LOKAS 1

1Anggalangen kon Tiyopilo, Malakè ana ya tawoy nangiholat nin bawbagay ya tongkol koni Apo Hisos ya ahè et naboyot nangyari bayri kontamon ampipantompel ha Pangino--on. 2Inholat la bayto ya nalengè nawen do ha primiron nipampakakit koni Apo Hisos boy do ha nangi-aral Halità nin Diyos. 3Banà bayri, anggalangen kon Tiyopilo, pinag-aralan kon mahampat bayti ya kaganawan pangyayari ya tongkol koni Apo Hisos pa-ibat hin ompisa angga hapa--eg emen ko itaman ma-iholat bayti komo nin ma-ayos. 4Anggaw--en ko bayti emen lalò mon matanda--an ya kaptegan ya tongkol ha bawbagay ya intorò komo. 5Hin ampag-arì hi Hirodis ha probinsyan Hodiya ay ma--in mihay parì ya nagngalan Sakariyas. Hiya ay miha ha gropon pawparì ya an-ingaten gropo ni Abiya. Hay ngalan nin ahawa ni Sakariyas ay Ilisabit ya alalak ni Aron ya ka-ona-onawan parì hin hato. 6Hi Sakariyas boy hi Ilisabit ay parihon mahampat ha tegteg nin Diyos, boy pariho hilan anhomonol ha kaganawan an-ipanogò nin Pangino--on boy ha rawriglaminto na. 7Mato--a hilayna piro ayin hilan anak ta ba--og hi Ilisabit. 8Mihay allo, hay oras nin pagsisirbi ha bali nin Diyos nin pawparì ya gropo ni Sakariyas ay nakalateng ana. Kayà anggaw--en ni Sakariyas ya katongkolan na nin para ha Diyos. 9Hay ka-ogali--an nin pawparì ay ampibabaweh nin mamo--ol kamanyang ya mabangoh. Habayton allo ay hi Sakariyas ya nabonot lan mamo--ol nin kamanyang. Kayà nako ya ha lo--ob bali nin Pangino--on. 10Mintras ampo-olan na baytoy kamanyang ya mabangoh, hay tawtawoy anti ha likol bali nin Diyos ay ampipanalangin, ta ombayroy ka-ogali--an la no ampamo--ol nin kamanyang. 11Hapa--eg, ma--in mihay anghil nin Pangino--on ya biglà nilomwah ya naka-ireng ha bandan wanan nin altar ya ampamo-olan nin kamanyang ta napakit koni Sakariyas. 12Nabiglà boy nalimowan hi Sakariyas hin nakit na baytoy anghil nin Pangino--on. 13Piro hinalità kona nin hatoy anghil, "Agka," wana, "malimo, Sakariyas! Nilengè nin Diyos ya panalangin mo. Hi Ilisabit ya ahawa mo ay magka-anak komo nin mihay lalaki ya pangalanan mo nin Howan. 14Ha pangi-anak kona ay lomiga kan masyado, boy malakè et ya kanayon ya tawo ya lomiga. 15Hiya ay magkama--in karangalan ha tegteg nin Pangino--on. Agya minom nin alak o maski anyay i-inomen ya makalahing. Pa-ibat ha i-anak ya, hiya ay mapnò nin Ispirito nin Diyos. 16Hiya et bayti ya anak mo ya mangoman nakem nin malakè ya inalalak ni Israyil emen hila magbiran homamba ha Pangino--on lay Diyos. 17Hiya ya ma-ona ha Pangino--on. Mag--in yan bilang koni Ilyas ya propita hin hato ya ma--in kakhawan boy kapangyariyan. Ipakisondò nay tawtatay ha aw-anak la; boy omanen nay nakem nin tawtawoy ahè anhomonol emen hila magbiran homonol ha karonongan nin tawtawoy mangahampat; boy ma-ihandà nay tawtawo ha panlomateng nin Pangino--on." 18Hapa--eg, hinalità ni Sakariyas do ha anghil, "Pangno ko," wana, "masigoro ba--in ya anhalita--en mo? Hiko boy ahawa ko ay parihoynan mato--a." 19Tinombay baytoy anghil koni Sakariyas, "Hiko," wana, "hi Gabril ya pirmin ampagsirbi ha Diyos. Hiya ya nangihogò kongkon mangibalità komo nin habayti ya mahampat ya balità. 20Habayti ya imbalità ko komo ay magkapeteg ha tamà ya pana--on, piro banà ta agka ninto--o ha hawhalità ko ay mapipi ka. Agka makapaghalità angga ha lomateng ya allon mangyari bayti ya imbalità ko komo." 21Hapa--eg, hatoy tawtawo ay ampipangantì nin lomikol hi Sakariyas. Ampag-ispanta hila no antà hay boyot na do ha lo--ob bali nin Diyos. 22Hin nilomikol hi Sakariyas ay agyayna makapaghalità konla. Kayà natanda--an la ya ma--in yan nakit ya kapapa-ispanta do ha lo--ob bali nin Diyos. Banà ta agana makapaghalità hi Sakariyas ay ampagmostra ya tana do ha tawtawo. 