LOKAS 20

1Mihay allo, mintras anti hi Apo Hisos ha lo--ob bali nin Diyos ta ampanorò yan tawtawo boy an-i-aral nay Mahampat ya Balità ay nako kona ya pawpo--on nin pawpari̇̀, mawmangitorò nin kawkapanogo--an, kateng mawmato--ay mangama--in katongkolan. 2Hinalità la kona, "Ibalità mo," wanla, "konnawen no anyay katongkolan mo nin manggawà nin ombayri ya bawbagay bayri ha bali nin Diyos, boy no hinoy nambi komo nin ombayroy katongkolan." 3Tinombay konla hi Apo Hisos, "Pastangen katawo pon," wana. 4"Ayri nangibat ya katongkolan ni Howan nin maminyag, ha Diyos nayi̇̀ o ha tawo?" 5Hilahila ay ampididiskosyon boy ma--in ampaghalità nin ombayri: "No halita--en tamo ya nangibat ha Diyos ya paminyag ni Howan ay halita--en na kontamo ya, 'Antà awod agmoyo pininto--o hi Howan?' 6Piro no halita--en tamo itaman ya nangibat ha tawo ay batowen tamo nin habayti ya kalak--an tawo, ta ampinto--o hila nin hi Howan ay propita." 7Kayà hay intobay la koni Apo Hisos ay ombayri: "Agnawen," wanla, "tandà no hinoy nambin katongkolan koni Howan." 8Hinalità konla ni Apo Hisos, ya wana, "Hiko man ay ahè itaman maghalità komoyo no hinoy nambi kongkon katongkolan nin manggawà nin ombayroy bawbagay." 9Hapa--eg, mihayna et ya alimbawà ya hinalità ni Apo Hisos do ha tawtawo. "Ma--in," wana, "nin mihay lalaki ya ma--in lotà ya tinanamanan na nin aw-obas ya impaba-alà na ha ongnoy tawo, ta nako ya ha kanayon ya dogal boy bayro ya manatili nin maboyot ya pana--on. 10Hin pana--on anan pangalawah nin habaytoy aw-obas ay nangihogò yan mihay alilà na do ha pinaba-alà ta kowen nay atag na ha ma-alawah. Piro hatoy alilà ya inhogò ay pinagpapatok nin hatoy pinaba-alà biha la ya pina-orong nin ayin gitan. 11Hatoy ma--in tanaman ay nangihogò ana et nin kanayon ya alilà na, piro ombayroyna et ya ginawà nin hatoy pinaba-alà. Pinagpapatok la ya boy pinareng--ey, biha la ya impataboy nin ayin gitan. 12Hapa--eg hatoy ma--in tanaman ay nangihogò nin ikatlon alilà na, piro habaytoy alilà ay hinogathogatan nin hatoy pinaba-alà biha impataboy. 13"Hapa--eg, hinalità nin hatoy ma--in tanaman, 'Anya,' wana, 'ya gaw--en ko? Ah! ihogò koy anak ko ya pinakalabilabi ko; sigoradon igalang la ya!' 14"Piro hin nakit ya nin hatoy pinaba-alà ay ni-i-ilgo hila, ya wanla, 'Hiya bayti ya mamagmana. Patyen tamo ya emen tamo mapag-ikon ya mamanawen na.' 15Kayà hay ginawà la do ha anak ay pinilit lan impalikol ha tanamanan nin obas biha la ya pinati." Hapa--eg, hinalità ni Apo Hisos, ya wana, "Anya ha palagay moyo ya gaw--en nin hatoy ma--in ikon nin tanaman do ha pinaba-alà na? 16Sigoradon mako ya bayro ta patyen na baytoy pinaba-alà na, biha na ipaba-alà baytoy tawtanaman ha kanayon." Hin nalengè bayti nin hatoy tawtawo ay hinalità la, "Ahè dayi," wanla, "mangyari." 17Piro tinegteg hila ni Apo Hisos biha na hila pinastang, "Anyaman, awod," wana, "ya labay totolen nin habayti ya impaholat nin Diyos? 'Hay bato ya ahè tinanggap nin manggagawà bali ay nag--in pinakama-alagà ya bato.' 18Anhalita--en ko komoyo," wani Apo Hisos, "hinoman ya matata bayro ha bato ay mangatatamek boy bilang ya ha tawoy ampagdanas nin kadya-dya--an ta ahè naghehe nin kasalanan; boy hinoman ya mabondagan nin habaytoy bato ay matapong nin bilang gabok boy bilang ya ha tawoy igwà nin Diyos ha kaparosawan." 19Hapa--eg, na-intindiyan nin mawmangitorò nin kawkapanogo--an boy pawpo--on nin pawpari̇̀ ya hilay in-alimbawà ni Apo Hisos do ha tawtawoy pinaba-alà nin tawtanaman ya obas. Kayà habayton oras ay labay lan dakpen hi Apo Hisos, piro angkalimo hila ha tawtawo. 20Ampanganti̇̀ hila nin tamà ya oras nin ma-iparakep la hi Apo Hisos. Hapa--eg, nangihogò hila nin ongnoy tawoy magpanggap nin hila ay tapat. Hila bayto ya magpastang koni Apo Hisos emen la ya mahagep ha pag-i-ilgo na. Ha ombayro ay ma-igwà la ya ha hilong kapangyariyan nin gobirnador. 21Habayti ya nipagpanggap ay nagpastang koni Apo Hisos, "Mangangaral," wanla, "tandà nawen ya hay anhalita--en mo boy an-itorò mo ay tamà. Tandà nawen et ya agka ampamili̇̀ nin tawo, boy hay an-itorò mo ay kaptegan ya tongkol ha kalabayan nin Diyos para ha tawtawo. 