LOKAS 17

1Hinalità ni Apo Hisos ha aw-alagad na, ya wana, "Hay toksò ay anlomateng ya ampangibatan nin hay tawtawo ay makagawà nin kasalanan, piro ka-i-ingaloy mangyari ha tawoy manonoksò. 2Hinoman ya manggawà nin bara--nan ya pangibatan nin hay mihay anak ya antompel kongko ay makapagkasalanan, mahampat et ya hay le--ey na ay taklan nin malhay ya batoy gigilingan biha ya itapon ha dagat. 3I-atap moyoy sarili moyo! "No ampanggawà nin kasalanan ya patel mo ay ha-aren mo, boy no maghehe ya ay patawaren mo. 4No ha lo--ob managa-allo ay kapitoy bisis yan makagawà komo nin kasalanan ta kapitoy bisis ya simprin pakarani komo nin makikwan tawad ay patawaren mo ya." 5Hapa--eg, hinalità nin aw-alagad koni Pangino--on Hisos, ya wanla, "Pakhawen moy pantotompel nawen." 6Tinombay ya Pangino--on, "No ma--in kawo," wana, "nin pantotompel ya maski bilang bongat kayamò nin bot--on mostasa ay ma-ari̇̀ moyon halita--en bayri ha po--on kayo ya an-ingaten sikomoro ya, 'Oloten moy sarili mo ta ikambya mon itanem ha dagat!' boy homonol bayti komoyo." 7"Alimbawà," wani Apo Hisos, "ma--in miha komoyo ya ma--in alilà ya ampangararo o ampagpastol nin tawtopa. Panlomateng nan na-ibat ha paliyan, halita--en mo wari̇̀ konay, 'Mako kari ta mangan kayna?' 8Talagan agka maghalità nin ombayro, no alwan hay halita--en mo kona ay ombayri, 'Ihandà moy pangaponan ko boy ayosen moy sarili mo, ta sirbiyan mo ko mintras ampangan ako, ta pangayari̇̀ ko ay ma-ari̇̀ kaynan mangan.' 9Wari̇̀ hay alilà mo ya anhomonol ha an-imanda mo ay ampasalamatan mo? 10Ombayro itaman komoyo; no nagawà moyoy kaganawan immanda komoyo, hay halita--en moyo ay 'Hikayi ay aw-alilà bongat; ginawà nawen ya katongkolan nawen.' " 11Mintras ampagpalako hili Apo Hisos ha siyodad nin Hirosalim ay nagdaan hila ha piha-etan nin probinsyan Samarya boy probinsyan Galiliya. 12Hin ampomahok ana hili Apo Hisos ha mihay baryo ay nakahakbat hila nin mapò katawoy ma--in liproso. Tinonggen baytoy mapò katawoy ma--in liproso ha ma--in amò ya distansya, 13biha hila nambolyaw, "Apo Hisos," wanla, "ingalowan mo kayi." 14Hin nakit hila ni Apo Hisos ay ombayri ya hinalità na konla: "Mako kawon pakit ha pawpari̇̀." Mintras ampako hilan pakit ha pawpari̇̀, hay nawini la ay malinis ana ta na-alih ya liproso la. 15Hin na-asikaso nin miha konla ya mahampat yayna ay nagbira yan ampangibolyaw nin pamomori ha Diyos. 16Hiya ay nanlokob ha danin bitih ni Apo Hisos ta nagpasalamat ya kona. Habayti ya tawo ay Samaritano. 17Nagpastang hi Apo Hisos, "Wari̇̀ alwan mapò katawoy hinomampat? Ayri ya siyam? 18Aghila nayi̇̀ mamalay otang ya nakem nin magbiran pasalamat ha Diyos? Habaytin bongat nayi̇̀ ya dayowan ya taga Samarya ya nagbira?" 