23Hin nayarì naynay pagsisirbi na do ha lo--ob bali nin Diyos ay norong yayna ha bali la. 24Ahè naboyot, hi Ilisabit ya ahawa na ay binomoktot. Ha lo--ob nin limay bowan, hi Ilisabit ay nagpirmi ha bali la. 25Hapa--eg, hinalità na, "Iningalowan ako," wana, "nin Pangino--on ta inalih nay kareng-eyan ko ha tawtawo banà ta hiko ay ahè nagka-anak." 26Hin ika-anem anan bowan nin boktot ni Ilisabit ay inhogò nin Diyos hi Gabril ya anghil nin mako ha banowan Nasarit ha probinsyan Galiliya. 27Inhogò na yan magbalità koni Mariya ya dalagay malinis ta ahè et nagalaw nin hinoman ya lalaki. Hiya ay kaba--an ni Hosi ya miha ha aw-inalalak ni Dabid ya arì hin hato. 28Hapa--eg hi Gabril ay nako koni Mariya ta hinalità na kona, "Magtowà ka," wana, "ta hika ya pinolalagan nin Diyos. Hay Pangino--on ay anti komo." 29Banà bayro ha hinalità nin hatoy anghil ay nagoloy nakem ni Mariya. An-ihipen na no anyay labay totolen nin hatoy imbalità kona nin hatoy anghil. 30Piro naghalità ana et kona baytoy anghil, "Agka," wana, "malimo, Mariya, ta hay Diyos ya namolalag komo. 31Hika ay mamoktot ya hay i-anak mo ay lalaki ya pangalanan mon Hisos. 32Hiya ay ma--in karangalan boy hay i-ingat kona ay Anak nin Pinakamakapangyariyan ya Diyos. Igwà kona nin Pangino--on Diyos ya pamomo--on nin bilang ha pamomo--on hin hato ni Arì Dabid ya ka-apo-apowan na. 33Hay pamomo--on na ha aw-inalalak ni Hakob ay anggan makakanoman, boy hay pamomo--on na ay ayin anggawan." 34Hapa--eg, hi Mariya ay nagpastang do ha anghil, "Pangno ko," wana, "magka-anak ya agko et nag-ahawa?" 35Tinombay baytoy anghil, ya wana, "Hay Ispirito nin Diyos ay mako komo, boy hay kapangyariyan nin Pinakamakapangyariyan ya Diyos ay gomawà komo. Banà bayri, hay i-anak mo ay ayin kapintasan; kayà hay i-ingat kona ay Anak nin Diyos. 36Hi Ilisabit ya partidos mo ya an-ingaten ba--og ay anem ya bowan anan maboktot maski mato--a yayna, 37ta ayin bagay ya ahè mapangyari nin Diyos." 38Tinombay hi Mariya, "Hiko," wana, "ay magsisirbi nin Diyos; kayà mangyari dayi ba--in ya hinalità mo kongko." Hapa--eg, nog-alih baytoy anghil. 39Ahè naboyot, hi Mariya ay nanigè ana. Nanandalì yan nako ha bali nili Sakariyas ya anti ha matag--ay ya dogal ha mihay banowa nin probinsyan Hodiya. Hin nakalo--ob yayna ha bali nili Sakariyas ay nambi yan galang koni Ilisabit. 41Hin nalengè ni Ilisabit ya bosis ni Mariya ay naggalaw baytoy kolaw ya anti ha lalè tiyan na. Hi Ilisabit ay napnò nin Ispirito nin Diyos, 42biha na impakakhaw ya bosis nan naghalità koni Mariya, ya wana, "Pinakamakalmà ka ha kaganawan babayi, boy pinakamakalmà et ba--in ya i-anak mo. 43Anyaynan kakalma--an ko ha bindisyon nin Diyos ta hay nanay nin Pangino--on ko ay nako bayrin manibaw kongko! 44Hin nalengè koy bosis mo ya ampangomostan kapapa-hal ko, hay kolaw ya anti ha lalè tiyan ko ay naggalaw banà ha kaligawan na. 45Makalmà ka nin banà ha pamiminto--o mo ya mangyari komo baytoy imbalità nin Diyos." 46"Amporiyen ko ya Pangino--on," wani Mariya. 47"Angkatowà ako ha Diyos ya Mapangilibri kongko, 48ta hiko ya magsisirbi na ya ma-aypà ya kapapa-hal ay inasikaso na. Kayà pa-ibat hapa--eg, kaganawan tawo ay mangingat kongko nin pinakamakalmà. 49Banà bayri ha kapapa-ispantay bawbagay ya ginawà kongko nin Makapangyariyan ya Diyos, hay ngalan na ay igalang. 50Pirmi nan an-ingalowan ya tawtawoy anggomalang kona pa-ibat ha ka-ona-onawan tawo angga ha kaganawan anhomonoy lahì. 51An-ipakit nay hokaw nin kapangyariyan na ta ampikakataken na ya mawmapagmalhay. 52An-alihen nay pamomo--on nin ampipag-arì ta an-itag--ay nay manga-aypà ya pagnanakem. 