MATIYO 26

1Hin nayari̇̀ intorò ni Apo Hisos baytoy kaganawan ay hinalità na ha aw-alagad na, ya wana, 2"Tandà moyo ya loway allo tana ya palabahen biha Pistan Pamamanemtem; boy ha allon habayto, hiko ya an-ingaten Anak nin Tawo ay igwà ha tawtawoy mangipakò kongko ha koroh." 3Hapa--eg hay pawpo--on nin pawpari̇̀ boy mawmato--ay mangama--in katongkolan ay nititipon ha palasyo ni Kaypas ya pinakamatag--ay ya po--on pari̇̀, 4ta amplanowen la no pangno la ma-isikrito ya pandakep koni Apo Hisos ta patyen la ya. 5"Agtamo," wanla, "gaw--en peleg pista ta maka manggawà nin kagolowan ya tawtawo." 6Hapa--eg hi Apo Hisos ay anti ha banowan Bitanya ha bali ni Simon ya liprosowen pon. 7Peleg ampangan hili Apo Hisos ay ma--in nakalateng ya mihay babayi ya nantan nin pinakamabli ya pabangoh ya nakapalaman ha maganday pambiyanan ya an-ingaten alabastro. Habayto ay imbollog na ha olo ni Apo Hisos. 8Hin nakit bayto nin aw-alagad ay namahang hila. "Antà," wanla, "nin sinayang na ba--in ya pabangoh? 9No na-ilakò dayi ba--in nin malhay ya alagà, hay napaglako--an ay na-igwà dayi ha manga-irap." 10Hatoy anhalita--en la ay alwan polinged koni Apo Hisos; kayà hinalità na konla, "Antà," wana, "nin ampaki-emenan moyo ya? Hay ginawà na kongko ay kahampatan. 11Hay manga-irap ay kalamo moyon pirmi; piro hiko ay ahè magpirmi komoyo. 12Hay pangibollog na ha nawini ko nin habayti ya pabangoh ay paghahandà ha pananabon kongko. 13Anhalita--en ko komoyo ya kaptegan: maski ayrin dogal bayri ha babon lotà nin ma-i-aral bayti ya Mahampat ya Balità ay mapanemteman bayti ya babayi ta mabanggit ya ginawà na kongko." 14Hapa--eg hi Hodas Iskaryoti ya miha ha labinloway alagad ni Apo Hisos ay nako ha pawpo--on nin pawpari̇̀ 15ta hinalità na konla, "Anya," wana, "ya igwà moyo kongko no igwà ko komoyo hi Hisos?" Hapa--eg, binyan la yan tatlompò ya kowaltay pilak. 16Pa-ibat hin habayto ay an-ihipen ni Hodas no pangnoy pangisapakat na koni Apo Hisos. 17Hin primiron allo nin Pistan pamangan tinapay ya ayin pampalbag, hay aw-alagad ni Apo Hisos ay napakarani kona ta pinastang la ya, ya wanla, "Ayri ya labay mon pangihanda--an nawen nin pangaponan tamo ya pamanemteman?" 18Tinombay konla hi Apo Hisos, ya wana, "Mako kawo ha siyodad nin Hirosalim ta maki-ilgo kawo ha mihay tawo bayro ya halita--en ko komoyo. Hay halita--en moyo bayro ha tawo ay ombayri: 'Hinalità nin Mangangaral nawen ya, "Hay ka-orasan nin kamatyan ko ay maranina. Hikayi nin aw-alagad ko ay bayri ha bali mo nin mangapon hapa--eg Pistan Pamamanemtem." ' " 19Hapa--eg hatoy aw-alagad ay hinomonol ha hinalità konla ni Apo Hisos. Kayà nangihandà hila nin pangaponan la para ha Pistan Pamamanemtem. 20Hin yabi ana, hi Apo Hisos kateng labinloway alagad na ay dinomoyong ha lamisawan ta mangan. 21Hin ampi-a-arap hilayna nin ampangan ay hinalità konla ni Apo Hisos, ya wana, "Anhalita--en ko komoyoy kaptegan: miha komoyo ya ka-arap kon ampangan ay mangisapakat kongko." 