19Hapa--eg, hinalità ni Apo Hisos do ha tawoy nagbira kona, "Mireng ka," wana, "ta morong kayna. Pinakahampat ka nin katetpel mo." 20Minghan, hi Apo Hisos ay pinastang nin Pawparisiyo no makano lomateng ya pamomo--on nin Diyos. Tinombay hi Apo Hisos, ya wana, "Hay pamomo--on nin Diyos ay ayin palatanda--an boy ahè makit no makano lomateng, 21ta hay pamomo--on nin Diyos ha nakem nin tawo ay ahè angkakit. Kayà ayin makapaghalità nin, 'Hay Diyos ay mag-ompisaynan mamo--on ha dogal ya habayti!' o, 'Do ha kanayon ya dogal!' " 22Hinalità ni Apo Hisos ha aw-alagad na, "Lomateng ya pana--on ya kahabekan moyon makit ya panlomateng ko ya an-ingaten Anak nin Tawo piro agmoyo makit. 23Ma--in tawtawoy maghalità komoyo nin 'Anti ya bayro!' o 'Anti ya bayri!' Agkawo minto--o konla nin makon manlek kongko, 24ta hay allon panlomateng ko ya an-ingaten Anak nin Tawo ay bilang kimat ya biglà anhomawang ha langit kateng ha kaganawan parti nin babon lotà. 25Piro ka-ilangan magdanas ako pon nin masyadoy kadya-dya--an, boy agko tanggapen nin tawtawo hapa--eg pana--on. 26"Ha allon panlomateng ko ya an-ingaten Anak nin Tawo ay bilang ombayro ha pangyayari hin pana--on ni Nowi ya hay tawtawo ay alwan handà ta masyadoynay kala-etan la boy aglayna anlingayen ya Diyos. 27Hin habayton pana--on, hay tawtawo ay sigisigi ha pamangan, paglahing, pag-ahawa, boy pamabanhal anggan na-abot ya allo nin hili Nowi ay pinomahok ha barko, biha biglà nangoran anggan hay babon lotà ay nahalipawan nin lanom ya nakamati konlan kaganawan. 28"Ombayro et hin pana--on ni Lot. Hay tawtawo ay sigisigi ha pamangan, paglahing, pangomirsyo, pananem, boy panggawà nin bawbali. 29Piro hin nog-alih hili Lot do ha siyodad nin Sodoma, hay tawtawo bayro ay pinatin inoran nin apoy boy asopri. 30"Ombayro ya mangyari ha allo nin hiko ya an-ingaten Anak nin Tawo ay mipatnag. 31Ha allon panlomateng ko, hinoman ya anti ha balkon ha bobongan nin bali na ay agana mistil mona--oy nin mangwan kawkamama--in na ya anti ha lo--ob nin bali na; boy hinoman ya anti ha paliyan ay agana mistil morong nin mangwan anyaman ya bagay. 32Ihipen moyo baytoy nangyari hin hato ha ahawa ni Lot. Agya nakalibri banà ha pamabli na nin kawkamama--in na ya agna labay alihan. 33Hinoman ya tawoy ampag-atap ha kamatyan ay mati et bongat, piro hinoman ya tawoy ahè ampagpa-alagà ha biyay na ay ma--in biyay ya ayin anggawan. 34Anhalita--en ko komoyo, ha yabin panlomateng ko ay ma--in loway lalaki ya angkatoloy ha mihay kowarto; hay miha ay kowen, hay miha ay ibalag. 35Ma--in loway babayi ya ampitambay nin ampanggiling, hay miha ay kowen, hay miha ay ibalag, 36Ma--in loway lalaki ya ampilamon ampagtrabaho ha paliyan; hay miha ay kowen, hay miha ay ibalag." 37Hapa--eg hi Apo Hisos ay pinastang nin aw-alagad na, ya wanla, "Pangino--on, ayri mangyari bayti?" Intobay konla ni Apo Hisos bayti ya ombayri ya kahalita--an: "No ayri," wana, "ya bangkay ay bayro mititipon ya aw-owak."

will be added

X\