LOKAS 14

1Mihay allo, allon pama-inawa, hi Apo Hisos ay nako ha bali nin miha ha ampipamo--on ha Pawparisiyo ta nangan. Bayro ay ampaka-i-imatonan la ya. 2Hapa--eg, napakarani koni Apo Hisos ya mihay lalaki ya angkabayà ta ma--in masakit. 3Hi Apo Hisos ay nagpastang ha mawmangitorò nin kawkapanogo--an boy ha Pawparisiyo, ya wana, "Kompormi ha kawkapanogo--an, tamà nayi̇̀ o alwa nin mamakahampat nin ampagmasakit no allon pama-inawa?" 4Piro aghila tinombay. Hapa--eg, inaptoh ni Apo Hisos baytoy tawoy angkabayà, ta pinakahampat na ya biha na ya pina-orong. 5Hapa--eg, pinastang hilayna et ni Apo Hisos, ya wana, "No ma--in miha komoyo ya ma--in anak o bakà ya matata ha malalè ya libon no allon pama-inawa, agmoyo wari̇̀ antimanon ilakat?" 6Piro ayin makatbay koni Apo Hisos. 7Hapa--eg, na-asikaso ni Apo Hisos ya hay ampili--en nin pamikno--an nin sawsang-ili ay hatoy pamikno--an nin aw-importanti ya kawkombidado. Kayà ombayri ya alimbawà ya hinalità na konla. 8"No ma--in mangombida komo ha banhal ay agka pon miknò do ha dogal ya para ha importantin tawo, ta maka ma--in kombidado ya mas importanti kisa komo. 9No naka-iknò kayna bayro biha pakaraniyan ka nin habaytoy nangombida komoyo ta halita--en na komo ya, 'Habayti ya bangkò ay para kona,' ay mapareng--ey ka ta mipalako kan miknò ha pamikno--an nin kinombiday alwan importantin tawo. 10Kayà no kinombida ka ha okasyon ay do ka miknò ha pamikno--an nin alwan importantin tawo emen no lomateng baytoy nangombida komo ay halita--en na komo ya, 'Kari,' wana, 'amigo, di ka miknò ha mas maganday pamikno--an.' Ha ombayro ay magkama--in ka nin karangalan ha kaganawan nin kombidadoy anti bayro. 11Hinoman ya ampangipagmalhay nin sarili na ay angka-lihan dangal, boy hinoman ya ampagmaka-aypà ay ampagkama--in dangal." 12Hapa--eg, hinalità ni Apo Hisos do ha Parisiyo ya nangombida kona, "No maghandà ka," wana, "nin pamamangan ay agmo kombidawen ya aw-amigo mo, pawpatel mo o pawpartidos mo, ni kawkarani moy mangayaman; ta no ombayroy gaw--en mo ay ibira la komo baytoy ginawà mo konla. 13Hay kombidawen mo ay mawmanga-irap, pawpilay, ahè ampipampaka-owako, boy bawbowag. 14Hila ay ayin pakakayan gomanti komo. Kayà magkama--in ka nin kahampatan ya iganti komo nin Diyos ha pangabiyay oman nin tawtawoy nikati ya mawmangahampat." 15Miha do ha ampipampiknò ha lamisawan ya nakalengè nin hinalità ni Apo Hisos ay naghalità kona, "Makalmà ya tawoy domoyong ha lamisawan ha dogal ya ampag-ari--an nin Diyos." 16Ombayri ya intobay ni Apo Hisos ya alimbawà: "Ma--in mihay tawo ya ampaghandà nin malhay ya handà ya pamamangan, biha ya nangombida nin malakè ya tawo. 17Hin na-ihandà ana ya kaganawan ay inhogò nay alilà na nin halita--en do ha kawkombidado na ya ombayri: 'Mako kawoyna bayri,' wana, 'ta handà ana ya kaganawan.' 