MATIYO 25

1Hinalità ana et ni Apo Hisos, ya wana, "Ha allon habayto nin lomateng ako, hay pamomo--on nin Diyos ay bilang ha mapò ya dalaga ya balang miha ay ma--in gitan ya kingki ya andongket nin homakbat ha kakahal ya lalaki. 2Hay lima konla ay tangah; hay lima ay maronong. 3Hatoy tawtangah ay nantan kingki la piro aghila nantan risilbay pitorolyo. 4Hato balè ya mangaronong ay nantan risilba ya para ha kingki la. 5Hapa--eg, mintras na-antalà ya panlomateng nin hatoy kakahal ya lalaki, hatoy mapò ya dalaga ay nakakatoloy. 6"Piro hin botlay yabi ana ay naka-imata hila ha nalengè lay bolyaw ya ombayri: 'Anti anay kakahal ya lalaki! Mako kawoyna bayrin homakbat kona!' 7Hapa--eg hatoy mapò ya dalaga ay nipampibangon ta pinaka-osay lay kawkingki la. 8Hinalità nin hatoy limay dalaga ya tangah do ha limay maronong, 'Atagan moyo kayi,' wanla, 'nin pitorolyo moyo ta angkaparè anay kingki nawen.' 9Piro tinombay konla baytoy mangaronong ya dawdalaga, 'Ahè ma-arì,' wanla, 'ta tama-tamà bongat baytin para konnawen; kayà mako kawo ha tindawan nin manaliw nin para komoyo.' 10Hapa--eg hatoy limay dalaga ya tangah ay nakon manaliw nin pitorolyo ya para ha kawkingki la. Mintras ayin hila, hay kakahal ya lalaki ay nilomateng. Hatoy limay nakahandà ay nakapakilamo do ha ikakahal boy nakapakibanhal. Hapa--eg hay polta ya pinahokan la ay inharà ana. 11"Ahè naboyot, hatoy limay dalaga ya nanaliw pitorolyo ay nakalateng. Hila ay anti ha likol nin ampibobolyaw, ya wanla, 'Apo, Apo, lo-aten moy polta ta papahoken mo kayi!' 12Piro tinombay baytoy kakahal ya lalaki, ya wana, 'Anhalita--en ko komoyoy kaptegan ya agkatawo balay.' " 13Hapa--eg, hinalità et ni Apo Hisos, "Kayà bay," wana, "hay ka-ilangan ay pirmi kawon handà ta agmoyo tandà ya allo o oras nin panlomateng ko." 14Hinalità et ni Apo Hisos, "Hay pamomo--on nin Diyos," wana, "ay i-alimbawà ko et ha mihay tawoy nako ha kanayon ya dogal. Piro biha ya nog-alih ay iningat nay aw-alilà na ta impaba-alà na konlay kawkamama--in na. 15Balang miha ay binyan na nin kompormi ha kaya nan asiwa--en. Hay miha ay binyan nan alagà liman libo, hay miha ay binyan nan alagà lowan libo, boy hay miha ay binyan nan alagà malibo. Hapa--eg hiya ay nanigè ana. 16Hatoy alilà ya nananggap nin alagà liman libo ay tampol nan ingkomirsyo baytoy kowalta ya impatayà kona; kayà nakatobò yan alagà liman libo. 17Ombayro simpri ya ginawà nin hatoy binalagan alagà nin lowan libo; kayà nakatobò ya itaman nin alagà lowan libo. 18Hato balè ya alilà ya binalagan nin alagà malibo ay nangotkot lotà ta intagò na baytoy kowaltay imbalag kona nin amo na. 19"Nalabah ya malakè ya pana--on, hatoy amo ay nakalateng boy sinita na baytoy kowaltay imbalag na konla. 20Hatoy alilà ya binalagan nin alagà liman libo ay nako kona ta gintan na baytoy kowalta kateng natobò na ya alagà liman libo. 'Binalagan mo ko, Apo,' wana, 'nin alagà liman libo. Helken mo! Habayti et ya liman liboy natobò ko.' 21"Hinalità kona nin hatoy amo na, 'Maganday ginawà mo, mahampat boy tapat ya alilà. Banà ta mapahimala--an ka ha mayamò ya alagà ay gaw--en katan mama-alà nin malhay ya alagà. Kayà pakarani ka kongko nin makilamo ha kaligawan.' 22"Hato itaman ya alilà ya binalagan nin alagà lowan libo ay nako do ha amo na ta hinalità na kona, 'Binalagan mo ko, Apo', wana, 'nin alagà lowan libo. Helken mo! habayti et ya lowan liboy natobò ko.' 23Hinalità itaman kona nin hatoy amo, 'Maganday ginawà mo, mahampat boy tapat ya alilà. Banà ta mapahimala--an ka ha mayamò ya alagà ay gaw--en katan mama-alà nin malhay ya alagà. Kayà pakarani ka kongko nin makilamo ha kaligawan.' 24"Hapa--eg hatoy alilà ya binalagan nin alagà malibo ay nako do ha amo na ta hinalità na kona, 'Apo,' wana, 'tandà ko ya hika ay ma-irap nin pakilamowan, ta ampangalawah ka nin agmo intanem boy ampakinabang ka ha agmo pinagpagalan. 