MATIYO 8

1Hi Apo Hisos ay nilomohan bayro ha bakil boy anhonowen yan malakè ya tawo. 2Hapa--eg, ma--in napakarani konay mihay tawoy ma--in liproso ta nanalimokod ha arapan na nin naghalità, ya wana, "Apo, no kalabayan mo ay mapakahampat mo bayti ya masakit ko emen lominis ya nawini ko." 3Impaktang ni Apo Hisos ya gamet na ta inaptoh na baytoy lalaki boy hinalità na kona, "Labay ko," wana; "kayà lominis ka." Antimano, hay liproso na ay na-alih. 4Hapa--eg, hinalità kona ni Apo Hisos, "Habayti ya nangyari komo," wana, "ay agmo ibalità ha maski hino, no alwan mako ka ha parì ta ipakit moy nawini mo ya ayin anan masakit. Mantan kan idolog mo ha Diyos nin bilang ombayro ha impanogò ni Moysis hin hato ya mamapteg ha tawtawo ya hika ay hinomampat ana." 5Hin ni-abot hi Apo Hisos ha banowan Kapirnawom ay hinakbat ya nin mihay kapitan nin hondalò ya taga Roma, ta naki-i-ingalo ya koni Apo Hisos nin patambay. 6"Apo," wana, "hay alilà ko ay masyadon angka-irapan nin banà ha masakit na. Agya maka-ibangon ta agna ma-igalaw ya nawini na." 7Hinalità kona ni Apo Hisos, "Mako ko bayro," wana, "ta pakahampaten ko ya." 8Piro tinombay kona baytoy kapitan, "Apo," wana, "hiko ay alwan karapatdapat nin mamalako komo ha bali ko. Halita--en mon bongat ya homampat ya alilà ko ay homampat ya. 9Hiko man ay anti ha hilong kapangyariyan nin ampakatag--ay kongko nin katongkolan. Ma--in ako itaman nin hawhondalò ya anti ha hilong kapangyariyan ko. No halita--en ko ha miha ya, 'Manigè,' ay manigè ya; no halita--en ko ha miha ya, 'Mako ka bayri,' ay mako ya; boy no halita--en ko ha alilà ko ya, 'Gaw--en mo bayti,' ay gaw--en na." 10Hin nalengè bayti ni Apo Hisos ay nag-ispanta ya boy hinalità na do ha tawtawoy anhomono kona, "Anhalita--en ko komoyo," wana, "ha aw-inalalak ni Israyil, ni miha ay ayin ako et nakit ya ombayri ya katetpel. 11Habayti et ya halita--en ko komoyo: malakè ya alwan Hodiyo ya ma-ibat ha kaganawan dogal ay domoyong ha lamisawan kalamo ni Abraham, Isak, boy Hakob ha dogal ya ampag-ari--an nin Diyos. 12Piro hay Hawhodiyo ya dapat nin anti ha dogal ya ampag-ari--an nin Diyos, kalak--an konla ay itapon ha likol ha dogal ya pagkareglem. Bayro hila mi-anggaw-angaw boy manget--et nin ngipen la banà ha tanamen lay dya--dyà." 13Hapa--eg, hinalità ni Apo Hisos do ha kapitan, "Morong kayna," wana. "Banà ha katetpel mo ay mangyari ya andawaten mo." Habayto et oras ay hinomampat baytoy ampagmasakit ya alilà nin hatoy kapitan. 14Hapa--eg hili Apo Hisos ay nako ha bali ni Pidro. Bayro ay nakit nay babayi ya ampò ni Simon Pidro ya naka-irà ta an-amoten. 15Inoligtanan ni Apo Hisos ya gamet nin hatoy ampò ni Pidro; kayà natbahan ya. Hapa--eg, nibangon ya boy dinolotan na hili Apo Hisos nin pamamangan. 16Hin mahilem ana, hay malakè ya tawoy pinahokan dawdimonyo ay gintan la koni Apo Hisos. Ha halità bongat ni Apo Hisos ay nog-alih baytoy dawdimonyo, boy pinakahampat nay kaganawan ampagmasakit. 