22Hapa--eg, tongkol ha pamamayad bo--ih, tamà nayi̇̀ o alwa ya mamayad kayi nin bo--ih ha ampamo--on konnawen ya hi Ari̇̀ Sisar ya taga siyodad nin Roma?" 23Piro tandà ni Apo Hisos ya kala-etan nin intinsyon la; kayà hinalità na konla, 24"Pakitan moyo ko," wana, "nin kowaltay pilak." Hin na-ipakit la kona ay pinastang na hila, "Hino," wana, "ya ma--in lopa nin habayti ya anti bayri, boy hino ya ma--in ngalan nin habayti ya nakaholat bayri?" 25"Hi Ari̇̀ Sisar," wanla. Hapa--eg, hinalità konla ni Apo Hisos, "Hay para koni Ari̇̀ Sisar," wana, "ay igwà moyo kona, ta hay para ha Diyos ay igwà moyo ha Diyos." 26Ha pag-i-ilgo ni Apo Hisos ha arapan nin hatoy tawtawo ay ayin hilan pakahagpan kona; kayà aghilayna nagtelek, boy ampag-ispantawan lay pantotombay na. 27Ma--in mihay gropon Hodiyo ya an-ingaten Sadosiyo ya ahè ampinto--o nin hay nikati ay mabiyay oman. Hapa--eg hay ongno konla ay nakon nagpastang koni Apo Hisos. 28"Mangangaral," wanla, "ombayri ya hinolat ni Moysis ya para kontamo: 'No ma--in mita-ahawa ya hay lalaki ay nati nin aghila nagka-anak, hatoy bawo ay dapat pag-ahawa nin patel nin hatoy nati, ta no magka-anak hila, hatoy anak ay para do ha patel nay nati.' 29Alimbawà," wanlan hatoy Sawsadosiyo koni Apo Hisos, "ma--in pitoy lalaki ya mipapatel. Hay ponganay ay nag-ahawa, piro nati ya nin ahè nagka-anak. 30Hay homono do ha ponganay ay nag-ahawan hatoy bawo, piro nati ya simpri nin ahè nagka-anak. 31Ombayro simpri ya nangyari do ha ikatlo. Kaganawan nin hatoy pitoy mipapatel ay nakapag-ahawa nin hatoy babayi piro kaganawan la ay nati nin ahè nagka-anak. 32Ha kalalampohan ay nati baytoy babayi. 33Hay pastang nawen ay ombayri: no wari̇̀ ta biyayen oman ya nikati, hino konla ya ma--in ahawa nin hatoy babayi ya kaganawan nin hatoy pitoy mipapatel ay nakapag-ahawa kona?" 34Tinombay konla hi Apo Hisos, "Hay pag-a-ahawa," wana, "ay para ha tawtawo mintras bongat nin angkabiyay bayri ha babon lotà. 35Piro hay an-ibilang nin karapatdapat ha biyay ya miha boy ha pangabiyay nin oman ay agana mag-ahawa. 36Hila ay bilang ana ha aw-anghil ya ayin kamatyan boy aw-anak hilayna nin Diyos ta biniyay hilan oman. 37Maski hi Moysis ay namapteg nin hay nikati ay talagan biyayen oman, ta hin hinolat na ya tongkol ha ma-aypà ya kayoy andongket, hay ingat na ha Pangino--on ay 'Diyos ni Abraham, Isak, boy Diyos ni Hakob.' 38Ampangahologan nin hay nikati ana ya nipantompel ha Diyos ay kowinta angkabiyay; ta hay Diyos ay Diyos nin ampikabiyay, alwan Diyos nin nikati. Kaganawan ay an-ibilang nin Diyos nin kowinta angkabiyay." 39Hapa--eg, naghalità ya ongnoy mangitorò nin kawkapanogo--an, "Hay ganda," wanla, "nin hatoy intobay mo konla, Mangangaral." 40Hin nayari̇̀ bayto ay ayin anan nakaregdeg nin magpastang koni Apo Hisos. 41Hapa--eg, pinastang hila ni Apo Hisos, "Pangno," wana, "halita--en nin tawtawo ya hay Kristo ya impangakò nin Diyos ay alalak ni Ari̇̀ Dabid? 42Mismon hi Ari̇̀ Dabid ya naghalità nin ombayri ya nakaholat ha libron Kawkanta: 'Hinalità nin Pangino--on Diyos ha Pangino--on ko: Miknò ka ha bandan wanan ko 43anggan hay kawka-away mo ay talowen ko boy igwà ko hila ha hilong nin kapangyariyan mo.' " 44Hinalità et ni Apo Hisos, ya wana, "No hi Ari̇̀ Dabid ay nangingat, 'Pangino--on' koni Kristo ya impangakò nin Diyos, pangno nin hi Ari̇̀ Dabid ya tawon bongat ay nakapi-alalak ha Pangino--on na?" 45Mintras ampanlengè baytoy tawtawo ay naghalità hi Apo Hisos ha aw-alagad na, 46"Mag-atap kawo," wana, "ha mawmangitorò nin kawkapanogo--an, ta hay labay la ay mipapasyal hilan nakaholot nin makarà ya dolo, boy labay lan ilawen boy igalang nin tawtawo ya anti ha arapan nin tawtindawan. Ha lo--ob himba--an ay labay lan miknò ha arapan ha pamikno--an nin importantin tawo, boy no ma--in okasyon, hay labay lan pamikno--an ay ha dani nin hatoy ma--in pa-okasyon. 47Angkowen lay kamama--in nin bawbawoy babayi, biha hila mamakit nin masyadon karà panalangin. Banà bayri ha anggaw--en la ay lalò bomyat ya iparosa konla."

will be added

X\