LOKAS 4

1Hapa--eg hi Apo Hisos ya kapiyari̇̀ bininyagan ay napnò Ispirito nin Diyos. Nog-alih ya do ha balah nin Hordan ta pinangonawan ya nin Ispirito nin Diyos nin mako ha powiray dogal. 2Ha lo--ob nin apatapò ya allon antomalà hi Apo Hisos do ha powiray dogal ay antokso--en ya ni Satanas. Hi Apo Hisos ay ahè ampangan peleg nin habayton apatapò ya allo. Kayà hin nalabah baytoy apatapò ya allo nin agna pamangan, hiya ay binomitil. 3Hinalità ni Satanas koni Apo Hisos, "No hika," wana, "ay Anak nin Diyos, habayti ya bato ay mandawan mo nin mag--in tinapay." 4Tinobay ni Apo Hisos hi Satanas, ya wana, "Ha Halità nin Diyos ay nakaholat ya ombayri: 'Hay tawo ay ahè mabiyay ha pamamangan bongat.' " 5Hapa--eg, gintan ni Satanas hi Apo Hisos ha matag--ay ya dogal, ta impakit na konan domali̇̀ ya kaganawan ka-ari--an ha babon lotà. 6Hinalità ana et kona ni Satanas, "Igwà ko komo," wana, "ya kaganawan kapangyariyan boy kaganawan kamama--in nin habayti ya babon lotà, ta inggawà kongko bayti; ma-igwà ko ha hinoman ya labay kon biyan. 7Kayà, no manalimokod kan homamba kongko ay igwà ko komo bayti ya kaganawan." 8Tinombay hi Apo Hisos, ya wana, "Ombayri ya nakaholat ha Halità nin Diyos: 'Homamba ka ha Pangino--on mon Diyos, boy hiyan bongat ya pagsirbiyan mo.' " 9Hapa--eg hi Apo Hisos ay gintan ni Satanas ha siyodad nin Hirosalim, ta in-oli̇̀ na ya ha pinakamatag--ay ya bobongan bali nin Diyos. "No hika," wani Satanas, "ay Anak nin Diyos, magtaboy kan pa-ibat bayri; 10ta hay nakaholat ya Halità nin Diyos ay ombayri: 'Ihogò nin Diyos ya aw-anghil nan mangi-atap komo ha kawkadisgrasyawan, 11boy alalayan la ka emen hay bitih mo ay ahè makhitan nin bato.' " 12Tinombay ana et hi Apo Hisos koni Satanas, "Piro ombayri itaman," wana, "ya nakaholat ha Halità nin Diyos: 'Agmo hoboken ya Pangino--on mon Diyos.' " 13Hin nayari̇̀ nin tinoksò ni Satanas hi Apo Hisos ha kaganawan klasin panonoksò ay inalihan na ya ta birawen na ya no magkama--in yan maganday oportonidad. 14Hi Apo Hisos ya ma--in kapangyariyan nin Ispirito nin Diyos ay nagbira ha probinsyan Galiliya, boy hay balità ya tongkol kona ay nibahwag ha kaganawan tawo ha mamalibot nin habaytoy dogal. 15Hiya ay ampako ha hawhimba--an nin Hawhodiyo ta ampanorò, boy kaganawan tawo ay ampamori kona. 16Hapa--eg hi Apo Hisos ay norong ha Nasarit ya banoway hinolayan na. Bilang ha da--an nan panggaw--en no allon pama-inawa, hiya ay nako ha himba--an nin Hawhodiyo. Hapa--eg, nireng ya bayron mamaha nin Halità nin Diyos. 17Hay nakalolon ya papil ya hinolat ni propita Isayas ay inggawà koni Apo Hisos. Hapa--eg, inwadwad na ta biniliw nay pinangiholatan nin hatoy nakaholat ya ombayri ya pagkahalità: 18"Hay Ispirito nin Pangino--on ay anti kongko, ta hiko ay pinili̇̀ na nin mangi-aral nin Mahampat ya Balità nin Diyos ha tawtawoy manga-irap. Inhogò na ko nin mangilibrin tawtawoy anti ha gamet nin kawka-away la, boy mamakahampat nin mata nin bawbowag emen hila makakit. Inhogò na ko et nin mambin kalibriyan ha tawtawoy an-apiyen, 19boy mangibalità no makanoy pana--on nin ilibri nin Pangino--on ya tawtawoy pinili̇̀ na." 20Hapa--eg, nilolon ni Apo Hisos baytoy papil ya pinangiholatan, ta in-orong na do ha magsisirbi biha ya niknò nin manorò. Kaganawan hatoy tawtawo bayro ha lo--ob nin himba--an ay ampamakategteg koni Apo Hisos. 21Naghalità konla hi Apo Hisos, ya wana, "Hapa--eg ay nagkapeteg ana baytoy binaha ya nakaholat ha Kaholatan nin Diyos ya nalengè moyo." 22Kaganawan tawoy anti bayro ay ampanginsolto nin mamori koni Apo Hisos, piro ampag-ispantawan lay ka-osayan ni Apo Hisos nin maghalità. "Wari̇̀," wanla, "nin alwan hiya ba--in ya anak ni Hosi?" 23Hinalità ni Apo Hisos konla, "Angkasigoro ko," wana, "ya banggiten moyo kongko bayti ya ombayri ya kahalita--an: 'Mananambal, pakahampaten moy sarili mo,' boy halita--en moyo et ya dapat akon manggawà papag-ispantawan bayri ha sarili kon banowa bilang ombayro ha nabalita--an moyo ya ginawà ko do ha banowan Kapirnawom. 