MATIYO 20

1"Hay pamomo--on nin Diyos," wani Apo Hisos, "ay i-alimbawà ko ha mihay tawoy ma--in tanaman ya aw-obas. Mahambak et, hiya ay nanagyat nin lawlalaki ya opa--an nan magtrabaho ha tawtanaman nay obas. 2Nakisondò ya konla nin bayaran na hila kompormi ha an-i-opà ha lo--ob mihay allon pagtrabaho, biha na hila inhogò magtrabaho do ha tawtanaman nay obas. 3Hin mag-a-alas nowibi ana ay nako ya ha danin palingki. Bayro ay nakakit yan ongnoy lalaki ya ayin trabaho. 4Kayà hinalità na konla, 'Mako kawo,' wana, 'nin magtrabaho ha tawtanaman koy obas, ta opa--an katawo nin tamà ya opà ha pagtrabaho moyo.' Hapa--eg, nako hilan nagtrabaho. 5Hin ni-ogtoynay allo boy hin alas tris ana ay ombayro simpri ya ginawà na. 6Hin mag-a-alas singkoyna nin mahilem ay nako yayna et do ha danin palingki. Bayro ay nakakit yayna et nin ongnoy lalaki ya ampipampireng. Pinastang na hila, 'Antà,' wana, 'nin ansayangen moyoy managa-allo nin ayin anggaw--en?' 7Tinombay hila kona, 'Ayin,' wanla, 'nin mangopà konnawen nin magtrabaho.' Hinalità na konla, 'Mako kawo,' wana, 'nin magtrabaho ha tawtanaman koy obas.' 8"Hin anyomabi ana, hatoy ma--in ikon nin tawtanaman ay naghalità do ha pinaba-alà na, 'Ingaten moyna,' wana, 'ya mawmagtatarabaho ta igwà moynay opà la nin hay onawen mon biyan ay hatoy nikahoyot mon pinatrabaho.' 9Hapa--eg hatoy lawlalaki ya alas singkoyna nin nagtrabaho ay inopa--an na nin opà lo--ob managa-allo. 10Hin nilomateng baytoy onan hinagyat nin magtrabaho ay an-asawan lan mas et bayro ya opà la ha in-opà do ha nikahoyot nagtrabaho. Piro ombayro simpri ya in-opà konla. 11Mintras antanggapen lay opà la ay ampagriklamo hila do ha namatrabaho konla. 12'Hato,' wanla, 'ya nikahoyot ay mimihay oras bongat nagtrabaho, piro hay opà la ay impantay mo ha opà nawen ya hikayi ay mikaka-allon nagpagal nin nagtrabaho boy nagte--eh nin amot allo.' 13"Hatoy namatrabaho ay tinombay ha miha konla, 'Patel,' wana, 'agkata nilogi. Agka nayi̇̀ nakisondò kongko nin hay i-opà ko komo ay tamà ha opà nin magtrabahon mihay allo? 14Hapa--eg ay kowen moy opà mo ta morong kayna. Habayti ya nahoyot ay labay kon opa--an nin bilang ha in-opà ko komo. 15Wari̇̀ ayin akon karapatan gaw--en ya kalabayan ko ha sarili kon kowalta? Ampag-inggit ka nayi̇̀ ta mabibi-iyen ako?' 16"Kayà," wani Apo Hisos, "ha tawtawo ay ma--in pangyayari ya hay nika-ona ay emen hilay nahoyot, boy hay nahoyot ay emen nika-ona." 17Mintras ampagpalako hili Apo Hisos ha siyodad nin Hirosalim ay impa-alilih nay aw-alagad na ta hinalità na konla, 18"Leng--en moyo bayti ya halita--en ko komoyo. Hitamo ay ampagpalako ha siyodad nin Hirosalim. Bayro, hiko ya an-ingaten Anak nin Tawo ay igwà ha pawpo--on nin pawpari̇̀ boy ha mawmangitorò nin kawkapanogo--an, ta sintinsyawan la ko nin patyen. 19Igwà la ko ha alwan Hawhodiyo, ta hay gaw--en la nin habayto ay pagsistiyan la ko, barogen, boy ipakò ha koroh. Pangati ko, lomateng ya ikatlon allo ay mabiyay akon oman." 20Hapa--eg, nakalateng ya ahawa ni Sibidiyo kalamo nay loway anak nay lalaki. Napakarani ya koni Apo Hisos ta nanalimokod yan ampangawok kona. 21Pinastang ya ni Apo Hisos, "Anya," wana, "ya labay mon awoken kongko?" Tinombay ya kona, "An-awoken ko komo," wana, "ya lano do ha dogal ya ampag-ari--an mo, habayti ya loway anak ko ay pa-ikno--en mo ha dani mo, miha ha bandan wanan mo boy miha ha bandan oki mo." 22Hinalità ni Apo Hisos konla, "Agmoyo," wana, "angka-intindiyan ya an-awoken moyo. Makat--eh kawo wari̇̀ ha kadya-dya--an ya te-ehen ko?" "Awò," wanla, "kaya nawen." 23Hapa--eg, hinalità konla ni Apo Hisos, ya wana, "Talagan peteg nin te-ehen moyoy kadya-dya--an ya te-ehen ko. Ombayro man ay alwan hikoy magdisisyon no hinoy miknò ha bandan wanan ko boy ha bandan oki ko. Habaytoy ikno--an ay para ha tawtawoy hinanda--an nin Tatay koy Diyos." 24Hatoy mapò ya alagad ay namahang do ha loway mipatel hin natanda--an la baytoy an-awoken nin nanay nin hatoy mipatel. 25Kayà iningat ni Apo Hisos nin pakarani kona ya kaganawan alagad na ta hinalità na konla, ya wana, "Tandà moyo ya hay ampipamo--on ha alwan Hawhodiyo ay an-ipagpalangkà lay pamomo--on la, boy hay kanayon ya ma--in katongkolan ay ampamo--on nin sapilitan. 26Agmoyo gaw--en baytoy ombayro. Hinoman komoyo ya labay maka-igit ay ka-ilangan magsirbi. 27Hinoman komoyo ya labay mangona ay ka-ilangan magsirbi nin bilang ha alilà 28ya bilang ombayri ha anggaw--en ko. Hiko ya an-ingaten Anak nin Tawo ay ahè nako bayri ha babon lotà nin sirbiyan, no alwan nako ko bayri nin magsirbi boy mangigwà nin biyay ko nin pambeh nin malakè ya tawo." 29Mintras ampog-alih hili Apo Hisos do ha banowan Hiriko ay hinono yan malakè ya tawo. 30Ha pingit daan ay ma--in ampiknò ya loway lalaki ya bowag. Hin nalengè la ya hi Apo Hisos ay ampagdaan bayro ay nambo-angaw hila, ya wanla, "Alalak ni Ari̇̀ Dabid, ingalowan mo kayi!" 31Hinalità konla nin hatoy kalak--an tawo ya aghila magtelek piro lalò hilayna ingat nambo-angaw, ya wanla, "Apo, alalak ni Ari̇̀ Dabid, ingalowan mo kayi!" 32Hin nalengè ni Apo Hisos baytoy bo-angaw ay tinonggen ya ta pinastang na hila, "Anya," wana, "ya labay moyon gaw--en ko komoyo?" 33"Apo," wanla, "labay nawen dayin makakit!" 34Hapa--eg, na-ingalowan hila ni Apo Hisos boy inaptoh nay mata la. Antimano, nakakit hila boy nakilako hila koni Apo Hisos.

will be added

X\