MARKOS 11

1Hili Apo Hisos ay marani ana ha siyodad nin Hirosalim ta anlomateng hilayna ha banowan Bitpahi boy banowan Bitanya. Hapa--eg, hin anti hilayna ha bakilbakil ya an-ingaten Bakil nin Aw-olibo ay pina-ona ni Apo Hisos ya loway alagad na, 2ya wana, "Mako kawo bahen ha banowa ya anti ha bandan onawan tamo. Pami-abot moyo bahen ay ma--in kawon makit ya mihay oybon asno ya nakapotal ya ahè et nahahakyan. Oka--an moyo bayto ta gitan moyo bayri. 3No ma--in mamastang komoyon 'Antà an-oka--an moyo bayti?' ay halita--en moyo kona ya ombayri: 'Habayti ay ka-ilangan nin Pangino--on. Ayin bali ta tampol nan i-orong.' " 4Hapa--eg, nanigè ana baytoy loway inhogò. Hin nakit la baytoy oybon asno ya nakapotal ha likol polta ha danin kalsara ay an-oka--an layna. 5Nakit hila nin ongnoy tawo ya anti bayron naka-ireng. Kayà pinastang la hila, ya wanla, "Antà an-oka--an moyo ba--in ya asno?" 6Hin intobay la baytoy hinalità konla ni Apo Hisos ay pinayagan hila nin hatoy ongnoy tawo nin gitan baytoy asno. 7Hatoy oybon asno ay gintan nin hatoy loway alagad koni Apo Hisos. Hay aw-alimenmen la ay inhapin la ta hinomakay hi Apo Hisos. 8Hapa--eg, ha kalsara ya pagdanan ni Apo Hisos ay malakè ya tawoy nangi-aplak nin aw-alimenmen la. Hay kanayon itaman ay namotoh nin mabolong ya hawhangan kayo ha lawak ta in-aplak la bayro ha pagdanan ni Apo Hisos. Ombayroy ginawà la banà ha pangigalang la kona. 9Hay tawtawoy anti ha onawan ni Apo Hisos kateng hatoy anti ha hoyotan ay ampipambo-angaw banà ha kaligawan la, ya wanla, "Yehey! Bindisyonan nin Diyos ya anlomateng ha ngalan nin Pangino--on! 10Bindisyonan nin Diyos ya anlomateng ya pamomo--on nin bilang ha pamomo--on ni Ari̇̀ Dabid ya ka-apo-apowan tamoy ari̇̀ hin hato! Poriyen ya Diyos ya anti ha katatag-ayan!" 11Hapa--eg hili Apo Hisos ay ni-abot ha siyodad nin Hirosalim. Nilomo--ob ya ha bali nin Diyos ta biniliw nay kaganawan ampangyari ha mamalibot bayro. Banà ta anyomabi ana hin habayto ay agya naboyot bayro, ta nako ya ha banowan Bitanya nin kalamo nay labinloway alagad na. 12Ika-ibokah, hin naka-alih ana hili Apo Hisos ha banowan Bitanya, hiya ay binomitil. 13Natamolawan nay mihay po--on kayoy igos ya mabolong. Nagpalako bayro hi Apo Hisos ta biliwen na no ma--in bonga bayto. Hin ni-abot ya bayro ay ayin yan nakit ya bonga no alwan bawbolong bongat, ta alwa et pana--on pamonga nin habayto. 14Hinalità ni Apo Hisos bayro ha po--on kayo, "Maski makakanoman," wana, "ay ayin anan mangan nin bonga mo ta agkayna mamonga." Habaytoy hinalità ni Apo Hisos bayro ha po--on kayo ay nalengè nin aw-alagad na. 15Hin nakalateng hili Apo Hisos ha siyodad nin Hirosalim ay nilomo--ob ya ha bali nin Diyos. Bayro ha kolob nin habayto ay ma--in ampipaglakò boy ampipanaliw. Hapa--eg, inompisawan hila ni Apo Hisos nin ipataboy, boy intomba nay lawlamisita nin ampipamahili nin kowalta kateng bawbangkò nin ampipaglakò nin kawkalapati. 16Agna simpri pinayagan nin magdaan bayro ha kolob bali nin Diyos ya hinoman ya mangama--in kawkarga. 