MATIYO 1

1Habayti ya nakalistay ngawngalan nin tawo ya pinangibatan lahì ni Pangino--on Hisokristo ya alalak ni Dabid ya alalak itaman ni Abraham. 2Hay anak ni Abraham ay hi Isak; hay anak ni Isak ay hi Hakob; hay anak ni Hakob ay hi Hoda boy pawpatel na; 3hay anak ni Hoda koni Tamar ay hi Paris boy hi Sara; hay anak ni Paris ay hi Isrom; hay anak ni Isrom ay hi Aram; 4hay anak ni Aram ay hi Aminadab; hay anak ni Aminadab ay hi Nason; hay anak ni Nason ay hi Salmon; 5hay anak ni Salmon koni Rahab ay hi Bowos; hay anak ni Bowos koni Rot ay hi Obid; hay anak ni Obid ay hi Dyisi; 6hay anak ni Dyisi ay hi Arì Dabid. Hay anak ni Arì Dabid do ha ahawa ni Oriyas ay hi Solomon; 7hay anak ni Solomon ay hi Robowam; hay anak ni Robowam ay hi Abiyas; hay anak ni Abiyas ay hi Asa; 8hay anak ni Asa ay hi Hosapat; hay anak ni Hosapat ay hi Horam; hay anak ni Horam ay hi Osyas; 9hay anak ni Osyas ay hi Hotam; hay anak ni Hotam ay hi Akas; hay anak ni Akas ay hi Isikiyas; 10hay anak ni Isikiyas ay hi Manasis; hay anak ni Manasis ay hi Amos; hay anak ni Amos ay hi Hosyas; 11hay anak ni Hosyas ay hi Hikonyas boy pawpatel na ya in-anak hin pana--on nin hay Aw-israylita ay dinakep ta gintan ha Babilonya. 12Hapa--eg, hin nagtan anay Aw-israylita ha Babilonya, hi Hikonyas ay nagka-anak. Hay anak na ay hi Salatiyil; hay anak ni Salatiyil ay hi Sorobabil; 13hay anak ni Sorobabil ay hi Abiyod; hay anak ni Abiyod ay hi Ilyakim; hay anak ni Ilyakim ay hi Asor; 14hay anak ni Asor ay hi Sadok; hay anak ni Sadok ay hi Akim; hay anak ni Akim ay hi Ilyod; 15hay anak ni Ilyod ay hi Ilyasar; hay anak ni Ilyasar ay hi Matan; hay anak ni Matan ay hi Hakob; 16hay anak ni Hakob ay hi Hosi ya ahawa ni Mariya. Hi Mariya ya nangi-anak koni Apo Hisos ya an-ingaten et Kristo. 17Ha ombayri, ma--in labin-apat ya lahì pa-ibat koni Abraham angga koni Arì Dabid; boy pa-ibat koni Arì Dabid ay labin-apat et ya lahì angga hin hay Aw-israylita ay dinakep ta gintan ha Babilonya; boy pa-ibat hin nagtan hila ha Babilonya ay nagkama--in et nin labin-apat ya lahì angga hin in-anak hi Pangino--on Hisokristo. 18Ombayri ya pangyayari ya tongkol ha pangi-anak koni Pangino--on Hisokristo; hi Mariya ya nanay na ay kaba--an ni Hosi; piro biha hila nilamo, hi Mariya ay da--an anan naboktot ha panggogomawà nin Ispirito nin Diyos. 19Hi Hosi ya kaba--an ni Mariya ay pirmin ampanggawà kahampatan ta anhonolen nay kawkapanogo--an nin Diyos. Kayà nagdisisyon ya nin hira--en nay pamikaba--an la nin ayin makatandà ta agna labay mipareng--ey hi Mariya. 20Piro mintras an-ihipen bayti ni Hosi, hay mihay anghil nin Pangino--on ay napakit kona ha taynep ya naghalità kona nin ombayri: "Hosi ya alalak ni Dabid, agmo pag-alanganan nin pag-ahawa hi Mariya, ta hay imboktot na ay ha pangogomawà nin Ispirito nin Diyos. 21Manganak yan lalaki ya pangalanan mon Hisos, ta habayti hi Hisos ya mangilibri nin tawtawo na ha kawkasalanan la." 22Kaganawan nin habayti ya nangyari ay nagkapeteg ya impaholà nin Diyos ha propita na ya ombayri ya pagkahalità: 23"Mihay dalagay malinis ta ahè nagalaw nin lalaki ay mamoktot. I-anak nay mihay lalaki ya ingaten Imanwil." (Hay labay totolen nin Imanwil ay "Anti kontamoy Diyos".) 24Hapa--eg, hin naka-imata hi Hosi ay ginawà na baytoy immanda kona nin hatoy anghil. Nilako na hi Mariya ta pinag-ahawa na. 25Piro mintras ahè et in-anak ni Mariya baytoy imboktot na ay nanatili yan malinis ta agya pinakilalayan ni Hosi. Hapa--eg, hin nilomwah baytoy anak ay Hisos ya impangalan kona ni Hosi.

will be added

X\