MATIYO 18

1Hin oras ya habayto, hay aw-alagad ni Apo Hisos ay napakarani kona nin nagpastang, "Hino," wanla, "ya pinaka-igit lano ha tawtawo ha dogal ya ampag-ari--an nin Diyos?" 2Hapa--eg hi Apo Hisos ay nangingat nin mayamò ya anak, ta pina-ireng na ha arapan la 3biha na hinalità, ya wanà, "Anhalita--en ko komoyo ya dapat moyon omanen ya pangingihip moyo ta towaren moyoy ka-aypa--an nakem nin aw-anak. No alwan ombayri ya gaw--en moyo ay agkawo mapalamo ha tawtawoy ampag-ari--an nin Diyos. 4Hinoman ya magpaka-aypà nakem nin bilang ombayri ha anak ay hiyay pinaka-igit ha tawtawo ha dogal ya ampag-ari--an nin Diyos; 5boy hinoman ya mananggap boy mangasiwà nin ombayri ya anak ha ngalan ko ay hikoy antanggapen na." 6Hinalità et ni Apo Hisos, "Hinoman," wana, "ya manggawà nin bara--nan ya pangibatan nin hay mihay anak ya antompel kongko ay makapagkasalanan, mahampat et ya hay le--ey na ay taklan nin malhay ya batoy gigilingan biha ya itapon ha dagat. 7Ka-i-ingalo ya tawtawo ta ma--in malakè ya bagay ya pangibatan nin hila ay makapagkasalanan. Talagan mangyari bayti piro lalò ka-i-ingaloy mangyari ha tawoy manonoksò. 8"No hay kagmang gamet mo o kagmang bitih mo ay ampakahirà nin pantotompel mo kongko ay potohen mo ta itapon mo. Mahampat et ya mimihay gamet mo o mimihay bitih mo no hika ay magkama--in nin biyay ya ayin anggawan kisa komplitoy gamet mo boy bitih mo no hika ay itapon ha impirno ya apoy ya ahè angkaparè. 9No hay kagmang mata mo ay ampakahirà nin pantotompel mo kongko ay alihen mo ta itapon mo. Mahampat et ya mimihay mata mo no hika ay magkama--in nin biyay ya ayin anggawan kisa komplitoy mata mo no hika ay itapon ha impirno." 10Hinalità et ni Apo Hisos, ya wana, "Agmoyo yamo-yamo--en ya maski miha ha mangayamò ya aw-anak ya ombayri, ta anhalita--en ko komoyo ya hay aw-anghil ya kalamo lay ampangasiwà konla ay anti ha Tatay koy Diyos ha katatag-ayan ha kama-inan na. 11(Hiko ya an-ingaten Anak nin Tawo ay nako bayri ha babon lotà ta mangilibri nin tawtawoy nitawon emen aghila mipalako ha kaparosawan ya ayin anggawan.) 12"No ma--in tawo ya ma--in nin magatoy topa ya hay miha ay nikatak, anyay gaw--en nin hatoy tawoy ma--in topa? Agna wari̇̀ ibalag baytoy siyamapò boy siyam bayro ha pagpastolan ha pallig bakil ta lakwen nan tikapen baytoy mihay topa ya nikatak? 13Anhalita--en ko komoyo ya pamakakit na nin hatoy mihay topa ya nikatak ay habaytoy mas makab--i kona nin kaligawan kisa hatoy siyamapò boy siyam ya ahè nikatak. 14Ombayro ya labay nin Tatay tamo ya anti ha katatag-ayan ha kama-inan na. Agna labay ya maski miha bayri ha mangayamò ya aw-anak ay mipalako ha kaparosawan." 15Insigi ni Apo Hisos ya paghalità na, ya wana, "No hay kapara mon antompel ha Pangino--on ay nakapagkasalanan komo ay magsolo ka nin mako kona ta ibalità mo kona ya kamali--an na. No leng--en na ka ay mi-orong ya bilang da--an nin pamipatel moyo. 16Piro no agya manlengè komo ay maglamo ka nin miha o lowa katawoy kapara mon antompel ha Pangino--on emen hay mapitotolan moyo ay malengè nin hatoy lowa o tatloy tistigos. 