24"Anhalita--en ko komoyo ya kaptegan," wana et ni Apo Hisos; "ayin propita ya antanggapen ha sarili nan dogal. 25Hin pana--on ni propita Ilyas ay talagan malakè ya bawoy babayi ha nasyon Israyil. Hin habayto ay ahè nangoran nin lo--ob tatloy ta--on boy kagitnà; kayà angkabitlan ya tawtawo ha kaganawan dogal. 26Piro hi Ilyas ay ahè inhogò nin manambay ha hinoman konla bayro ha nasyon Israyil, no alwan hay tambayan nan bongat ay hatoy mihay bawoy babayi ha banowan Saripta ya angkasakopan nin Sidon. 27Hin pana--on ni propita Ilisyo ay malakè ya tawoy ma--in masakit ya liproso, piro hay pinakahampat nan bongat ay hi Na-aman ya taga nasyon Sirya." 28Banà bayro ha hinalità ni Apo Hisos, kaganawan tawoy anti bayro ha lo--ob himba--an nin Hawhodiyo ay masyadon namahang. 29Biglà hilan nireng ta dinawohong la hi Apo Hisos nin gintan ha likol banowa ha toktok bakil ya marani ha banowa la ta bayro la ya dayi nin itata ha bongaw. 30Piro hi Apo Hisos ay nagdaan ha pibonakan nin hatoy kalak--an tawo ta nog-alih ya. 31Hapa--eg hi Apo Hisos ay nako ha banowan Kapirnawom ya angkasakopan nin probinsyan Galiliya. Bayro, no allon pama-inawa ay ampanorò ya ha himba--an nin Hawhodiyo. 32Hay panonorò na ay ampag-ispantawan nin tawtawo, ta hay hawhalità na ay ma--in kapangyariyan. 33Bayro ha lo--ob nin himba--an, mintras ampanorò hi Apo Hisos ay ma--in nambo-angaw ya mihay lalaki ya napahokan nin dimonyoy mala--et ya ispirito, ya wana, 34"Ah! anyay paki-emenan mo konnawen, Hisos ya taga Nasarit? Nako ka nayi̇̀ bayri para hikayi ay apo--en ana? Tandà ko no hino ka; hika ay nangibat ha Diyos boy ayin kan kapintasan." 35Hay ginawà ni Apo Hisos ay minandawan na baytoy mala--et ya ispirito, ya wana, "Tonggen kan magtelek boy mog-alih ka bahen ha tawo!" Hapa--eg, hatoy tawo ay impatomba nin hatoy dimonyo ha arapan nin kaganawan, biha nog-alih baytoy dimonyo nin ahè namakakhit do ha tawo. 36Kaganawan tawoy nakakit nin hatoy ginawà ni Apo Hisos ay nipag-ispanta; kayà nipapastang hila, "Anyaraw," wanla, "ya kapangyariyan ya anti ha halità nin habayti ya tawo, boy anyay katongkolan na ta angkamandawan nay mangala--et ya aw-ispirito boy anhomonol hila kona?" 37Banà bayri ha pangyayari ya ginawà ni Apo Hisos, hay balità ay nibahwag ha kaganawan parti nin habaytoy dogal. 38Hapa--eg hili Apo Hisos ay nog-alih bayro ha himba--an nin Hawhodiyo ta nako hila ha bali ni Pidro. Hay babayi ya ampò ni Pidro ay ma--in angkatanam ta masyadon matag--ay ya amot na. Kayà impaki-i-ingalo la koni Apo Hisos ya pakahampaten na ya. 39Hapa--eg hi Apo Hisos ay napakarani do ha naka-irà ya ampò ni Pidro ta hinalità nay ombayri: "Mog-alih kay masakit." Habayto et oras ay natbahan ya. Antimano, nibangon ya ta dinolotan na hili Apo Hisos nin pamamangan. 40Hin anhomlep anay allo, hay tawtawoy ma--in hari-hari̇̀ ya klasin masakit ay gintan la bayro koni Apo Hisos. Balang miha konla ay inaptoh ni Apo Hisos ta pinakahampat na. 41Ma--in et tawtawo ya gintan bayro ya pinahokan nin dawdimonyo. Ampipambo-angaw baytoy dawdimonyoy ampipampog-alih do ha tawtawo, ya wanla, "Hika ay Anak nin Diyos." Tandà nin dawdimonyo ya hi Apo Hisos ay Kristo ya impangakò nin Diyos; kayà antonggen hilan maghalità ha pana--ad konla ni Apo Hisos. 42Ika-ibokah, palbangon et, hi Apo Hisos ay nako ha powiray dogal. Hapa--eg, tinikap ya nin tawtawo. Hin nakit la ya ay hinalità la kona ya agya mog-alih konla. 43Piro hinalità konla ni Apo Hisos, ya wana, "Hay Mahampat ya Balità ya tongkol ha pamomo--on nin Diyos ay dapat kon i-aral ha kanayon ya dogal, ta habayti ya bara--nan ya pinanogo--an kongko nin Diyos." 44Kayà hi Apo Hisos ay ampako nin mangaral ha hawhimba--an nin Hawhodiyo ha probinsyan Hodiya.

will be added

X\