1 Hiko hi Hodas ya magsisirbi ni Pangino--on Hisokristo boy hiko ay patel ni Santiyago. An-iholat ko bayti komoyon nipanhomonol ha ingat nin Tatay ya Diyos. Hikawo ay nilabi na boy hikawo ay an-i-atap itaman ni Pangino--on Hisokristo. 2 Hay Diyos ay lalò dayin mangingangalo komoyo boy biyan na kawo dayi nin katinekan boy panlalabi. 3 Anlabiyen kon pawpatel, hay labay ko dayin iholat komoyo ay tongkol ha inggawà kontamo nin Diyos ya kalibriyan ha kaparosawan nin kawkasalanan. Piro nakit ko ya igit moyon ka-ilangan ya hay iholat ko komoyo hapa--eg ay ikakhaw nin nakem moyo nin ipaglaban ya katetpel tamo ha Diyos ya impahimalà na kontamon nag--in tawtawo na. Impahimalà na et baytin minghan kontamo boy anggan makakanoman, 4 ta ma--in alwan peteg ya mawmanonorò ya ampakilamo kontamo, piro agtamo tandà ya ampagpanggap hilan bongat. Agla an-igalang ya Diyos, boy hay kahampatan ingangalo nin Diyos ay agla ampa-alaga--an. Hila ay ampamabayi boy ampakilalaki, ta anhalita--en la nin hay Diyos ay mapamatawad. Agla ambalayen hi Pangino--on Hisokristo ya mimiha ya ampamo--on kontamo. Hin hato et ay impaholat ana nin Diyos ya hila bayti ya alwan peteg mawmanonorò ay mananggap nin kaparosawan. 5 Maski kaganawan nin habayti ay da--an moyoynan tandà ay labay kon ipapanemtem komoyon oman ya hay Aw-israylita ay inlibri nin Diyos nin inalih ha nasyon Ihipto, balè hay ahè nipantompel kona, hin bandan hoyot ay pinati na. 6 Hay aw-anghil ay ampagsirbi ha Diyos do ha katatag-ayan ha kama-inan na. Piro ihipen moyo ya ma--in kanayon ya aw-anghil ya ahè nanatili bayro ha pamomo--on ya impahimalà konla nin Diyos, no alwan nog-alih hila ha dogal ya habayto ya inggawà konlan pa-iriyan la. Hapa--eg ay inggawà hila nin Diyos ha malalè boy mareglem ya dogal. Binalol hila nin tikalà ya ahè mahirà, boy bayro hila angga ha allon panonosga nin Diyos ta sintinsyawan hila. 7 Ihipen moyo et baytoy nangyari ha siyodad nin Sodoma boy Gomora kateng hatoy bawbanowa ya anti ha dani nin habaytoy dogal. Hay tawtawo bayro ay masyadon mangala--et ta hay anggaw--en la ay ombayro kala--et ha ginawà nin hatoy aw-anghil. Hila ay ampamabayi boy ampakilalaki, boy hay lawlalaki ay ampakilamon bilang ahawa ha kapariho lan lalaki. Kayà hay Diyos ay nama-oran nin apoy konla ta pinarosawan na hila. Hay ka-alimbawa--an nin habayto ay hay mawmakasalanan ay ma--in kaparosawan. 8 Ombayro itaman ya anggaw--en lan habayti ya alwan peteg ya mawmanonorò. Banà ha taynep la ay anggaw--en lay mala--et ya kalabayan nin nawini la. Agla an-igalang ya Diyos ya ampamo--on, boy kala-etan ya anhalita--en la ya kontra ha aw-anghil ha katatag-ayan ha kama-inan nin Diyos. 9 Hi Migil ya pinakapo--on nin aw-anghil ay nakidiskosyon koni Satanas nin tongkol ha pangwan bangkay ni Moysis. Piro agya nakapaghalità nin mala--et koni Satanas, no alwan hay hinalità na kona ay ombayri: "Pangino--on ya mana--ad komo." 10 Piro habayti ya alwan peteg ya mawmanonorò ay ampaghalità nin mala--et ya tongkol ha anyaman ya bawbagay ya agla angka-intindiyan. Bilang hilan aw-ayop ya ayin pangingintindi ta hay anggaw--en la ay natoral lan ogalì. Habayti ya bawbagay ya mantan konla ha kaparosawan. 