17Habayti ya ginawà ni Apo Hisos ay nagkapeteg baytoy holà ni propita Isayas ya ombayri ya pagkahalità: "Hiyay namakahampat nin mawmasakit tamo boy inalih nay dawdipirinsya tamo." 18Hin na-asikaso ni Apo Hisos ya sigisigi ya panlomakè nin tawtawo ha mamalibot na ay hinalità na ha aw-alagad na ya lomipay hila nin mako ha kagmang dagat. 19Hapa--eg mihay mangitorò nin kawkapanogo--an ay napakarani koni Apo Hisos ta naghalità, "Apo," wana, "makilamo ko komo maski ayri ka mako." 20Hinalità kona ni Apo Hisos, ya wana, "Maski nin aw-ayop ya bilang ha lamiran ay ma--in lobot ya ampa-iriyan, boy hay mawmanokmanok ay ma--in ampa-i-aponan; piro hiko ya an-ingaten Anak nin Tawo ay ayin sarilin pa-iriyan ya pama-inawawan bayri ha babon lotà." 21Hapa--eg, miha et ha ampipantompel koni Apo Hisos ay napakarani kona ta naghalità, "Apo," wana, "payagan mo ko pon nin morong emen ko ma-ipatabon ya tatay ko." 22Piro hinalità kona ni Apo Hisos, "Makilamo kayna kongko hapa--eg," wana, "ta hay nati ay pa-olayan mon itabon nin tawtawoy ayin biyay ya ayin anggawan." 23Hapa--eg hi Apo Hisos ay hinomakay ana ha bangkà boy hinomonoyna itaman hinomakay ya aw-alagad na ta lomipay hilayna. 24Mintras anlomipay hila ay biglà hinomkaw ya angin ta namagyo; hay bangkà la ay angkapalamnan nin lanom ta angkahipwakan nin malhay ya dawoyon, piro hi Apo Hisos ay angkatoloy. 25Hapa--eg, pinakaraniyan ya nin aw-alagad na ta pinokaw la ya, "Pangino--on," wanla, "ilibri mo kayi ta anlomdeg tamoyna." 26Piro tinombay konla hi Apo Hisos, ya wana, "Antà masyado kawon angkalimo? Warì agkawo antompel kongko?" Hapa--eg, nibangon ya ta minandawan nan tonggen baytoy pagkahokaw angin boy dawdawoyon. Kayà tinonggen ya angin boy hay dagat ay tinominek. 27Hay aw-alagad na ay nag-ispanta, ya wanla, "Anyan magkatawowan bayti ta maski angin boy dawoyon ay anhomonol kona?" 28Hin ni-abot hili Apo Hisos ha lipay dagat ha dogal nin tawtawoy Gadarino ay hinakbat yan loway lalaki ya pinahokan nin dawdimonyo. Hila ay ampa-iri ha kawkowibay panabonan boy masyado hilan mabayani; kayà ayin makaregdeg nin magdaan bayro. 29Hapa--eg, nambo-angaw hila, ya wanla, "Hika ya Anak nin Diyos, antà ampaki-emenan mo kayi? Nako ka nayì bayri para pa-irapan kayi nin ayin et ha pana--on?" 30Hapa--eg, bayro ha dani la ay ma--in malakè ya baboy ya ampipamokibok. 31Habaytoy dawdimonyo ya anti bayro ha loway lalaki ay naki-i-ingalo koni Apo Hisos, ya wanla, "No pa-alihen mo kayi ay palakwen mo kayi awod bahen ha bawbaboy." 32"Sigi, mako kawoyna," wani Apo Hisos konla; kayà nog-alih hila ta nako hilan pinomahok ha bawbaboy. Hatoy bawbaboy ya pinahokan nin dawdimonyo ay nipampowayon nagpalako ha bongaw anggan nipadiritson narabò ha dagat. Bayro hila nati nin nalemeh. 33Hapa--eg hay ampipangalagà nin hatoy bawbaboy ay nipampowayon nako ha banowa, ta imbalità lay pawpangyayari kateng hatoy nangyari do ha loway tawo ya pinahokan pon nin dawdimonyo. 34Kayà hay tawtawo bayro ha banowa ya nakalengè nin habayto ay nakon hinomakbat koni Apo Hisos, boy naki-i-ingalo hila kona nin mog-alih ya bayro ha dogal la.

will be added

X\