MARKOS 4

1Hapa--eg hi Apo Hisos ya antin oman ha ambay dagat ay nag-ompisayna et nin manorò. Banà ha kalak--an tawoy nakitipon kona ay hinomapat ya ha bangkà ta bayro ya niknò nin manorò. Hay tawtawo itaman ay anti ha lakatan nin ampanlengè. 2Malakè ya bagay ya an-itorò konla ni Apo Hisos ya aw-alimbawà. 3Hinalità konla ni Apo Hisos, "Leng--en moyo!" wana. "Ma--in mihay lalaki ya nakon nanabwag. 4Ha pangihabwag na ay ma--in ongnoy pahì ya natata ha daan. Hatoy pawpahì ya nikatata ha daan ay kinan nin mawmanokmanok. 5Ma--in itaman pawpahì ya nikatata ha babon matampiyak ya bato ya ma--in amò ya lotà. Habaytoy pawpahì ay tampol tinomobò, ta alwan makodpaw ya lotà ya nakataphon. 6Hapa--eg, hin inomamot ya hilà allo, hatoy pawpahì ya tinomobò ay nalaneh anggan nayangoh ta mababoy pinanyamotan. 7Hay kanayon ya pawpahì ay nikatata ha antobo--an nin ampangayakay ya dawdikot ya madowih. Hin tinomobò baytoy pawpahì ay tinomobò itaman baytoy ampangayakay ya dawdikot ya madowih. Kayà ahè nakabonga baytoy pawpahì ya tinomobò ta napolopotan nin hatoy ampangayakay ya dawdikot ya madowih. 8Piro ma--in pawpahì ya nikatata ha maganday lotà. Habaytoy pawpahì ay tinomobò nin mahampat boy namonga. Ma--in pinaka-alawahanan tatlompò, ma--in pinaka-alawahanan anemapò, boy ma--in pinaka-alawahanan magato. 9Hay ka-ilangan moyo," wana et ni Apo Hisos, "ay manlengè mahampat nin habayti ya anhalita--en ko biha moyo honolen." 10Hapa--eg, hin ayin ana baytoy malakè ya tawo, hi Apo Hisos ay pinastang nin labinloway alagad na kateng hatoy kanayon ya kawkalamowan na no anyay labay totolen nin hatoy aw-alimbawà na. 11Hinalità konla ni Apo Hisos, "Komoyo," wana, "inggawà ya pangingintindi nin sawsikrito ya tongkol ha pamomo--on nin Diyos; piro ha kanayon ya tawtawo, kaganawan bagay ya itorò konla ay i-alimbawà emen matopad bayti ya holà hin hato: 12'Manegteg hila man anan manegteg ay aghila makakit. Manlengè hila man anan manlengè ay aghila maka-intindi; ta no angka-intindiyan la ay pakarani hila ha Diyos. Hay Diyos itaman ay mambi konla nin kapatawaran.' " 13Hapa--eg, hinalità ni Apo Hisos ha aw-alagad na, ya wana, "Warì agmoyo na-intindiyan baytoy hinalità koy alimbawà? No agmoyo angka-intindiyan bayto ay pangno moyo man awod ma-intindiyan ya maski anyay alimbawà? 14Hay Halità nin Diyos ay kowinta inhabwag nin mananabwag. 15Hay ka-alimbawa--an nin hatoy daan ya kinatatawan nin pawpahì ay tawtawoy nakalengè Halità nin Diyos, piro tampol inalih ni Satanas ha nakem la baytoy nalengè lay Halità nin Diyos. 16Hatoy matampiyak ya bato ya ma--in amò ya lotà ya kinatatawan nin pawpahì ay bilang ha tawtawo ya nakalengè nin Halità nin Diyos. Hin nalengè la bayto, antimano, tinanggap la nin ma--in kaligawan. 17Piro hay Halità nin Diyos ay ahè nakayamot ha nakem la boy kadodomalì bongat ya pananggap la. No ma--in anlomateng ya angkagolowan ihip la, boy no ampagkama--in hila nin kawkadya-dya--an nin banà ha Halità nin Diyos ay angka-alin antimano ya pantotompel la. 18"Hatoy lotà ya ma--in ampangayakay ya dawdikot ya madowih ya kinatatawan nin pawpahì ay bilang simpri ha tawtawoy nakalengè nin Halità nin Diyos. 