MATIYO 7

1Hinalità ni Apo Hisos, ya wana, "Agkawo manosga emen agkawo hosgawan, 2ta no anyay ihosga moyo ha kanayon ay ombayroy ihosga komoyo. No pangno kalakè ya an-ihosga moyo ha kanayon ay ombayro itaman kalakè ya ihosga komoyo nin Diyos. 3Hika ya ampanosga, antà angka-asikaso moy kasalanan nin kapara mo ya bilang kayamò nin poling ya anti ha mata na, balè ta agmo angka-asikaso ya sarili mon kasalanan ya bilang kalapad nin tapi̇̀ ya anti ha sarili mon mata? 4Pangno ka ampakaregdeg nin maghalità ha kapara mo nin, 'Alihen koy poling ha mata mo,' no ma--in malapad ya tapi̇̀ ha sarili mon mata? 5Hikay magkakanwari̇̀, alihen mo pon ya malapad ya tapi̇̀ ha sarili mon mata emen mo makit nin mahampat ya pangalih nin poling ha mata nin kapara mo. 6"Hay kaptegan ya tongkol ha Diyos ay agmoyo itorò do ha ahè malabay; ta no gaw--en moyo bayto ay bilang kawon ampambi nin manga-alagà ya bawbagay ha aw-aho ya magbira nin mangayat komoyo, boy bilang kawon ampangitapon pawpirlas ha bawbaboy ya ampanyabok bongat nin habaytoy pawpirlas." 7Ombayri et ya hinalità ni Apo Hisos: "Agkawo tonggen manalangin emen moyo matanggap ya an-ipanalangin moyo; agkawo tonggen makirawat emen kawo biyan nin andawaten moyo; agkawo tonggen mangingat ha Diyos emen na kawo tobayen. 8Hinoman ya ampanalangin ay makatanggap, hinoman ya ampakirawat ay biyan, boy hinoman ya ampangingat ha Diyos ay tobayen. 9Hinoman komoyon tawtatay, biyan mo wari̇̀ bato ya anak mo no makikwa yan pamamangan komo? 10O biyan mo ya wari̇̀ nin otan no makikwa yan konà komo? 11Hikawo, maski mala--et ya ogali̇̀ moyo ay tandà moyon mambi nin mahampat ya bawbagay ha aw-anak moyo. Lalò anay Tatay moyoy Diyos ya anti ha katatag-ayan ha kama-inan na ay mambin mangahampat ya bawbagay ha ampakikwa kona. 12"No anyay labay moyon gaw--en komoyo nin kanayon ay ombayro itaman ya gaw--en moyo. Ha ombayri ay mageperan moyo ya kawkapanogo--an ya inggawà ni Moysis kateng hinolat nin pawpropita." 13"Pomahok kawo ha makpit ya pinagkapolta emen agkawo miparaan ha malawang ya pinagkapolta, ta hay lakwen nin habaytoy malawang ya pinagkapolta ay impirno. Banà ta maparan pagdanan bayto ay malakè ya ampagdaan bayro. 14Piro banà ta hay pinagkapolta nin magpalako ha katatag-ayan ha kama-inan nin Diyos ay makpit boy ma-irap pagdanan ay a-amò ya ampagdaan bayro." 15"Mag-atap kawo ha ampipanorò nin alwan peteg ta hila ay ampagkakanwari̇̀ nin ma-amò ya tawtopa ya pakarani komoyo, piro hay nakem la ay emen nakem tigri. 16No pangno moyo angkabalayan ya po--on kayo no makit moyoy bonga ay ombayro moyo hila mabalayan ha gawgawà la. Wari̇̀ hay bilang kinew ya madowih ay ampamonga nin obas o hay kinew ya bilang kokomposà ay ampamonga nin igos? 17- 18Hay po--on kayo ya ayin dipirinsya ay maganday bonga boy ahè mamonga nin ayin kowinta. Piro hay po--on kayoy ma--in dipirinsya ay ayin kowintay bonga boy ahè mamonga nin maganda. 19Hay po--on kayoy ampamonga nin ayin kowinta ay anto-alen ta itapon ha apoy. 20Ombayro itaman baytoy ampipanorò nin alwan peteg ta angkabalayan hila nin banà ha kala-etan gawgawà la." 21Hinalità et ni Apo Hisos, ya wana, "Alwan kaganawan tawo ya ampangingat kongko nin, 'Pangino--on, Pangino--on,' ay makalako ha dogal ya ampag-ari--an nin Diyos, no alwan haton bongat ya anggomawà kalabayan nin Tatay ko ya anti ha katatag-ayan ha kama-inan na. 22Ha allon panonosga ay malakè ya maghalità kongko nin, 'Pangino--on, Pangino--on, ngalan moy ginamit nawen ha pangangaral boy ha pama-alih nin dawdimonyo kateng ha panggawà nawen nin malakè ya papag-ispantawan.' 23Piro hay itobay ko konla ay ombayri: 'Agkatawo balay. Pakarayò kawo kongko ta hay la--et nin gawgawà moyo.' " 24Ombayri et ya hinalità ni Apo Hisos: "Hinoman ya ampanlengè ha hawhalità ko boy anhonolen na ay bilang ya ha tawoy maronong ya nangipa-ireng nin bali ya hay pinangipondasyonan nin tawtarek ay matibay ya bato. 25Maski nangoran nin makhaw, nanlanab, boy namagyo ay ahè na-aybà baytoy bali na ta matibay ya batoy pinangipondasyonan nin tawtarek. 26Hinoman ya ampakalengè nin hawhalità ko, piro agna anhonolen ay bilang ya ha tawoy tangah ya nangipa-ireng nin bali ha kapati--an. 27Hin nangoran nin makhaw, nanlanab, boy namagyo ay natomban nangawawatak baytoy bali na." 28Hin nayari̇̀ naghalità hi Apo Hisos ay nipag-ispanta baytoy kalak--an tawo, 29ta hay panonorò na ay alwan bilang panonorò nin mawmangitorò nin kawkapanogo--an. Ha panonorò na ay talagan ma--in yan kapangyariyan.

will be added

X\