MARKOS 10

1Hi Apo Hisos ay nog-alih ha probinsyan Galiliya, ta nako ya ha probinsyan Hodiya. Hapa--eg, nilomipay ya ha balah nin Hordan. Hin ni-abot ya ha kagmang ay malakè ya tawoy nakitipon kona. Banà ta naka-ogali--an nay manorò ay ombayroy ginawà na. 2Bayro ay ma--in ongnoy Parisiyo ya napakarani koni Apo Hisos. Labay la yan hagpen ha pag-i-ilgo na; kayà nagpastang hila kona nin ombayri: "Ha kawkapanogo--an nayi̇̀ ay ampayagan ya lalaki nin mangihiyay nin ahawa na?" 3Pastang itaman ya intobay konla ni Apo Hisos, ya wana, "Anyay immanda komoyo ni Moysis ya tongkol ha pangihiyay nin ahawa?" 4"Hay lalaki," wanla, "ay pinayagan ni Moysis nin mangihiyay ahawa, piro biha na ihiyay ya ahawa na ay manggawà ya pon nin kaholatan." 5Hinalità konla ni Apo Hisos, "Hay bara--nan," wana, "nin panolat ni Moysis nin habayti ya kapanogo--an ay banà ha katya--an nin nakem nin kawka-apo-apowan moyo. 6Piro hin ka-ona-onawan pana--on, hin pinalsa nin Diyos ya kaganawan ay namalsa yan lalaki boy babayi; 7boy hinalità na, ya wana, 'Hay lalaki ay makihiyay ha mawmato-antawo na ta makilamo ya ha ahawa na, 8boy hilay lowa ay mag--in mimiha.' Ha ombayro," wana et ni Apo Hisos, "hila ay alwaynan lowa no alwan mimihayna. 9Kayà hay pinilamo nin Diyos ay ahè pihiyayen nin tawo." 10Hin anti ana ha bali hili Apo Hisos, hay aw-alagad na ay nagpastang et kona nin tongkol ha pamihiyay nin mita-ahawa. 11Hinalità na konla, "Hinoman ya lalaki," wana, "ya mangihiyay nin ahawa ta makikahal ha kanayon ya babayi ay ampagkasalanan ya ha ahawa na ta ampamabayi ya. 12Ombayro itaman, hinoman ya babayi ya makihiyay ha ahawa ta makikahal ha kanayon ya lalaki ay ampagkasalanan ya ha ahawa na ta ampakilalaki ya." 13Hapa--eg, ma--in tawtawoy nipantan nin mangayamò ya aw-anak ta ipa-aptoh la koni Apo Hisos emen mabindisyonan, piro anha-aren nin aw-alagad. 14Hin nakit ni Apo Hisos baytoy aw-anak ya anha-aren nin aw-alagad nin pakarani kona ay pinamahangan nay aw-alagad na, ya wana konla, "Hay aw-anak ay agmoyo ha-aren no alwan pa-olayan moyo hilan pakarani kongko, ta hay pamomo--on nin Diyos ay anti ha tawtawoy ma--in pamahimalà kona nin bilang ombayri ha pamahimalà nin habayti ya mangayamò ya aw-anak. 15Anhalita--en ko komoyoy kaptegan: hinoman ya ahè ampananggap nin pamomo--on nin Diyos nin bilang ha mayamò ya anak ay ahè mapalamo ha tawtawoy ampag-ari--an nin Diyos." 16Hapa--eg, inampon ni Apo Hisos nin mihamiha baytoy aw-anak ta inaptoh na hilan binindisyonan. 17Hin ampanigè ana hili Apo Hisos ay ma--in lalaki ya nowayon nakon nanalimokod ha arapan ni Apo Hisos ta nagpastang, ya wana, "Mahampat ya mangangaral, anyay dapat kon gaw--en emen ako magkama--in nin biyay ya ayin anggawan?" 18Tinombay kona hi Apo Hisos, ya wana, "Antà an-ingaten mo kon mahampat? Ayin kanayon ya mahampat no alwan Diyos. 