19Piro banà ha bawbagay ya angkagolowan la ha biyay la, ha kalabayan la nin yomaman, boy ha paghangad la nin kanayon ya bawbagay, hila ay kowinta pawpahì ya tinomobò ya napolopotan nin ampangayakay ya dawdikot ya madowih. Kayà hay Halità nin Diyos ya nalengè la ay ahè namonga ha biyay la. 20Hatoy maganday lotà ya kinatatawan nin pawpahì ay bilang ha tawtawo ya nanlengè nin Halità nin Diyos. Habaytoy nalengè lay Halità nin Diyos ay pininto--o la, boy nakapibongan kahampatan ha biyay la nin emen ha pawpahì ya ma--in namongan tatlompò, ma--in anemapò, boy ma--in namongan magato." 21Hi Apo Hisos ay naghalità ana et konla, ya wana, "Warì hay kingki ya andongket ay anhalokoban nin kalaying o an-itagò ha hilong katri? Warì ahè an-igwà ha talagan pangigwa--an? 22Ayin nakatagò ya ahè mipatnag, boy ayin sikrito ya ahè mibolgar. 23Hay ka-ilangan moyo," wana et ni Apo Hisos, "ay manlengè mahampat nin habayti ya anhalita--en ko biha moyo honolen." 24Hinalità ana et ni Apo Hisos, "Pakaleng--en moyon mahampat," wana, "ya an-itorò ko, ta no leng--en moyo, hay Diyos ay mambi komoyo nin pangingintindi boy lalò nan ipa-intindi komoyo. 25Hay tawoy ampinto--o ha bagay ya an-ipa-intindi kona nin Diyos ay lalò maka-intindi ha an-ipa-intindi kona. Piro hay tawoy ahè ampinto--o ha an-ipa-intindi kona nin Diyos ay alihen et ha nakem na baytoy amò ya na-intindiyan na." 26Ombayri et ya alimbawà ni Apo Hisos: "Hay pamomo--on nin Diyos ay bilang ha lalaki ya nanabwag nin binì. 27Hin nayarì nan inhabwag ay patoloy yan magtrabaho nin allo-allo. No yabi ay matoloy ya. Habayti ya inhabwag na ay agna tandà no pangno anlomhì boy no pangno antomobò. 28Hay lotà ya ampakapatobò boy ampakapabonga nin hatoy intanem, ta hay ampangyari ay ombayri: tomobò pon biha homwak, bayo manlaman ya pawpahì. 29No mato-ayna ay alawahanen ana nin hatoy lalaki ya nanabwag." 30"Anya et," wani Apo Hisos, "ya pangiparisan tamo nin pamomo--on nin Diyos boy anya et ya pangi-alimbawa--an tamo? 31Hay pamomo--on nin Diyos ay ayin imbalag ha bot--on mostasa ya pinakamayamò ya bot--o ha kaganawan an-itanem. 32No na-itanem ana, maski pinakamayamò bayto, pantomobò ay anhomlay nin mas et ha kanayon ya po--on gawgolay. Kayà hay mawmanokmanok ay ampipanayi ha mangalhay ya hawhanga nin habayto." 33Hay Halità nin Diyos ya an-i-aral konla ni Apo Hisos ay anggamitan na nin bilang ombayri ya alimbawà kompormi ha kaya lan intindiyen. 34Panay alimbawà ya anggamiten na ha pangi-aral na konla; piro no hilahilan bongat nin aw-alagad na ay an-ipalinaw na konla ya labay totolen nin habaytoy aw-alimbawà na. 35Lomateng ya mahilem nin habayton allo, hinalità ni Apo Hisos ha aw-alagad na, "Lomipay tamo," wana. 36Hapa--eg, hay aw-alagad ay hinomapat do ha bangkà ya anhakyan ni Apo Hisos. Inalihan la baytoy kalak--an tawo ta nanigè hilayna, boy ma--in et ongnoy bangkà ya anhakyan nin tawtawoy nakilako konla. 37Mintras anlomipay hili Apo Hisos ay biglà hinomkaw ya angin. Hay bangkà la ay halos lomdeg ana ta angkahipwakan nin mangalhay ya dawoyon. 38Hin habayto, hi Apo Hisos ya anti ha bandan hoyotan nin bangkà ay naka-onan ya angkatoloy. Pinokaw ya nin aw-alagad na, ya wanla kona, "Pangino--on, lomdeg tamoyna, ayin nayì kowinta komo ya mati tamo?" 39Nibangon hi Apo Hisos ta minandawan nay angin nin tonggen boy hinalità na ha dagat, "Pakatinek ka!" wana. Hapa--eg, tinonggen baytoy pagkahokaw angin boy hay dagat ay tinominek. 40Hinalità ni Apo Hisos ha aw-alagad na, ya wana, "Antà angkalimo kawo? Warì ayin kawo et katetpel?" 41Hay limo lan masyado boy hay ispanta la; kayà hinalità la ha miha ta miha, "Anyan magkatawowan bayti ta maski angin boy dawoyon ay anhomonol kona?"

will be added

X\