MATIYO 6

1Hinalità et ni Apo Hisos, "Agkawo," wana, "manggawà kahampatan ha tegteg bongat nin tawtawo, ta no ombayro ya gaw--en moyo ay agmoyo matanggap ya iprimyo komoyo nin Tatay tamoy Diyos ya anti ha katatag-ayan ha kama-inan na. 2"Kayà no ampambi ka ha tawoy ampanga-ilangan ay agmoyna ibo-angaw ya pambi mo nin bilang ha anggaw--en nin mawmagkakanwarì. No ampambi hila ay an-ibo-angaw la ha lo--ob himba--an nin Hawhodiyo boy ha balang daan, ta ampapori hila ha tawtawo. Anhalita--en ko komoyo, tinanggap laynay pamomori nin tawo; kayà ayin hilaynan matanggap ya primyo ya mangibat ha Diyos. 3No manambay ka ha manga-irap ay isikrito moy pambi mo nin ahè matanda--an nin maski hinoy mahene ya amigo mo emen ma--in kan matanggap ya primyo ya mangibat ha Tatay tamoy Diyos ya ampakatandà nin kaganawan." 5"No manalangin kawo ay agmoyo gaw--en ya bilang ha anggaw--en nin mawmagkakanwarì ya labaylabay mireng nin manalangin ha lo--ob himba--an nin Hawhodiyo boy ha kawkanto nin dawdaan emen hila makit nin tawtawo. Anhalita--en ko komoyo, tinanggap laynay pamomori nin tawo; kayà ayin hilaynan matanggap ya primyo ya mangibat ha Diyos. 6Piro no manalangin ka ay agmo gaw--en para makit kan bongat nin tawo, no alwan mako ka ha dogal ya ayin makatoksò komo ta manalangin ka ha Tatay tamoy Diyos ya ahè angkakit. Hay Tatay tamoy Diyos ya ampakatandà nin kaganawan anggaw--en mon sikrito ya mambi komon primyo. 7"Ha panalangin moyo ay agmoyo pi-oman-oman ya panggamit nin halità ya ayin labay totolen nin bilang ha anggaw--en nin tawtawoy ayin pantotompel ha Diyos, ta an-ihipen la ya leng--en hila nin Diyos banà ha kakara--an panalangin la. 8Agkawo manowad konla, ta biha kawo makirawat ha Tatay tamo ay da--an naynan tandà ya angka-ilanganen moyo. 9Ombayri ya dapat nin panalangin moyo: 'Tatay nawen ya anti ha katatag-ayan ha kama-inan mo, hay ngalan mo ya ayin kapintasan ay igalang dayi nin kaganawan. 10Andawaten nawen ya tampol ana dayin lomateng ya pamomo--on mo. Mangyari dayi ya kalabayan mo bayri ha babon lotà bilang ombayro ha katatag-ayan ha kama-inan mo. 11Biyan mo kayin pamamangan ha allo-allo. 12Patawaren mo kayi ha kawkasalanan nawen bilang pamatawad nawen ha nakapagkasalanan konnawen. 13Agmo kayi biyan mabiyat ya panobok boy ipakarayò mo kayi koni Satanas.' 14Ha ombayro, no mamatawad kawo," wani Apo Hisos, "ha nipagkasalanan komoyo ay patawaren kawo itaman nin Tatay tamoy Diyos ya anti ha katatag-ayan ha kama-inan na. 15Piro no agkawo mamatawad, hay nagawà moyoy kawkasalanan ay ahè itaman patawaren nin Tatay tamoy Diyos ya anti ha katatag-ayan ha kama-inan na." 16"Tongkol ha pagpalta moyon mangan ta ma--in kawon an-ipanalangin ay agmoyo towaren baytoy mawmagkakanwarì ya ansadya--en lan palele--en boy papotla--en ya lopa la emen la ma-ipatandà ya hila ay ampangpaltan mangan. Anhalita--en ko komoyo: tinanggap laynay pamomori nin tawo; kayà ayin hilaynan matanggap ya primyo ya mangibat ha Diyos. 