MATIYO 12

1Mihay allon Sabado ya allon pama-inawa nin Hawhodiyo, hili Apo Hisos ya antomalà ay niparaan ha ma--in tawtanaman ya trigo. Hay aw-alagad nay nabitil ay nipanggetè nin trigo ta kinan la. 2Hapa--eg, ma--in bayron Pawparisiyo ya nakakit konla. Kayà hinalità la koni Apo Hisos, "Biliwen moy aw-alagad mo," wanla. "Anggaw--en la ba--in ya ha kawkapanogo--an tamo ay labag gomawà nin ombahen no allon pama-inawa." 3Tinombay hi Apo Hisos, ya wana, "Wari̇̀ agmoyo et nabaha ya nakaholat ya ginawà ni Dabid hin hato hin binomitil ya kateng kawkalamowan na? 4Nilomo--ob ya ha bali nin Diyos ta nangwa yan tinapay ya indolog ha Diyos. Nangan yan hatoy tinapay boy pinakan nay kawkalamowan na maski kontra ha kawkapanogo--an tamo ya mangan nin habayto, ta hay ma-ari̇̀ bongat mangan nin habayto ay pawpari̇̀. 5Tandà moyo ya impanogò nin Diyos ya ahè magtrabaho no allon pama-inawa. Nabaha moyo et baytoy impaholat na koni Moysis ya hay pawpari̇̀ ay dapat gomawà ha bali nin Diyos maski allon pama-inawa. Kayà hila ay ayin kasalanan maski magtrabaho hila ha allon habayto. 6Piro anhalita--en ko komoyo ya hiko ya anti bayri ay mas ma--in katongkolan gomawà kisa hatoy ampipagtrabaho ha bali nin Diyos. 7Hay nakaholat ha Halità nin Diyos ay ombayri: 'Hay mas labay ko ay mi-i-ingalo kawo kisa mamati kawon aw-ayop ya ipo--ol nin idolog kongko.' No na-intindiyan moyo dayin mahampat bayto ay agmoyo hosgawan baytoy nanggawà nin alwan kasalanan. 8Hiko ya an-ingaten Anak nin Tawo ay ma--in karapatan maghalità no anyay tamà gaw--en no allon pama-inawa." 9Hapa--eg hi Apo Hisos ay nog-alih bayro ta nako yan nilomo--ob ha miha ha hawhimba--an nin Hawhodiyo. 10Bayro ay ma--in mihay lalaki ya hay mihay gamet ay ahè ma-igalaw ta kinomampil. Hapa--eg, ma--in bayron ampanikap nin bara--nan ya pangidimandawan la koni Apo Hisos. Kayà pinastang la ya nin ombayri: "Kompormi ha kawkapanogo--an," wanla, "tamà nayi̇̀ mamakahampat nin ampagmasakit no allon pama-inawa?" 11Tinombay konla hi Apo Hisos nin ombayri ya alimbawà: "No ma--in kan tawtopa ta hay miha ay natata ha malalè ya lobot ya nitag--on allon pama-inawa, agmo wari̇̀ i-alawah ha allon habayto ta ilibri mo? 12Lalò ana ya tawo, ta hay mihay tawo ay mas ma-alagà kisa ha mihay topa. Kayà alwan kontra ha kawkapanogo--an no manggawà kahampatan no allon pama-inawa." 13Hapa--eg, hinalità ni Apo Hisos do ha lalaki ya kinomampil ya gamet, "Ipaktang mo," wana, "ya gamet mo." Hin impaktang na, hay gamet na ay hinomampat ana ta nag--in nin bilang ombayro ha kagmang gamet na. 14Hapa--eg hatoy Pawparisiyo ay nog-alih ta pini-i-ilgowan la no pangno la mapati hi Apo Hisos. 15Hin natanda--an ni Apo Hisos baytoy tangkà la ay nog-alih ya ha dogal ya habayto. Malakè ya tawoy nakihono kona. Kaganawan nin ma--in masakit ay pinakahampat na, 16boy inhigpit nan imbibilin konla ya agla ibabalità ya tongkol kona. 17Bayri napaptegan ya holà ni propita Isayas ya ombayri ya pagkahalità: 18"Habayti ya magsisirbi koy pinili̇̀ ko; anlabiyen ko ya boy masyado kon ampangonsowilo kona. Igwà ko konay Ispirito ko, boy hiya ya mangibalità nin tongkol ha panonosga ko ha kaganawan tawo. 19Agya makidiskosyon o mambonghaw, ni mambo-angaw nin magdiskorso ha kalsara. 