22Hapa--eg, hatoy aw-alagad ay nilomelè. Mihamiha hilan nagpastang koni Apo Hisos, ya wanla, "Alwa kali̇̀ nin hiko bayto, Pangino--on?" 23Tinombay konla hi Apo Hisos, ya wana, "Hatoy kalamo kon ampagsawsaw nin tinapay ha yawong ay hiya bayto ya mangisapakat kongko. 24Impaholat nin Diyos ya hiko ya an-ingaten Anak nin Tawo ay talagan mati, piro ka-i-ingaloy mangyari ha tawoy mangisapakat kongko ya an-ingaten Anak nin Tawo. Mas mahampat et dayi ya agyayna in-anak." 25Hapa--eg hi Hodas ya ampangisapakat koni Apo Hisos ay naghalità, "Hiko nayi̇̀," wana, "Apo?" Tinombay kona hi Apo Hisos, "Mismon hikayna," wana, "ya naghalità." 26Peleg la et bayron ampangan, hi Apo Hisos ay nandampot nin tinapay ya pinasalamatan na ha Diyos. Binibi--hil na bayto ta impatpel na ha aw-alagad na biha na hinalità, ya wana, "Habayti ay nawini ko; kanen moyo." 27Hapa--eg, dinampot na et ya mihay baso ya ma--in alak nin obas. Pinasalamatan na bayto ha Diyos biha na inggawà ha aw-alagad na. "Hikawoy kaganawan," wana, "ay minom nin habayti, 28ta habayti ay dayà ko ya katibayan nin hay Diyos ay ma--in bayoy kasondo--an ha tawtawo. Habayti ya dayà ko ya mantolò para ha kalak--an tawo, boy habayti ya makapatawad nin kawkasalanan. 29Anhalita--en ko komoyo ya agkoyna minom nin ombayri ya alak nin obas anggan lano ha mapagkalamo katawo nin minom nin bayoy alak do ha dogal ya ampag-ari--an nin Tatay koy Diyos." 30Hin nayari̇̀ hili Apo Hisos nin nagkantan pamasalamat ay nako hila ha Bakil nin Aw-olibo. 31Hapa--eg, hinalità ni Apo Hisos ha aw-alagad na, ya wana, "Hikawoy kaganawan ay ma-lihan nin katetpel kongko hapa--eg yabi kompormi ha hinalità nin Diyos ya ombayri: 'Hay Pastol nin tawtopa ay patyen ko boy mikakatak ya tawtopa.' 32Piro pangabiyay kon oman," wana et ni Apo Hisos, "ay ma-ona ko komoyo nin mako ha probinsyan Galiliya." 33Hapa--eg, hinalità ni Pidro koni Apo Hisos, ya wana, "Maski ma-lihan nin katetpel ya kaganawan, hiko ay ahè!" 34Hinalità kona ni Apo Hisos, "Anhalita--en ko komo ya kaptegan," wana, "hapa--eg yabi, biha mangkati ya manok ay katatloy bisis mo kon ipogla--oh nin halita--en ya agmo ko balay." 35Tinombay kona hi Pidro, ya wana, "Maski mati ko nin kalamo mo ay agko maghalità nin agkata balay." Ombayro simpri ya hinalità nin kaganawan alagad. 36Hapa--eg hi Apo Hisos kateng aw-alagad na ay nako ha dogal ya an-ingaten Gitsimani. Hinalità na ha aw-alagad na, "Miknò kawo bayri," wana, "ta mako ko ha banda bayro nin manalangin." 37Hapa--eg, hay gintan ni Apo Hisos ay hi Pidro kateng hatoy loway anak ni Sibidiyo, boy hin habayto ay nakatanam yan masyadoy kalele--an boy angkagolo ya ihip na. 38Hapa--eg, hinalità konla ni Apo Hisos, "Emen akon mati," wana, "nin banà ha masyadoy kalele--an ko. Bayri kawo pon boy makipoyat kawo kongko." 39Hin nipakarayò nin amò hi Apo Hisos ay nanlokob yan nanalangin, ya wana, "Tatay ko, no ma-ari̇̀ dayi ay alihen mo bayti ya kadya-dya--an ya andanasen ko. Ombayro man ay alwan kalabayan koy mahonol no alwan kalabayan mo." 40Hapa--eg hi Apo Hisos ay nagbira do ha tatloy alagad na boy nalatngan na hilay angkatoloy. Hinalità ni Apo Hisos koni Pidro, "Agmo nayi̇̀ matagal nin magpoyat nin maski mihay oras? 41Homandà kawo boy manalangin emen agkawo matoksò. Anti ha nakem moyo ya labay moyon homonol, piro ahè makaya nin sarili moyo." 42Inalihan hilayna et ni Apo Hisos nin ikalwan bisis ta nako yan nanalangin. "Tatay ko," wana, "no ahè ma-alih bayti ya kadya-dya--an ya andanasen ko ay kalabayan moy mangyari." 