17No agya simpri manlengè ay halita--en mo ha gropon kapara mon antompel ha Pangino--on. No agya et manlengè konla ay itoring mo yayna nin ahè antompel ha Pangino--on o bilang miha ha mangaha--ol ya mawmanininon bo--ih. 18"Habayti ya halita--en ko komoyo," wana et ni Apo Hisos, "hay agmoyo payagan bayri ha babon lotà ay ahè itaman payagan ha katatag-ayan ha kama-inan nin Diyos. Hay payagan moyo bayri ha babon lotà ay payagan itaman ha katatag-ayan ha kama-inan nin Diyos. 19Anhalita--en ko et komoyo ya no ma--in lowa komoyo bayri ha babon lotà ya mapimiha ha anyaman ya bagay ya ipanalangin moyo ay pangyariyen komoyo nin Tatay koy Diyos ya anti ha katatag-ayan ha kama-inan na, 20ta no ayri ya lowa o tatlo ya ampititipon nin banà ha pantotompel ha ngalan ko, hiko ay anti konla." 21Hapa--eg hi Pidro ay napakarani koni Apo Hisos nin nagpastang, ya wana, "Pangino--on, ongnoy bisis kon patawaren ya patel koy ampakapagkasalanan kongko? Kapitoy bisis nayi̇̀?" 22"Alwan bongat," wani Apo Hisos, "no alwan pitoy bisis ya manipitompò; 23ta hay ka-alimbawa--an nin pamomo--on nin Diyos ay bilang ha mihay ari̇̀ ya labay magsita nin pawpa-otang na. 24Hapa--eg, hin an-ompisawan naynan gaw--en ay in-arap kona ya mihay tawoy ma--in otang kona nin liboliboy pisos. 25Piro hin ayin yan ma-ibayad ha otang na ay immanda nin hatoy amo nay ari̇̀ ya ilakò ya, kateng ahawa na boy aw-anak na, boy kaganawan kamama--in na emen mabayaran ya otang na. 26Piro hatoy ma--in otang ay nanalimokod nin naki-i-ingalo do ha pinangotangan na, ya wana, 'Pagpasinsyawan mo ko pon ta bayaran ko man komo ya kaganawan.' 27Hapa--eg hatoy amo na ya nama-otang kona ay naka-ingalo; kayà agna yayna pinabayad bayro ha otang na. 28"Piro hin nanigè ana baytoy alilà ya nagka-otang ay nahakbat nay kapariho nan alilà ya ma--in amò ya otang kona. Hay ginawà na ay nilognah na ya biha na binikhe boy hinalità na kona, ya wana, 'Bayaran moyna ya otang mo kongko.' 29Hapa--eg hatoy kapariho nan alilà ay nanalimokod nin naki-i-ingalo kona, ya wana, 'Pagpasinsyawan mo ko pon ta bayaran ko man ya otang ko komo.' 30Piro hatoy nama-otang ay ahè pinomayag. Hay ginawà na ay impapiriso na baytoy ma--in otang kona anggan agya makabayad. 31Hin nakit baytoy nangyari nin hatoy kanayon ya kapariho lan aw-alilà ay masyado hilan nilomelè. Kayà kaganawan hatoy pangyayari ay gintan lan imbalità do ha amo la. 32"Hapa--eg, iningat nin hatoy amo lay ari̇̀ baytoy alilà ya ahè namatawad ta hinalità na kona, 'Hika,' wana, 'ya mala--et ya alilà, banà ha pamaki-i-ingalo mo ay pinatawad kata ha kaganawan inotang mo kongko. 33Antà agka nangingangalo ha kapariho mon alilà nin bilang ha pangingangalo ko komo?' 34Hapa--eg hatoy amo ya ari̇̀ ay masyadon namahang; kayà hatoy alilà ya ahè namatawad ay impapiriso na anggan agna mabayaran baytoy kaganawan otang na. 35"Ombayro itaman ha balang miha komoyo," wani Apo Hisos. "Hikawo ay ahè ingalowan nin Tatay tamoy Diyos ya anti ha katatag-ayan ha kama-inan na, no alwan matibolos ya nakem moyon mamatawad ha pawpatel moyo."

will be added

X\