20Agna pa-olayan baytoy mangakapey ya pantotompel, no alwan tambayan nay ma--in amò ya pamahimalà kona. Agya tonggen anggan agna ma-ipanalo ya kaptegan, 21boy hay kaganawan tawo ay omasa kona." 22Hapa--eg, ma--in nako koni Apo Hisos ya ongno katawoy nantan nin mihay lalaki ya bowag boy ahè makapaghalità banà ha kagagaw--an nin dimonyoy pinomahok kona. Pinakahampat ni Apo Hisos baytoy lalaki; kayà nakakit ya boy nakapaghalità. 23Hatoy kalak--an tawoy anti bayro ya nakakit nin ginawà ni Apo Hisos ay nipag-ispanta, ya wanla, "Maka hiyayna baytoy impangakò nin Diyos ya alalak ni Ari̇̀ Dabid." 24Piro hin nalengè bayti nin Pawparisiyo ay hinalità la, "Ampakapa-alih ya," wanla, "nin dawdimonyo, ta hay ampambi kona nin kapangyariyan makagawà nin ombayro ay hi Bilsibob ya po--on nin dawdimonyo." 25Tandà ni Apo Hisos no anyay an-ihipen la. Kayà hinalità na konla, "No ma--in ari̇̀," wana, "ya hay ampag-ari--an na ay ampi-a-away ay ahè bomoyot ya pamomo--on na. Ombayro itaman ha mihay banowa o mihay pamilya ya ayin pamimimiha boy ampi-a-away ay mangapihihiyay. 26No kalabanen ni Satanas ya sarili na, pangno bomoyot ya pamomo--on na? 27No peteg ba--in ya anhalita--en moyo ya ampakapa-alih ako nin dawdimonyo ta binyan akon kapangyariyan ni Bilsibob ya hi Satanas, hapay kawkalamowan moyo, pangno hila ampakapa-alih nin dawdimonyo? Mismon kawkalamowan moyo ya ampamapteg nin hikawo ay talagan mali̇̀. 28Ispirito nin Diyos ya nambi kongkon kapangyariyan emen ako makapa-alih nin dawdimonyoy pinomahok ha tawtawo. Ha ombayro, angkapaptegan ya nilomateng ana ya pamomo--on nin Diyos komoyo." 29Hinalità et ni Apo Hisos, ya wana, "Hay bali nin makhaw ya tawo ay ayin makalo--ob manakaw nin kawkamama--in na no ahè pon balolen baytoy makhaw ya tawo. 30"Hinoman ya ahè an-omayon kongko ay kontra kongko. Hinoman ya ahè ampanambay nin mangipakarani kongko nin tawtawo ay ampangikakatak. 31Anhalita--en ko komoyo: hay tawtawo ay patawaren ha kaganawan kasalanan ya nagawà la boy hinalità la. Piro hinoman ya ampaghalità nin mala--et ya kontra ha Ispirito nin Diyos ay ayin kapatawaran maski makakano, ta ha ombayro ay an-itowad na nin hay gawgawà nin Ispirito nin Diyos ay gawgawà ni Satanas. 32Hinoman ya ampaghalità nin kontra kongko ya an-ingaten Anak nin Tawo ay ma--in kapatawaran, piro ayin kapatawaran ya ampaghalità nin mala--et ya kontra ha Ispirito nin Diyos." 33"Ma--in po--on kayo ya hay an-ibonga ay ma-alagà. Ma--in itaman kanayon ya po--on kayo ya hay an-ibonga ay ayin alagà. Hay kayo ay mabalayan ha bonga. 34Ombayro itaman komoyo. Hikawo ay bilang aw-otan ya ma--in dità, ta banà ha kala-etan moyo ay magaling kawon manggawà kala-etan. No anyay anti ha nakem nin tawo ay habaytoy anhalita--en na. 35Hay tawoy mahampat ya pagnanakem ay ampaghalità nin kahampatan. Hay tawo balè ya mala--et ya pagnanakem ay ampaghalità nin kala-etan. 36Anhalita--en ko komoyo: ha lomateng ya allon panonosga, kaganawan tawoy naghalità nin ayin kowintay halità ay ma-in tobayen ha Diyos. 