19Tandà moy pawpanogò nin Diyos: 'Agka mamatin tawo; agka makilalaki o mamabayi; agka manakaw; agka manistigos nin ayin kaptegan; agka mana--ol; boy igalang moy tatay mo boy nanay mo.' " 20Hatoy lalaki ay tinombay koni Apo Hisos, ya wana, "Mangangaral, kaganawan nin habayti ay anhonolen koyna pa-ibat hin anak ako et." 21Hapa--eg, tinegteg ni Apo Hisos baytoy lalaki ta nilabi na ya boy hinalità na kona, ya wana, "Ma--in et mihay bagay ya ka-ilangan mon gaw--en. Morong ka ta ilakò moy kaganawan kamama--in mo, ta hay napaglako--an ay igwà mo ha mawmanga-irap emen ka magkama--in nin kayamanan ha katatag-ayan ha kama-inan nin Diyos. Pangayari̇̀ mon gaw--en bayto ay magbira ka bayri ta makilamo ka kongko." 22Hin nalengè nin hatoy lalaki baytoy hinalità ni Apo Hisos ay inomahem ya lopa na. Malelè yay norong ta hay kamama--in na ay pagkalalakè. 23Hapa--eg hi Apo Hisos ay nanegteg ha mamalibot na biha na hinalità ha aw-alagad na, "Hay tawoy mayaman," wana, "ay ma-irap mapalamo ha tawtawoy ampag-ari--an nin Diyos." 24Habaytoy hinalità ni Apo Hisos ay pinag-ispantawan nin aw-alagad na. Hapa--eg, hinalità nan oman konla, "Aw-anak," wana, "hay tawo ay talagan ma-irap mapalamo ha tawtawoy ampag-ari--an nin Diyos. 25Mas maparah et ha mihay kamel ya magdaan ha lobot nin karayem, kisa ha mihay mayaman ya mapalamo ha tawtawoy ampag-ari--an nin Diyos." 26Hay aw-alagad ni Apo Hisos ay masyadon nag-ispanta do ha hinalità na; kayà nagpastang hila, ya wanla, "No ombayro, hinoman awod ya malibri?" 27Tinegteg hila ni Apo Hisos boy wana konla, "Ahè ma-ilibri nin tawo ya sarili na, no alwan Diyos ya mangilibri kona, ta kaganawan bagay ay ma-ari̇̀ pangyariyen nin Diyos." 28Hapa--eg, hinalità ni Pidro koni Apo Hisos, ya wana, "Imbalag nawen ya kaganawan ta nakilamo kayi komo." 29Hinalità konla ni Apo Hisos, ya wana, "Anhalita--en ko komoyo ya kaptegan: hinoman ya mangibalag nin pamamali na, o pawpatel na, o mawmato-antawo na, o aw-anak na, o lotà na nin banà kongko boy banà ha pangi-aral na nin Mahampat ya Balità 30ay matanggap nan kamagatoy bisis ha pana--on ya kasalokoyan. Magkama--in ya nin bawbali, pawpatel, nawnanay, aw-anak, boy lawlotà maski ampagdanas ya nin kawkadya-dya--an. Lano ha biyay ya miha ay agya matin oman ta ma--in yan biyay ya ayin anggawan. 31Malakè ya ampagmalhay hapa--eg, piro lano ay mag--in hilan pinaka-oltimo ha tawtawoy ampag-ari--an nin Diyos. Malakè itaman ya ampagma-aypà hapa--eg, piro lano ay mag--in hilan matag--ay ha tawtawoy ampag-ari--an nin Diyos." 32Hapa--eg hili Apo Hisos ay anti ha daan nin magpalako ha siyodad nin Hirosalim. Ha pamowako la ay angka-ona hi Apo Hisos. Hay aw-alagad na ay nipag-ispanta boy nikalimo baytoy kanayon ya tawtawoy ampipampakihono kona, ta tandà la ya ha Hirosalim ay ma--in tawtawoy ampipag-inakit koni Apo Hisos. Hapa--eg hatoy labinloway alagad ni Apo Hisos ay impa-alilih na do ha tawtawo ta hinalità na konla ya mangyari kona. 33"Ampagpalako tamo," wana, "ha Hirosalim. Bayro, hiko ya an-ingaten Anak nin Tawo ay igwà ha pawpo--on nin pawpari̇̀ boy ha mawmangitorò nin kawkapanogo--an. Sintinsyawan la ko nin patyen boy igwà ha alwan Hawhodiyo. 