18Piro kaganawan nin hatoy kinombida na ay nanggawà nin kaparanan emen hila madispinsa. Hay ona ay naghalità do ha alilà nin, 'Ka-ilangan ko,' wana, 'nin lakwen nin biliwen baytoy paliyan ya hinaliw ko; kayà dispinsawen na ko.' 19"Hinalità itaman nin hatoy miha, 'Nanaliw ako,' wana, 'nin mapò ya bakà; kayà porbawen ko hila nin iholot. An-ipaki-ilgo ko komo ya dispinsawen na ko.' 20"Hinalità itaman nin hatoy miha, 'Kapiyari̇̀ ko,' wana, 'nin nagkahal; kayà agko makalako.' 21"Hapa--eg, norong baytoy alilà ta habayti ya pangyayari ay imbalità na ha amo na. Namahang baytoy amo ya ma--in bali; kayà minandawan nay alilà na, ya wana, 'Manandali̇̀ kan mako ha kawkalsara boy ha mangakpit ya dawdaan ta gitan mo bayri ya mawmanga-irap, pawpilay, bawbowag, kateng hatoy ahè maka-owako.' 22"Hin nagbira baytoy alilà ay hinalità na ha amo na, ya wana, 'Hay pinanogo--an mo ay nagawà ana, piro ma--in et nin dogal ya para ha kanayon.' 23"Hinalità ana et nin hatoy amo do ha alilà na, 'Manigè ka,' wana, 'ta mako ka ha kawkalsara boy ha mangakpit ya dawdaan ya anti ha likol nin banowa ta piliten moy tawtawo nin mako bayri emen mapnò bayti ya bali ko. 24Piro anhalita--en ko komoyo, hatoy ona kon kinombida ay ahè makataway nin habayti ya inhandà koy pamamangan.' " 25Hi Apo Hisos ay anhonowen nin malakè ya tawo. Hapa--eg, nagpeyeh ya nin inomarap konla ta hinalità na, 26"Hinoman," wana, "ya labay makilamo kongko para pag-alagad ko, hay ka-ilangan nan gaw--en ay labiyen na kon igit ha panlalabi na ha tatay na, nanay na, ahawa na, aw-anak na, pawpatel na, boy ha sarili na. 27Hinoman ya ahè makapagte--eh nin magdanas nin kadya-dya--an nin bilang ha ampamalatay koroh ya para ha sarili nan kamatyan ay ahè ma-ari̇̀ mag--in alagad ko. 28"Alimbawà, ma--in miha komoyo ya ampagplanon mamangon nin matag--ay ya bali, agna pon wari̇̀ karkolawen no ongnoy kowalta ya gastosen na emen na matanda--an no hay kowalta ya ma--in kona ay magkasya nin pamayari̇̀ nin hatoy ipagawà na; 29ta no nakapondasyon yayna biha agnayna ma-ipayari̇̀, balang makakit nin habayto ay mangka-ili. 30'Biliwen mo,' wanla, 'bayti ya tawo. Na-ompisawan naynan ibangon ya bali na, piro agnayna mayari̇̀.' 31"Alimbawà et, no ma--in ari̇̀ ya ma--in mapò ya liboy hondalò para lomaban ha ari̇̀ ya makon mangalaban konla ya ma--in lowampò ya liboy hondalò, agna pon wari̇̀ pag-aralan no ma--in hilan pakakayan lomaban do ha ari̇̀ ya mas malakè ya tawowan kisa konla? 32No agna makaya, mintras anti et ha marayò ya kalaban na ay mangihogò ya nin tawowan nay homakbat nin maki-ayos do ha ari̇̀ ya kalaban na. 33Ombayro itaman," wani Apo Hisos, "hinoman komoyo ay ahè ma-ari̇̀ mag--in alagad ko no agna halibokotan ya kaganawan bagay ya anti kona." 34Hinalità et ni Apo Hisos, ya wana, "Hay ahin ay ma-alagà ta pampalahap nin pamamangan, piro no na-lihan anan alat, pangno et mapa-alat nin oman? 35No na-lihan anan alat ay ayin anan pakinabang maski pangabono; kayà dapat anan itapon. Hay ka-ilangan moyo ay manlengè mahampat nin habayti ya anhalita--en ko komoyo biha moyo honolen."

will be added

X\