37Hay panosgawan komo nin Diyos ay no anyay hinalità mo. No kahampatan ya hinalità mo ay agka parosawan nin Diyos, piro no kala-etan ya hinalità mo ay parosawan ka nin Diyos." 38Hapa--eg, ma--in ongnoy tawoy mangitorò nin kawkapanogo--an ya hinolat ni Moysis boy ongnoy Parisiyo ya naghalità koni Apo Hisos, ya wanla, "Apo, labay nawen makakit nin papag-ispantawan ya gaw--en mo." 39Hinalità konla ni Apo Hisos, "Masyado," wana, "nin la--et nin tawtawo hapa--eg pana--on ta inalih lay pantotompel la ha Diyos. Ampanikap kawon papag-ispantawan piro ayin ma-ipakit komoyo, no alwan hatoy nangyari hin hato koni propita Honas. 40Hi Honas ay lo--ob tatloy allo boy tatloy yabi nin anti ha lalè tiyan nin malhay ya ikan. Ombayro itaman kongko ya an-ingaten Anak nin Tawo, hiko ay itabon boy manatili ko ha lalè lotà nin lo--ob tatloy allo boy tatloy yabi. 41Ha allon panonosga, hay tawtaga Ninibi ay magriklamo nin tongkol komoyon tawtawo hapa--eg pana--on, ta pinaghehean lay kawkasalanan la hin nalengè lay in-aral ni Honas. Piro hikawo ay ahè naghehe ha kawkasalanan ya hay ampangaral komoyo hapa--eg ay ayin kanayon no alwan hiko ya mas et koni Honas. 42Ha allo nin panonosga, hay rayna ya na-ibat ha bandan bagatan ay magriklamo nin tongkol ha tawtawoy angkabiyay hapa--eg pana--on. Nilibot nay kagitnà nin habayti ya babon lotà ta nako ya bayrin nanlengè nin torò ni Ari̇̀ Solomon ya maronong, piro anhalita--en ko komoyo ya ma--in bayri hapa--eg nin mas maronong kisa koni Ari̇̀ Solomon." 43Hapa--eg, naghalità ana et hi Apo Hisos, ya wana, "No nog-alih ana ya mala--et ya ispirito ha tawoy pinahokan na ay antomalà ya ha lawak nin mamiliw pama-inawawan na. No ayin yan makit ay halita--en na ha sarili na ya ombayri: 44'Magbira ko do ha tawoy pina-iriyan ko.' Kayà nagbira ya ha tawoy pina-iriyan na. Nakit na ya hatoy tawo ay malinis boy ma-ayos, piro ayin kona ya Ispirito nin Diyos. 45Hapa--eg, nako ya nin nanagyat nin pitoy ispirito ya mas mala--et kisa kona ta mako hila nin pomahok do ha tawo. Kayà hatoy tawo ay lalò niloma--et ya gawgawà kisa hin ona. Ombayro et ya ampangyari hapa--eg ha tawtawoy mala--et ya pag-o-ogali̇̀." 46Mintras ampaghalità hi Apo Hisos do ha tawtawo ay nakalateng ya nanay na boy pawpatel nay lalaki. Anti hila ha likol nin ampanganti̇̀ ta labay lan mapagka-ilgo hi Apo Hisos. 47Miha ha tawtawoy anti bayro ay naghalità koni Apo Hisos, ya wana, "Hay nanay mo kateng pawpatel moy lalaki ay anti ha likol ta labay la kan mapagka-ilgo." 48Tinombay kona hi Apo Hisos, "Hino," wana, "ya antokoyen mon nanay ko boy pawpatel ko?" 49Hapa--eg, intorò na baytoy aw-alagad na boy hinalità na, "Hila bayti," wana, "ya nanay ko boy pawpatel ko. 50Hinoman ya anhomonol ha kalabayan nin Tatay koy anti ha katatag-ayan ha kama-inan na ay hila ya nanay ko boy pawpatel ko."

will be added

X\