay mamo--on anggan makakanoman. 6Hapa--eg, hinalità kongko nin hatoy anghil, "Habayti ya hawhalità ya angkalengè mo ay ma-asawan boy peteg. Hay Pangino--on Diyos ya nangihogò nin Ispirito na ha pawpropita na hin hato ay hiya et ya nangihogò ha anghil na nin mako ha tawtawoy mawmagsisirbi na ta ipatandà konla ya bawbagay ya maraninan mangyari." 7Hinalità ni Apo Hisos, ya wana, "Manlengè kawo! Hiko ay tampol anan lomateng! Makalmà ya ampipanhomonol ha hawhalità ko ya nakaholat ha libroy habayti ya mipatnag ya maraninan mangyari." 8Hiko hi Howan ya nakalengè boy nakakit nin habayti ya bawbagay ya nakaholat bayri. Hin nalengè ko boy nakit bayto ay nanlokob akon homamba do ha anghil ya nangipakit kongko nin habaytoy bawbagay. 9Piro hina--ad na ko, ya wana, "Agmo ko hambawan, ta hiko ay kapariho mon magsisirbi, boy emen ha pawpropitay pawpatel mo ha Pangino--on, boy ha kaganawan ampipanhomonol ha nakaholat ha impatnag nin habayti ya libro. Diyos ya hambawan mo!" 10Hinalità na et kongko, "Habayti ya impatnag komoy hawhalità ya nakaholat bayri ay agmo gaw--en sikrito ta maraninan mangyari. 11Hay mala--et ay somigin magpakala--et boy hay maremek ay somigin magpakaremek. Hay mahampat ay somigin magpakahampat boy hay ayin kapintasan ay somigi ha pag--in ayin kapintasan." 12"Manlengè kawo," wani Apo Hisos. "Hiko ay tampol anan lomateng! Balang miha ay primyowan ko kompormi ha ginawà na. 13Biha nagkama--in kaganawan bagay, hiko ay hikoyna. Ayin akon pinangibatan boy ayin anggawan." 14Hapa--eg ay makalmà ya tawtawoy naglinis nin holot, ta binyan hilan karapatan ha po--on kayoy ampakab--in biyay boy karapatan lomo--ob ha pawpolta nin habaytoy siyodad. 15Piro hay tawtawoy ahè angkareng--ey nin manggawà kala-etan, mawmagkokolam, mawmapamabayi boy mawmamakilalaki, mawmamatin tawo, mawmanhomamba ha alwan peteg diyos, boy kaganawan ampipangitorò boy ampipanggawà nin ayin kaptegan ay do hila ha likol nin habaytoy siyodad. 16"Hiko hi Hisos ay nangihogò nin anghil ko komo, Howan, ta habayti ay ibalità mo ha gawgropon mangama--in katetpel kongko. Hiko ay inalalak ni Dabid ya ari̇̀ hin hato. Hiko ya an-ingaten kabontatalà ya mahawang." 17Hay Ispirito nin Diyos kateng hatoy kakahal nin Oybon Topa ay ampanagyat. "Mako ka bayri," wanla. Kaganawan makalengè nin habayti ya hagyat ay maghalità simpri nin, "Mako ka bayri." Hinoman komoyo ya angka-angan ay mako bayri; hay malabay ay minom nin lanom ya ampakab--in biyay ya ayin anggawan. Habayto ay ayin bayad nin igwà kona. 18Hiko hi Howan. Hinoman ya nakalengè nin habayti ya impatnag kongko ya nakaholat bayri ha libro ay an-ihigpit kon halita--en kona ya hay mamahan ha nakaholat ha libroy habayti ay pahanan ya kaparosawan na. Hay kaparosawan ya ipahan kona nin Diyos ay bilang ombayri ha kadya-dya--an ya nakaholat ha libroy habayti. 19Hay mamaw--ah itaman nin anyaman ya nakaholat ha libroy habayti ya mipatnag ya maraninan mangyari ay alihen kona nin Diyos ya karapatan nan magkama--in parti ha po--on kayoy ampakab--in biyay ya ayin anggawan, boy karapatan nan pa-iri ha masagradoy siyodad ya ingkowinto ha libroy habayti. 20Hi Pangino--on Hisos ya ampamapteg nin habayti ya bawbagay ay naghalità, ya wana, "Talagan tampol akoynan lomateng!" Hiko hi Howan ay tinombay, ya wangko, "Amin. Pangino--on Hisos! Lomateng kayna!" 21Hi Pangino--on Hisos ay mangingangalo dayin mambin kahampatan ha kaganawan nag--in tawtawo nin Diyos. Amin.

will be added

X\