MATIYO 16

1Mihay allo, ma--in ongnoy Parisiyo boy Sadosiyo ya nako koni Apo Hisos ta anhoboken la ya. Kayà ampagaw--en la yan papag-ispantawan ya mamapteg nin hiya ay inhogò nin Diyos. 2Piro ombayri ya intobay konla ni Apo Hisos, "No anhomlep anay allo," wana, "ta ma-orit ya langit ay anhalita--en moyo ya 'Maganday pana--on nobokah.' 3No mahambak ta ma-orit boy mabereg ya langit ay anhalita--en moyo ya, 'Mangoran hapa--eg allo.' Maronong kawon mambin kahologan nin angkakit moyo ha langit; piro agmoyo tandà ya kahologan nin ampangyari hapa--eg pana--on. 4Masyadon la--et nin tawtawo hapa--eg pana--on ta inalih lay pantotompel la ha Diyos. Ampanikap kawon papag-ispantawan, piro ayin ma-ipakit komoyo no alwan hatoy nangyari hin hato koni propita Honas." Hapa--eg, inalihan hila ni Apo Hisos. 5Hin nakalipay ana hili Apo Hisos ay napanemteman nin aw-alagad na ya aghila nagbawon nin tinapay. 6Hapa--eg, hinalità konla ni Apo Hisos, "Pag-atapan moyo," wana, "ya pampalbag nin Pawparisiyo boy Sawsadosiyo." 7Ha ombayroy hinalità ni Apo Hisos ay andap nin aw-alagad no talagan pampalbag tinapay ya labay nan totolen. Kayà ni-i-ilgo hila, ya wanla, "Hinalità na bayto ta agtamo nagbawon tinapay." 8Tandà ni Apo Hisos no anyay ampi-i-ilgowan nin aw-alagad na; kayà hinalità na konla, "Talaga," wana, "nin kolang ya pantotompel moyo! Antà ampididiskosyonan moyo ya agmoyo pantan tinapay? 9Wari̇̀ ayin kawon pangingintindi? Wari̇̀ agmoyo angkapanemteman ya limay tinapay bongat ya pinamakan kon liman libo katawo, boy wari̇̀ agmoyo et angkapanemteman no ongnoy bakol ya napnò nin natipon moyoy natilà? 10Hapa et baytoy pitoy tinapay ya impakan ko ha apat ya libo katawo? Ongnoy bakol ya napnò nin natipon moyoy natilà? 11Antà agmoyo angka-intindiyan ya alwan tinapay ya labay kon totolen? Mag-atap kawo ha pampalbag nin Pawparisiyo boy Sawsadosiyo." 12Hapa--eg, na-intindiyan nin aw-alagad ya alwan pampalbag nin tinapay ya anhalita--en ni Apo Hisos nin pag-atapan la, no alwan hay pag-atapan la ay tawtorò nin Pawparisiyo boy Sawsadosiyo. 13Hapa--eg, hin ni-abot hili Apo Hisos ha danin banowan Sisarya Pilipo ay pinastang nay aw-alagad na, ya wana, "Anyay anhalita--en nin tawtawo? An-ihipen la wari̇̀ no hino ko ya an-ingaten Anak nin Tawo?" 14Tinombay hila kona, ya wanla, "Hay kanayon ay ampaghalità nin hika ay hi Howan Mamiminyag; hay kanayon ay ampaghalità nin hika ay hi propita Ilyas; hay kanayon itaman ay ampaghalità nin hika ay hi propita Hirimiyas o kanayon ya propita." 15"Hapa hikawo," wani Apo Hisos ha aw-alagad na, "an-ihipen moyo nayi̇̀ no hino ko?" 16Tinombay hi Simon Pidro, "Hika," wana, "hi Kristo ya impangakò nin Diyos boy hika ay anak nin Diyos ya angkabiyay." 17Hinalità kona ni Apo Hisos, "Makalmà ka," wana, "Simon ya anak ni Honas, ta habayti ya kaptegan ay alwan tawo ya nangipatandà komo, no alwan Tatay koy Diyos ya anti ha katatag-ayan ha kama-inan na. 18Leng--en mo bayti ya anhalita--en ko komo: hika, hay ngalan mo ay Pidro ya hay labay totolen ay bato. Hay pamapteg mo ya tongkol kongko ay kowinta bato ya mag--in pondasyon nin tawtawoy mipantompel kongko. Kayà ayin makatalo konla maski kamatyan. 19Komo ko an-ipatayà ya kowinta sosi̇̀ nin dogal ya ampag-ari--an nin Diyos, ta hika ya mama-alà ha tawtawo bayro. Hay agmo payagan bayri ha babon lotà ay ahè itaman payagan ha katatag-ayan ha kama-inan nin Diyos. Hay payagan mo bayri ha babon lotà ay payagan itaman ha katatag-ayan ha kama-inan nin Diyos." 20Hapa--eg, mahigpit nin imbibilin ni Apo Hisos ha aw-alagad na ya agla ibabalità ya hiya hi Kristo ya impangakò nin Diyos. 21Pa-ibat hin pana--on ya habayto ay inompisawan ni Apo Hisos nin impalinaw ha aw-alagad na ya mangyari kona. "Ka-ilangan akon mako ha siyodad nin Hirosalim," wana, "ta bayro ko danasen ya masyadoy kadya-dya--an ha mawmato--ay mangama--in katongkolan, pawpo--on nin pawpari̇̀, boy ha mawmangitorò nin kawkapanogo--an. Hiko ay patyen piro ha ikatlon allo ay mabiyay akon oman." 22Piro hi Apo Hisos ay impa-alilih ni Pidro ta hinalità na kona ya ombayri: "Pangino--on, habayti ay talagan ahè payagan nin Diyos nin mangyari komo ha ingangalo na." 23Hapa--eg hi Apo Hisos ay nagpeyeh nin inomarap koni Pidro biha na ya pinagtotolan, "Pakarayò ka kongko," wana, "Satanas. Hika ay hadlang kongko ta hay ka-ihipan mo ay ka-ihipan nin tawo, alwan ka-ihipan ya nangibat ha Diyos." 24Hapa--eg, hinalità ni Apo Hisos ha aw-alagad na, "Hinoman ya labay makilamo kongko," wana, "ay agna honolen ya sarili nan kalabayan, no alwan te-ehen nay kadya-dya--an nin bilang ampamalatay koroh nin magpalako ha kamatyan na ta makilamo ya kongko. 25Hinoman ya tawoy ampag-atap nin ahè mati ay mati et bongat, piro hinoman ya tawoy mati nin banà kongko ay malibri ta ma--in yan biyay ya ayin anggawan. 26Wari̇̀ ma--in mapakinabang ya tawoy makapag-ikon nin kaganawan kayamanan bayri ha babon lotà no hay kalolowa na ay mipalako ha impirno? No anti yayna ha impirno, ma--in ya wari̇̀ ma-ipambeh nin sarili na para magkama--in yan biyay ya ayin anggawan? 27Hiko ya an-ingaten Anak nin Tawo ay magbira bayri nin ma--in kagandawan ya ahè makwan ihipen ya bilang kagandawan nin Tatay koy Diyos. Kalamo koy aw-anghil nin mako bayri ta hosgawan koy tawtawo kompormi ha gawgawà nin balang miha konla. 28Anhalita--en ko komoyo ya kaptegan, ma--in ongno bayri komoyo ya ahè mati anggan agla ko makit ya an-ingaten Anak nin Tawo ya lomateng nin mamo--on."

will be added

X\