IMPATNAG 21

1Hapa--eg, nakit koy bayoy langit boy bayoy lotà ta hatoy primiron langit boy primiron lotà ay napanew ana boy kateng dagat ay ayin ana. 2Nakit ko ya masagradoy siyodad ya ayin kanayon no alwan hay nangibat ha Diyos ya bayoy Hirosalim ya ampag-aypà ya nangibat ha katatag-ayan ha kama-inan nin Diyos. Habaytoy siyodad ay emen ha ikakahal ya babayi ya nakaholot nin pagkaganda ta handà homakbat ha lalaki ya pagkakahal na. 3Hapa--eg, ma--in akon nalengè ya pagkahokaw nin bosis ya ampangibat ha trono, ya wana, "Hapa--eg hay Diyos ay pa-iri ana ha tawtawo. Pa-iri yaynan kalamo la ta hila ay pagtawo nayna. Hay mismon Diyos ay makalamo layna nin pirmiyan boy hiya ay mag--in Diyos la. 4Ponahan nay lawlowà la, ayin anan kamatyan, ayin anan kalele--an, ayin anan man-angaw, boy ayin anan tanamen ya hakit ta hay kaganawan bagay hin hato ay nalabah ana." 5Hapa--eg hatoy naka-iknò ha trono ay naghalità, ya wana, "Hapa--eg ay bayowen koy kaganawan bagay!" Hinalità na et kongko, "Iholat mo bayti ya malengè mo, ta habayti ya hawhalità ay ma-asawan boy peteg." 6Ombayri et ya hinalità na kongko: "Kaganawan bagay ay nayari̇̀ ana. Biha nagkama--in nin kaganawan bagay, hiko ay hikoyna. Ayin akon pinangibatan boy ayin anggawan. Hinoman ya angka-angan ay pa-inomen ko nin anhombol ya lanom ya ampakab--in biyay ya ayin anggawan boy agko ipabayaran kona. 7Habayto ay tanggapen nin hatoy ma--in pananalo. Hiko ay pagDiyos la boy hila itaman ay pag-anak ko. 8Piro ka-i-ingaloy mangyari ha mangatalaw ya ayin pamahimalà ha Diyos, alwan tapat, mapanggawà ka-alayan, mapamatin tawo, mamakilalaki o mamabayi, mawmagkokolam, mawmapanhomamba ha alwan peteg diyos, boy kaganawan mangabongkok. Hila ay igwà ha manliyobliyob ya deket nin apoy asopri ya emen kalawang dagat. Habaytoy ikalwan kamatyan." 9Hapa--eg, ma--in pitoy anghil ya balang miha konla ay ma--in gitan ya yawong ya hay laman nin balang yawong ay kalalampohan pawpamadya--dyà. Miha do ha pitoy anghil ay napakarani kongko ta naghalità, ya wana, "Mako ka bayri ta ipakit ko komo ya kakahal nin hatoy Oybon Topa." 10Ha panggogomawà nin Ispirito nin Diyos, habaytoy anghil ay nantan kongko ha malhay ya pagkatatag--ay bakil. Impakit na kongko ya masagradoy siyodad ya ayin kanayon no alwan Hirosalim ya ampag-aypà nin nangibat ha Diyos ha katatag-ayan ha kama-inan na. 11Habaytoy siyodad ay angkahawangan nin kagandawan nin Diyos. Hay kahawangan ay emen pinakama-alagà ya bato ya an-ingaten haspi ya emen kalinaw kristal. 12Habayto ay ma--in alal ya padir ya pagkatatag--ay boy ma--in labinloway polta ya ha balang polta ay ma--in ampagbantay ya anghil nin Diyos. Hay nakaholat ha pawpolta ay ngawngalan nin labinloway anak ni Israyil. 13Ha balang hampad nin padir ay ma--in tatloy polta. Tatloy polta ha padir ha bandan baytan, tatlo ha bandan mayanan, tatlo ha bandan bagatan, boy tatlo ha bandan babà. 14Hay padir ya alal nin habaytoy siyodad ay nakapondasyon nin labinloway bato ya mangalhay. Bayro ha pondasyon ay nakaholat ya ngawngalan nin labinloway hogò nin hatoy Oybon Topa. 15Hatoy anghil ya nag-ilgo kongko ay ma--in gitan ya mitroy hohokat ya gintò ya panokat nin habaytoy siyodad kateng pawpolta boy pawpadir nin habayto. 16Habaytoy siyodad ay kowadrado. No pangnoy karà ay ombayroy lawang. Hinokat nin hatoy anghil baytoy siyodad. Hay karà boy lawang ay lowan libo boy apat gato (2,400) ya kilomitro; ombayro et ya hokat nin patag--ay. 17Hinokat na et ya padir. Habayto ay anemapò boy limay (65) mitro ya tag--ay. Habaytoy hohokat ya ginamit nin hatoy anghil ay emen hohokat ya anggamiten nin tawo. 18Hay alal ya padir ay yari̇̀ ha ma-alagà ya bawbato ya an-ingaten haspi, boy hay siyodad ay yari̇̀ ha gintò ya emen kalinaw salaming. 19Hay pawpondasyon nin habaytoy alal ya padir ay na-adornowan nin kaganawan klasin manga-alagà ya bato. Hay primiron pondasyon ay bato ya an-ingaten haspi; hay ikalwa ay batoy sapiro; hay ikatlo ay batoy kalsidonya; hay ika-apat ay batoy ismiralda; 20hay ikalima ay batoy onisi; hay ika-anem ay batoy kornalina; hay ikapito ay batoy krisolito; hay ikawalo ay batoy birilo; hay ikasiyam ay batoy topasyo; hay ikamapò ay batoy krisopraso; hay ikalabimmiha ay batoy hasinto; boy hay ikalabinlowa ay batoy amatista. 21Hay labinloway polta ay pawpirlas ta balang mihay polta ay yari̇̀ ha mimihay pirlas. Hay daan bayro ha siyodad ay yari̇̀ ha gintò ya emen kalinaw salaming. 22Na-asikaso ko ya bayro ha siyodad ay ayin bali nin Diyos ya paghambawan, ta hay bali nin Diyos bayro ay mismon Pangino--on Diyos ya Pinakamakapangyariyan boy hatoy Oybon Topa. 23Alwaynan ka-ilangan bayro ha siyodad ya hawang nin allo o bowan, ta hay anhomawang bayro ay mismon kagandawan nin Diyos boy hatoy Oybon Topa ya hawang bayro. 24Hay nawnasyon ay mahawangan nin habaytoy siyodad, boy hay aw-ari̇̀ ha babon lotà ay gitan lay kagandawan la bayro ha siyodad. 25Hay pawpolta nin habaytoy siyodad ay manatilin nakalo--at ta ahè magkama--in bayro nin yabi. 26Hay kagandawan boy karangalan nin nawnasyon ha babon lotà ay gitan ha siyodad ya habayto. 27Piro ahè payagan pomahok bayro ya anyaman ya mala--et, o tawoy anggomawà nin ikareng--ey, o tawoy ampagtotol nin kabongkokan. Hay makapahok bongat bayro ay hatoy tawtawo ya hay ngawngalan la ay nakaholat ha libro nin hatoy Oybon Topa, hatoy libro ya an-ingaten libro nin biyay. Bayro nakaholat ya ngawngalan nin tawtawoy binyan biyay ya ayin anggawan.

will be added

X\