34Hiko ay pagsistiyan nin hatoy alwan Hawhodiyo, dol--an la ko, barogen, biha la ko patyen, boy lomateng ya ikatlon allo ay mabiyay akon oman." 35Hapa--eg hay aw-anak ni Sibidiyo ya hi Santiyago boy hi Howan ay napakarani koni Apo Hisos ta hinalità la kona, "Apo," wanla, "ma--in kayi dayi nin awoken komo." 36"Anyay labay moyon awoken kongko?" wani Apo Hisos. 37Tinombay hila kona, ya wanla, "Awoken nawen dayi ya pamiknò mo lano ha trono do ha ampag-ari--an mo ay payagan mo kayin miknò ha dani mo, miha ha bandan wanan mo boy miha ha bandan oki mo." 38Tinombay konla hi Apo Hisos, "Agmoyo," wana, "angka-intindiyan ya an-awoken moyo. Makat--eh kawo wari̇̀ ha kadya-dya--an ya te-ehen ko? Mat--eh moyo wari̇̀ ya kawka-irapan ya danasen ko?" 39"Awò," wanla, "kaya nawen." Hapa--eg, hinalità konla ni Apo Hisos, ya wana, "Talagan peteg nin te-ehen moyoy kadya-dya--an ya te-ehen ko boy danasen moyoy ka-irapan ya danasen ko. 40Ombayro man ay alwan hikoy magdisisyon no hinoy miknò ha bandan wanan ko boy ha bandan oki ko. Habaytoy ikno--an ay para ha tawtawoy hinanda--an nin Diyos." 41Hatoy mapò ya alagad ay namahang hin natanda--an la baytoy an-awoken ni Santiyago boy Howan koni Apo Hisos. 42Kayà iningat ni Apo Hisos nin pakarani kona ya kaganawan alagad na, ta hinalità na konla, ya wana, "Tandà moyo ya hay ampipamo--on ha alwan Hawhodiyo ay an-ipagpalangkà lay pamomo--on la, boy hay kanayon ya ma--in katongkolan ay ampamo--on nin sapilitan. 43Agmoyo gaw--en baytoy ombayro. Hinoman komoyo ya labay maka-igit ay ka-ilangan magsirbi. 44Hinoman komoyo ya labay mangona ay ka-ilangan magsirbi ha kaganawan nin emen ha alilà. 45Hiko ya an-ingaten Anak nin Tawo ay ahè nako bayri ha babon lotà nin sirbiyan, no alwan nako ko bayri nin magsirbi, boy hay biyay ko ay igwà ko nin pambeh nin malakè ya tawo." 46Hapa--eg hi Apo Hisos kateng aw-alagad na boy malakè et ya tawo ay nagdaan ha banowan Hiriko. Ha pagdaan la bayro ay ma--in mihay mamakilimoh ya bowag ya ampiknò ha pingit daan. Habayti ya bowag ay hi Bartimyo ya anak ni Timyo. 47Hin nalengè na ya ampagdaan bayro hi Apo Hisos ya taga Nasarit ay nambo-angaw ya, ya wana, "Apo Hisos ya alalak ni Ari̇̀ Dabid, ingalowan mo ko!" 48Hinalità nin tawtawo kona ya agya magtelek, piro lalò yayna ingat nambo-angaw. "Alalak ni Dabid," wana, "ingalowan mo ko!" 49Hin nalengè ni Apo Hisos baytoy bo-angaw ay tinonggen ya boy hinalità na, "Ingaten moyo ya," wana. Hapa--eg, hinalità nin hatoy tawtawo do ha bowag, "Magtowà ka," wanla, "mireng ka ta an-ipa-ingat na ka nin mako kona." 50Hapa--eg, imbol-ihan nay alimenmen na, biglà yan nireng, biha ya nako koni Apo Hisos. 51Pinastang ya ni Apo Hisos, ya wana, "Anyay labay mon gaw--en ko komo?" "Apo," wana, "labay ko dayin makakit!" 52Hinalità kona ni Apo Hisos, "Manigè kayna," wana. "Banà ha katetpel mo ay hinomampat ka." Antimano, nakakit ya boy nakilako ya koni Apo Hisos.

will be added

X\