43Hapa--eg, nagbirayna et hi Apo Hisos do ha tatloy alagad na boy nalatngan na hilay angkatoloy ta nitonglò hilayna. 44Inalihan hilayna et oman ni Apo Hisos nin ikatlon bisis ta nako yan nanalangin nin bilang ombayro hin ona. 45Hapa--eg ay nagbira yayna et ta hinalità na konla, "Angkatoloy kawo et nayi̇̀," wana, "boy ampa-inawa? Nilomateng anay oras nin hiko ya an-ingaten Anak nin Tawo ay isapakat nin igwà ha gamet nin tawtawoy makasalanan. 46Mibangon kawoyna ta anlomateng anay tawoy ampangisapakat kongko. Hakbaten tamo hila." 47Mintras ampaghalità hi Apo Hisos, hi Hodas ya miha ha labinloway alagad na ay nakalateng kalamo nay malakè ya tawoy nipaghondang boy nipagpapatok. Hila bayti ay inhogò nin pawpo--on nin pawpari̇̀ boy mawmato--ay mangama--in katongkolan. 48Hatoy traydor ya hi Hodas ya ampangiparakep koni Apo Hisos ay naghalità ha kawkalamowan na, ya wana, "Hay alekan ko ay hiya bayto. Dakpen moyo ya ta gitan moyo." 49Hin nilomateng bayro hi Hodas ay nagdiritso ya koni Apo Hisos boy hinalità na, "Apo," wana, biha na ya inalekan. 50Hinalità kona ni Apo Hisos, "Aporawen mon gaw--en," wana, "ya bara--nan nin pamako mo bayri." Hapa--eg hi Apo Hisos ay pinakaraniyan nin hatoy kawkalamowan ni Hodas ta dinakep la ya. 51Miha ha aw-alagad ni Apo Hisos ya anti bayro ay nanganoh nin hondang ta tinabtab nay alilà nin pinakapo--on nin pawpari̇̀. Hatoy alilà ya tinabtab ay napongohan nin tolih. 52Hinalità ni Apo Hisos, "Igomà moynay hondang mo," wana, "ta kaganawan ampamati nin hay anggamiten ay hondang ay hondang itaman ya gamiten nin pamati konla. 53Agmo nayi̇̀ tandà ya no makirawat ako hapa--eg ha Tatay koy Diyos ay ihogò na hapa--eg et ya liboliboy anghil na nin mangasiwà kongko? 54Piro no gaw--en ko baytoy ombayro ay pangno matopad baytoy nakaholat ha Kaholatan nin Diyos ya dapat mangyari?" 55Hapa--eg hi Apo Hisos ay naghalità do ha kalak--an tawo, ya wana, "Wari̇̀ tolisan ako ta nakahondang kawo boy nipagpapatok ya mandakep kongko? Allo-allo kon ampiknò do ha bali nin Diyos nin ampanorò ay antà agmoyo ko dinakep? 56Kaganawan nin habayti ay ampangyari emen magkapeteg baytoy hinolat nin pawpropita ha Kaholatan nin Diyos." Hapa--eg hay kaganawan alagad ni Apo Hisos ay nipampowayo ta inalihan la ya. 57Hapa--eg hi Apo Hisos ay gintan nin hatoy nipandakep kona ha bali ni Kaypas ya pinakapo--on nin pawpari̇̀, ta anti bayron nititipon ya mawmangitorò nin kawkapanogo--an kateng hatoy mawmato--ay mangama--in katongkolan. 58Hi Pidro ya ma--in amò ya karayo--an ya anhomono koni Apo Hisos ay ni-abot ha kolob bali nin hatoy pinakapo--on nin pawpari̇̀. Nilomo--ob ya bayro nin naki-iknò ha bawbantay ta an-imatonan na no anyay homono ya mangyari. 