25Angkalimo ko komo; kayà hay kowalta mo ay intagò ko ha lalè lotà. Helken mo! Anti ana bayri bayti ya ikon mo.' 26"Hapa--eg, hinalità kona nin hatoy amo na, 'Hika,' wana, 'ya mala--et boy matamlad ya alilà! Tandà mo awod ya ampangalawah ako nin agko intanem boy ampakinabang ha agko pinagpagalan. 27Ha ombayro, hay kowalta ko ay indabò mo dayi ha bangko emen habayto ay nibira kongko nin ma--in tobò.' 28"Hapa--eg, hinalità et nin hatoy amo do ha kanayon ya aw-alilà na, 'Kowen moyo kona,' wana, 'ba--in ya kowalta ta igwà moyo do ha ma--in alagà mapò ya libo. 29Hay tawoy ma--in ay pahanan et ya ma--in kona, piro hay ayin, no anyaman ya ma--in kona maski a-amò ay alihen kona. 30Hay bagay bayri ha ayin pakinabang ya alilà ay itapon ha likol ha dogal ya pagkareglem. Bayro hay tawtawo ay mi-anggaw-angaw boy manget--et nin ngipen la banà ha tanamen lay dya--dyà.' " 31Ombayri et ya hinalità ni Apo Hisos, "Hiko," wana, "ya an-ingaten Anak nin Tawo, pagbira ko bayri ha babon lotà ay ma--in akon kagandawan ya ahè makwan ihipen, boy kalamo koy aw-anghil ko biha ko miknò ha trono koy ma--in kagandawan. 32Kaganawan tawo bayri ha babon lotà ay mititipon ha arapan ko ta pipapawa--en ko ha loway gropo nin bilang ha magpapastol ya ampipapawa--en nay tawtopa boy kawkanding. 33Hay tawtawoy mangahampat ya bilang ha topa ay igwà ko ha bandan wanan ko; hay tawtawoy mangala--et ya bilang ha kanding ay igwà ko ha bandan oki ko. 34"Hapa--eg hiko ya Arì ay maghalità ha tawtawoy anti ha bandan wanan ko, 'Hikawoy ma--in kahampatan ya inggawà komoyo nin Tatay koy Diyos, mako kawo bayri ta pag-ari--an katawo. Hay pag-arì ko komoyo ay inhandà nin Diyos pa-ibat hin pinalsa ya babon lotà; 35ta hin nabitlan ako ay pinakan moyo ko; hin na-angan ako ay pina-inom moyo ko. Maski agmoyo ko nabalayan ay pinagkahandà moyo ko ha bali moyo. 36Hin ayin akon dolo ay pinadolowan moyo ko; hin nagmasakit ako ay inasiwà moyo ko, boy hin napiriso ko ay tinibaw moyo ko.' 37"Hapa--eg, tombay kongko baytoy mangahampat ya tawtawo, 'Pangino--on,' wanla, 'nakano nawen ka nakit ya binomitil ya pinakan nawen, boy nakano nawen ka nakit ya na-angan ya pina-inom nawen? 38Nakano nawen ka ahè nabalayan ya pinagkahandà nawen, boy nakano ka nanga-ilangan nin dolo ya pinadolowan nawen? 39Nakano nawen ka simpri nakit ya nagmasakit o napiriso ya tinibaw nawen?' 40"Hapa--eg hiko ya Arì ay tombay konla nin ombayri: 'Kaptegan ya anhalita--en ko komoyo; ha panggawà moyo nin ombayri ha miha ha pinaka-oltimo ya kowinta pawpatel ko ay bilang anan kongko moyo ginawà.' 41"Hapa--eg," wana et ni Apo Hisos, "ombayri itaman ya halita--en ko ha tawtawoy anti ha bandan oki ko: 'Pakarayò kawo kongko. Hay bagay komoyo ay kaparosawan. Mako kawo ha apoy ya ahè maparè ya inhandà anan para koni Satanas boy ha dawdimonyoy aw-anghil na; 42ta hin binomitil ako ay agmoyo ko pinakan; hin na-angan ako ay agmoyo ko pina-inom. 43Hiko ya agmoyo nabalayan ay agmoyo pinagkahandà ha bali moyo; hin ayin akon dolo ay agmoyo ko pinadolowan; hin nagmasakit ako boy napiriso ay agmoyo ko simpri tinibaw.' 44"Hapa--eg, tombay hila kongko, 'Pangino--on,' wanla, 'nakano nawen ka nakit ya binomitil, o na-angan, o ahè nabalayan, o ayin dolo, o nagmasakit, o napiriso ya agnawen tinambayan?' 45Hapa--eg hiko ya Arì ay tombay konla nin ombayri: 'Kaptegan ya halita--en ko komoyo; hay agmoyo panambay ha pinaka-oltimo ya kowinta pawpatel ko ay hiko ya agmoyo tinambayan.' 46Habayto," wana et ni Apo Hisos, "ya ombayroy tawtawo ay mipalako ha impirno ya ayin anggay kaparosawan, piro hay mangahampat ya tawtawo ay biyan biyay ya ayin anggawan."

will be added

X\