PILIPOS 4

1Anlabiyen kon pawpatel ya angkalengewan ko, hikawo ya kaligawan ko boy primyo ko ha panggogomawà ko. Panatiliyen moyo nin hikawo ay matibay ha Pangino--on. 2Andawaten ko komoyo, Iyodiya boy Sintiki, ya misondò kawoyna ta hikawo ay mipatel ha Pangino--on. 3An-ipaki-ilgo ko komo, tapat kon kalamo, tambayan mo bayti ya loway babayi ta hila ay kalamo kon nagpagal nin nangibahwag nin Mahampat ya Balità. Kalamo nawen hi Kliminti boy kanayon et ya kawkalamowan ko ya hay ngawngalan ay nakaholat ha libro nin Diyos. Bayro nakaholat ya ngawngalan nin tawtawoy ma--in biyay ya ayin anggawan ya bilang biyay nin Diyos. 4Pirmi kawon magtowà ha Pangino--on. Anhalita--en kon oman komoyo ya magtowà kawo. 5Ipakit moyoy kahampatan nakem moyo ha kaganawan tawo. Hay Pangino--on ay marani anan lomateng. 6Agkawo magolo nin tongkol ha anyaman ya bagay, no alwan ha panalangin moyo ay awoken moyo ha Diyos ya kaganawan panganga-ilangan moyo nin ma--in lamoy pasasalamat. 7No ombayri ya gaw--en moyo, Diyos ya ampambin katinekan ya ahè makwan intindiyen nin tawo ay hiyay mambin katinekan nin nakem boy pangingihip moyo banà ha pamakilamo moyo koni Pangino--on Hisokristo. 8Hapa--eg, pawpatel ko, hay kalampohan kon halita--en komoyo bayri ha holat ko ay ihipen moyoy anyaman ya bagay ya pinakamahampat boy kaporipori. Ihipen moyo et ya bawbagay ya kaptegan, matampà, matoynong, malinis, kalabaylabay, boy kagalanggalang. 9Gaw--en moyoy kaganawan bagay ya natotowan moyo kongko, kateng hatoy tinanggap, nalengè, boy nakit moyo kongko. Ha ombayro ay anti komoyo ya Diyos ya ampambi nin katinekan. 10Masyadoy kaligawan ko ha Pangino--on ta hapa--eg ha nalabah ya malakè ya pana--on ay lalò kon natanam ya pangimalasakit moyo kongko. Tandà ko ya agmoyo ko anliwawan. Kayà bongat ay ayin kawon mapangipagtanan nin itambay moyo kongko. 11Agko anhalita--en bayti nin banà ta ampagkakolang ako, ta natotowan ko nin mag--in akon kontinto ha anyaman ya kapapa-hal ko. 12Naranasan ko ya ka-irapan boy ka-inomayan. Ha anyaman ya kapapa-hal ya an-arapen ko ay natotowan kon mag--in kontinto, bohoy ako man o mabitil, ka-inomayan man o ka-irapan. 13Maski anyay kapapa-hal ko ay ma--in akon kakhawan nin gomawà nin anyaman ya bagay, ta hi Pangino--on Hisokristo ya ampamakhaw kongko. 14Ombayro man ay mahampat ya pamakiramay moyo kongko ha pagdanas ko nin kadya-dya--an. 15Mismon hikawoy tawtaga Pilipos ya magtandà nin hin nog-alih ako ha Masidonya ta ompisawan ko nin i-aral ya Mahampat ya Balità, ha kaganawan gropon mangama--in katetpel ha Pangino--on ay hikawon bongat ya nambi kongko nin tambay. 16Maski hin anti koyna ha siyodad nin Tisalonika ay alwan bongat miminghan moyo kon pinagtanan nin tambay. 17Alwan ha labay kon mananggap nin igwà moyo kongko, ta hay talagan an-ikaliga ko ay hay kapakinabangan ya tanggapen moyo nin banà ha panggawà moyon kahampatan. 18Anti ana kongkoy kaganawan ka-ilangan ko boy mas et ha angka-ilanganen ko. Nag--in akon bastanti banà ha impagtan moyo ya gintan kongko ni Ipaprodito. Habayti ya impagtan moyo nin para ha Pangino--on ay bilang bangoh ya labaylabay nan tanggapen boy ampakapakonsowilo kona. 19Ha ahè mangaka-oboh ya kayamanan nin Diyos ay igwà na komoyo ya kaganawan angka-ilanganen moyo nin banà ha pamakilamo moyo koni Pangino--on Hisokristo. 20Hay Tatay tamoy Diyos ay poriyen nin ayin angga. Amin. 21I-abot moyo ya pangongomosta nawen ha kaganawan ampipantompel koni Pangino--on Hisokristo, hatoy nag--in tawtawo nin Diyos. Hay kalamo koy pawpatel bayri ay ampangomosta komoyo. 22Kaganawan anti bayri ya nag--in tawtawo nin Diyos ay ampangomosta komoyo, lalo-lalò ana bayti ya ampipagtrabaho ha palasyo nin pinakapo--on ya an-ingaten Sisar. 23Hi Pangino--on Hisokristo ay mangingangalo dayin mambi nin kahampatan komoyon kaganawan.

will be added

X\