59Hapa--eg hay pawpo--on nin pawpari̇̀ boy kaganawan ma--in katongkolan ay ampanikap nin manistigos kabongkokan ya kontra koni Apo Hisos emen la ya ma-ipapati. 60Piro ayin hilan makit ya bara--nan ya pamatyan la kona maski malakè ya tawoy ampaghalità nin kabongkokan. Ha kalalampohan ay ma--in loway tawo ya napakarani 61ya naghalità nin, "Habayti ya tawo ay naghalità nin, 'Kaya kon hira--en bayti ya bali nin Diyos ta pangalabah nin tatloy allo ay ibangon kon oman.' " 62Hapa--eg, nireng baytoy pinakapo--on nin pawpari̇̀ ta pinastang na hi Apo Hisos, ya wana, "Ayin ka nayi̇̀ ma-itobay bahen ha an-ibingga la komo?" 63Piro hi Apo Hisos ay ahè nagtelek. Hinalità kona nin hatoy pinakapo--on nin pawpari̇̀, "An-imanda ko," wana, "komo ya ha arapan nin Diyos ya ayin kamatyan ay halita--en mo konnawen no hika baytoy impangakò nin Diyos ya Anak nin Diyos." 64Tinombay kona hi Apo Hisos, "Mismon hikayna," wana, "ya naghalità. Piro habayti ya halita--en ko komoyon kaganawan: lano, hiko ya an-ingaten Anak nin Tawo ay makit moyoy ampiknò ha bandan wanan nin Pinakamakapangyariyan ya Diyos. Pagbira ko bayri ay makit moyo ko ya anti ha leem ya mangibat ha katatag-ayan." 65Hapa--eg, ha kapahangan nin hatoy pinakapo--on nin pawpari̇̀ ay giniwak nay dolo na boy hinalità na, "Haba--in ya tawo," wana, "ay ampaghalità nin kontra ha Diyos, ta hiya ay tawon bongat piro an-ipantay nay sarili na ha Diyos. Kayà alwa tamoynan ka-ilangan ya tistigos. Bayri ay nalengè moyoynay hinalità na ya kontra ha Diyos. 66Anyay disisyon moyo?" Tinombay kona baytoy tawtawo, ya wanla, "Hay dapat kona ay patyen." 67Hapa--eg, dinol--an lay lopa ni Apo Hisos boy pinagpoponiti la ya; hay ginawà nin kanayon ay pinerengan lay mata na, biha la ya tinampal 68boy hinalità la kona, "Banta--an mo pa, Kristo, no hinoy nanampal komo." 69Hi Pidro ay anti ha kolob nin hatoy pinakapo--on nin pawpari̇̀ nin ampiknò. Hapa--eg mihay babayi ya alilà bayro ay napakaranin naghalità kona, "Kateng hika," wana, "ay miha ha kawkalamowan ni Hisos ya taga Galiliya." 70Piro ha arapan nin kaganawan, hi Pidro ay nagpogla--oh, ya wana, "Agko tandà ba--in ya anhalita--en mo." 71Hapa--eg hi Pidro ay nagpalako ha polta nin hatoy kolob. Bayro ay nakit yayna et nin kanayon ya babayi ya alilà ya naghalità do ha tawtawoy anti bayro, ya wana, "Haba--in ya tawo ay kalamo ni Hisos ya taga Nasarit." 72Nagpogla--oh ana et hi Pidro, ya wana, "Ampaghompà ako nin haba--in ya tawo ay talagan agko balay." 73Amò papa-inghan, hay tawtawoy anti bayro ya ampipampireng ay napakarani koni Pidro ta hinalità la kona, "Talagan hika," wanla, "ay miha ha aw-alagad ya kalamo ni Hisos ta angkahalatà nawen ka ha pag-i-ilgo mo." 74Hapa--eg hi Pidro ay naghompà nin kabongkokan, ya wana, "Parosawan ako nin Diyos no alwan peteg ya hinalità ko ya agko balay ba--in ya tawo." Antimano ay nangkati ya manok. 75Hapa--eg, napanemteman ni Pidro baytoy hinalità kona ni Apo Hisos ya ombayri: "Biha mangkati ya manok ay ipogla--oh mo kon katatloy bisis nin halita--en ya agmo ko balay." Kayà hi Pidro ay nog-alih bayro ha kolob boy masyadoy pamitangihtangih na.

will be added

X\