17No ampagpalta kan mangan ta ma--in kan an-ipanalangin ay olamehan moy lopa mo boy ayosen moy habot mo 18emen ahè matanda--an nin kanayon ya hika ay ampagpaltan mangan ta ma--in kan an-ipanalangin. Hay makatandà bongat ay Tatay tamoy Diyos ya ahè angkakit. Hiyay ampakatandà nin kaganawan sikrito, boy hika ay ma--in matanggap ya primyo ya mangibat kona." 19Hinalità et ni Apo Hisos ya ombayri: "Bayri ha babon lotà ay agkawo manipon nin kayamanan ya anhira--en nin anag boy angkalawangen, boy anlo-oban nin takawen, 20no alwan hay tiponen moyoy kayamanan ya para ha katatag-ayan ha kama-inan nin Diyos ay gawgawà ya mangahampat ta ahè an-anagen, ahè angkalawangen, boy ahè angkatakaw. 21No hay kayamanan mo ay anti ha babon lotà o anti ha katatag-ayan ha kama-inan nin Diyos ay bayro ya ihip mo." 22Hinalità et ni Apo Hisos, ya wana, "Hay mata mo ay pinagkahilag nin nawini mo. No ayin dipirinsya ya mata mo ay makit moy kaganawan; 23piro no ma--in dipirinsya ya mata mo ay mareglem ya tegteg mo. Ombayro itaman ha pangingihip mo. No hay ihip mo ay mahampat, hay gawgawà mo ay panay kahampatan; piro no hay ihip mo ay alwan mahampat, hay gawgawà mo ay talagan alwan mangahampat." 24Ombayri et ya hinalità ni Apo Hisos: "Ayin tawoy makapagsirbi nin sabay ha loway amo; ta no pisabayen na, hay miha ay ma-arì pag-inakitan, piro hatoy miha ay labiyen na; o ma-arì nin mag--in yan tapat ha miha, ta hatoy miha ay kasorawan na. Agmo ma-arì pisabayen nin pagsirbiyan ya Diyos boy kayamanan. 25Kayà habayti ya halita--en ko komoyo," wana et ni Apo Hisos: "Agkawo magolon mangihip nin tongkol ha pagbibiyay moyo no anyay kanen, inomen, boy pagdolo. Alwa nayì nin hay biyay ay mas ma-alagà kisa pamamangan, boy hay nawini ay mas ma-alagà kisa dolo? 26Helken moyoy mawmanokmanok! Aghila ampananem ni ampangalawah nin ikamalig la, piro hay Tatay tamoy Diyos ya anti ha katatag-ayan ha kama-inan na ay ampangasiwà konla. Alwa nayì mas kawon ma-alagà kisa ha mawmanokmanok? 27Warì mapalawig moyoy biyay moyo no anggolowen moyoy ihip moyo? 28"Antà angkagolo kawo ha pagdolo moyo? Ihipen moyo no pangno anhomlay ya mawmasitas ya balang. Aghila ampagtrabaho o ampanggawà dolo ya para ha sarili la. 29Piro anhalita--en ko komoyo, maski masyadoy kayamanan ni Arì Solomon ay agya nakapagdolon maganda nin bilang ombayro kaganda ha bawbolaklak. 30No hay dawdikot ya angkabiyay hapa--eg ha lawak ay ampagandawen nin Diyos ya nobokah ay tabasen ta ipo--ol, hikawo et warì ya agna padolowan? Talagan kolang ya pantotompel moyo! 31Dapat agmoyo golowen ya nakem moyon halita--en ya, 'Ayri kayi mangwan kanen nawen, inomen nawen, boy pagdolo nawen?' 32Habayti ya kaganawan bagay ya pirmin anhangaren nin tawtawoy anhomamba ha alwan peteg diyos. Piro hay Tatay tamoy Diyos ya anti ha katatag-ayan ha kama-inan na ya magtandà nin habayti ya bawbagay ya angka-ilanganen moyo. 33Hay onawen tamo nin hangaren ay Diyos ya mamo--on kontamo boy mamiyay tamo nin kompormi ha kalabayan na, biha na igwà kontamo ya kaganawan nin habayti ya bawbagay ya angka-ilanganen tamo. 34Kayà agkawo magolo nin mangihip no anyay mangyari komoyo nobokah, ta Diyos ya ampakaba-alà komoyo. Hay problima moyo hapa--eg ay agmoyoyna pahanan ha pangihip moyo nin mangyari ha homonoy allo."

will be added

X\