53Hay mabitil ay ampabhoyen na nin mangahampat ya bawbagay. Hay mangayaman itaman ay ampa-alihen na nin ayin ni anyaman ya bagay. 54Tinambayan na hi Israyil ya magsisirbi na. Agna anliwawan ya pawpangakò na ha kawka-apo-apowan tamo. 55Impangakò na koni Abraham boy ha aw-inalalak na ya hay pangingangalo na konla ay anggan makakanoman." Habayti ya hinalità ni Mariya ay pamomori na ha Diyos. 56Hi Mariya ay napa-iri koli Ilisabit nin mangatatloy bowan biha ya norong. 57Hapa--eg, na-abot anay ka-orasan nin hi Ilisabit ay manganak. Hay in-anak na ay lalaki. 58Nabalita--an nin kawkarani na boy pawpartidos na ya tongkol ha panganak na boy tongkol ha kahampatan nin Pangino--on kona; kayà nagtowà hila nin kalamo hi Ilisabit. 59Hapa--eg, hin na-abot ya ikawalon allo nin hatoy anak ha kahawangan ay nako baytoy kawkarani boy pawpartidos ni Ilisabit kona, ta oras anan toli--en baytoy anak na. Hay ipangalan la dayi do ha anak ay Sakariyas ya ngalan nin tatay na. 60Piro hinalità ni Ilisabit, "Ahè ma-arì," wana. "Hay ipangalan kona ay Howan." 61Hinalità la koni Ilisabit, "Piro ayin," wanla, "ha pawpartidos mo nin ombahen ya ngalan." 62Hapa--eg, nagmostra hila do ha tatay nin hatoy anak ta ampastangen la ya no anyay labay nan ipangalan do ha anak. 63Hi Sakariyas ay nagmostran namastang nin panolatan biha na inholat ya ombayri: "Howan ya ipangalan kona." Banà bayri, hilay kaganawan ay masyadon nag-ispanta. 64Hin habayto, antimano, hi Sakariyas ay nakapaghalità nin namori ha Diyos. 65Nipag-ispanta baytoy kawkarani la, boy habayti ya bawbagay ya nangyari ay nibahwag ha kaganawan tawoy ampa-iri bayro ha matag--ay ya dogal ya sakop nin probinsyan Hodiya. 66Kaganawan tawoy nakabalità nin habaytoy pangyayari ay nangihip nin tongkol bayro boy naghalità, ya wanla, "Mag--in anya kalì lano bayti ya anak?" Ombayroy hinalità la ta nipatnag ya hay Pangino--on ay anti kona nin habayti ya anak. 67Hapa--eg hi Sakariyas ya tatay ni Howan ay napnò nin Ispirito nin Diyos biha ya nakapaghalità nin ombayri: 68"Poriyen ya Pangino--on ya Diyos nin aw-inalalak ni Israyil, ta hiya ay nako nin nanambay kontamon tawtawo na boy timbeh na tamo. 69Nangihogò ya nin makapangyariyan ya Mapangilibri kontamo. Hiya ay nangibat ha inalalak ni Arì Dabid ya magsisirbi nin Diyos. 70Hay impahalità na ha hawhogò nay pawpropita hin hato ay ombayri: 71Impangakò nay ilibri na tamo ha kawka-away tamo boy ha kaganawan ma-inakit kontamo. 72Hinalità na ya ingalowan nay kawka-apo-apowan tamo, boy pangyariyen nay pawpangakò na konla. 73Nakipagkasondo--an ya Diyos koni Abraham ya ka-apo-apowan tamo, ta impangakò na koni Abraham ya hitamo ay ilibri na ha kawka-away tamo ta emen tamo makapagsirbi ha Diyos nin ayin kalimowan, 75boy emen agtamo magkama--in nin kapintasan ha pagsisirbi tamo ha Diyos mintras angkabiyay tamo. 76"Hika, anak ko, hay i-ingat komo ay propita nin Diyos ya Pinakamakapangyariyan. Ma-ona ka ha Pangino--on ta hika ya mangihandà nin para ha panlomateng na, 77boy ibalità mo ha tawtawo nin Diyos ya hila ay malibri ta patawaren hila ha kawkasalanan la. 78Hay Diyos tamo ay ma-ingangalowen boy malabi. Igwà na kontamo ya kalibriyan ha pambi na kontamo nin hawang ya mangibat ha katatag-ayan ha kama-inan nin Diyos ya bilang kahawang nin anhomilà ya allo. 79Habayti ya hawang ay ampakahawang ha tawtawoy anti ha karegleman ya angkalimo ha kamatyan, boy habayti ya mangitoto kontamo ha katinekan." Anggan bongat bayri ya holà ni Sakariyas. 80Habayti ya anak ya ayin kanayon no alwan hi Howan ay hinomlay boy nag--in manakem. Hiya ay napa-iri ha powiray dogal angga hin napa-ipatnag yayna ha tawtawo ya aw-inalalak ni Israyil.

will be added

X\