17Hapa--eg, tinoro--an ni Apo Hisos baytoy tawtawoy anti bayro biha na hinalità, "Alwa nayi̇̀," wana, "nin nakaholat ha Halità nin Diyos ya ombayri: 'Hay bali ko ay ingaten balin panalanginan nin tawtawo ya angka-ibat ha maski ayrin nasyon'? Piro ginawà moyo," wani Apo Hisos, "nin kowartil nin tawtolisan." 18Hin nabalita--an nin pawpo--on nin pawpari̇̀ kateng mawmangitorò nin kawkapanogo--an baytoy gawgawà ni Apo Hisos ay ampanggawà hilan paraan emen la ya ma-ipapati. Piro angkalimo hila koni Apo Hisos ta labaylabay nin tawtawo ya tawtorò na. 19Hin yabi ana, hi Apo Hisos kateng aw-alagad na ay nog-alih bayro ha siyodad. 20Lomateng ya bayombokah, ha pagbira nili Apo Hisos ha siyodad nin Hirosalim ay niparaan hila ha dani nin hatoy po--on kayoy igos. Nakit la baytoy kayo ya nayangoyna. 21Na-ihipan ni Pidro baytoy tongkol do ha kayo; kayà hinalità na koni Apo Hisos, ya wana, "Biliwen mo, Apo, haba--in ya po--on kayoy igos ya inhompà mo ay nayangoyna." 22Hinalità ni Apo Hisos bayro ha aw-alagad na, "Tompel kawo ha Diyos," wana. 23"Anhalita--en ko komoyoy kaptegan: no halita--en nin mihay tawo bahen ha bakil ya, 'Mitapon ka ha dagat,' ta leseb ha nakem na ya paghalità na nin ombayro ay talagan mangyari baytoy hinalità na. 24Kayà anhalita--en ko komoyo, anyaman ya bagay ya ida-ing moyon ipanalangin ha Diyos ay ipalagay moyon natanggap moyoyna ta talaga man matanggap moyo. 25No manalangin kawo ha Diyos nin ma--in kawon irap nakem ha maski hino ay patawaren moyo ya pon emen hay Tatay moyoy Diyos ha katatag-ayan ha kama-inan na ay mamatawad itaman nin kawkasalanan moyo kona. 26No agkawo mamatawad ha kanayon, hay Diyos ya Tatay moyo ha katatag-ayan ha kama-inan na ay ahè itaman mamatawad nin kawkasalanan moyo." 27Hapa--eg hili Apo Hisos ay nagbiran oman ha siyodad nin Hirosalim ta nako ya ha bali nin Diyos. Mintras ampi-o-owako ya bayro ha lo--ob bali nin Diyos ay pinakaraniyan ya nin pawpo--on nin pawpari̇̀, mawmangitorò nin kawkapanogo--an, kateng mawmato--ay mangama--in katongkolan. 28Pinastang la hi Apo Hisos, "Anya," wanla, "ya katongkolan mo nin manggawà nin ombayri ya bawbagay bayri ha bali nin Diyos, boy hinoy nambi komo nin ombayroy katongkolan?" 29Tinombay konla hi Apo Hisos, ya wana, "Ma--in ako pon nin mihay pastang komoyo. No matbay moyo ay ibalità ko komoyo no hinoy nambi kongkon katongkolan nin manggawà nin ombayroy bawbagay. 30Ayri," wana, "nangibat ya katongkolan ni Howan nin maminyag, ha Diyos nayi̇̀ o ha tawo? Tobayen moyo ko," wani Apo Hisos. 31Hilahila ay ampididiskosyon boy ma--in ampaghalità nin ombayri: "No halita--en tamo ya nangibat ha Diyos ya paminyag ni Howan ay halita--en na kontamo ya 'Antà awod agmoyo pininto--o hi Howan?' 32Piro no halita--en tamo itaman ya nangibat ha tawo ay maka pahangan tamo nin tawtawo." (Angkalimo hila ha tawtawo ta kaganawan tawo ay ampipampinto--o nin hi Howan Mamiminyag ay propita nin Diyos.) 33Kayà hay intobay la koni Apo Hisos ay ombayri: "Agnawen," wanla, "tandà no hinoy nambin katongkolan koni Howan." Hinalità konla ni Apo Hisos, "Hiko man ay ahè itaman maghalità komoyo no hinoy nambi kongkon katongkolan nin manggawà nin ombayroy bawbagay."

will be added

X\