11 Ka-i-ingalo ya mangyari konla! Hila ay nanowad koni Ka--in ya ma-i-inggiten boy ahè hinomonol ha Diyos. Hay paraan yaanggaw--en la emen hila makakwa nin kowalta ay ombayro ha panloloko ya ginawà ni Balam. Hay parosa konla ay patyen nin bilang koni Kori ya kinomontra hin hato ha ampipamo--on. 12 Ha pamititipon moyon mangan banà ha pamipapatel moyo ha Pangino--on, habayti ya alwan peteg ya mawmanonorò ay pinagkamansa komoyo, ta hila ay ayin kareng-eyan. Aghila ampanambay ha kanayon no alwan an-ihipen lan bongat ya sarili la. Bilang hilan leem ya angkagtan nin angin ya ahè ampambin oran, boy bilang po--on kayo ya maski pana--on pamonga ay ahè ampamonga ta natina boy inolot ana. 13 Hila ay bilang mangalhay ya dawoyon, ta hay gawgawà la ya kapapareng--ey ay bilang maremek ya bolà lanom ha ambay. Hila ay bilang ha bawbito--en ya ayin kowinta ta ayin kinapirmiyan. Hay Diyos ay nangihandà nin pinakamareglem ya dogal ya para konla ta bayro hila anggan makakanoman. 14 Hi Inok ya ikapiton lipì pa-ibat koni Adan ay nanolà itaman tongkol bayri ha alwan peteg ya mawmanonorò, ya wana, "Hay Pangino--on ay lomateng nin ma--in lamoy liboliboy mangahampat ya aw-anghil, 15 ta hosgawan nay kaganawan tawo. Sintinsyawan nan parosawan ya kaganawan mala--et nin banà ha kawkala-etan ya ginawà la, boy banà ha kaganawan mala--et ya hinalità lay kontra ha Diyos." 16 Habayti ya alwan peteg ya mawmanonorò ay mangariklamo boy mapanehe nin kanayon. Anhonolen lay sarili lan kalabayan ya mala--et. Masyadoy kahambogan la, boy an-ipakit lay ma--in hilan panggogomalang ha tawtawo emen hila makakwa nin sarili lan kapakinabangan. 17 Anlabiyen kon pawpatel, dapat moyon ihipen baytoy hawholà komoyo hin hato nin hawhogò ni Pangino--on tamon Hisokristo. 18 Hinola--an la ya ha hoyot ya allo ay ma--in tawtawoy manoya-toyà komoyo, ta labaylabay lan manggawà mala--et ya sarili lan kalabayan. 19 Habayti ya tawtawo ay ampipanggawà kagolowan emen hay kanayon ya ampipantompel ay mangapihihiyay. Anggaw--en lay kalabayan nin natoral ya pag-o-ogalì la, ta hay Ispirito nin Diyos ay ahè ampamo--on konla. 20 Kayà, anlabiyen kon pawpatel, pakakhawen moyoy pantotompel moyo ya ampangibat ha Diyos. Ha pananalangin moyo ay tambayan kawo nin Ispirito nin Diyos. 21 Manatili kawo ha panlalabi ninPangino--on Diyos mintras an-anti--en moyo ya ingangalo ni Pangino--on Hisokristo ya igwà na komoyo ya biyay ya ayin anggawan. 22 Hay ampagdoda ay ingalowan moyon toro--an emen aghila manatili ha kamali--an. 23 Ilibri moyoy kanayon nin ayowen ha panggawà kasalanan nin bilang pangilibri moyon tawoy ipa-alilih ha apoy. Ma--in et kanayon ya masyadon makasalanan. Ingalowan moyo hila, piro mag-atap kawo ta maka magtan la kawo ha pagkasalanan la. 24 Diyos ya mangi-atap komoyo emen ahè ma-lih ya pantotompel moyo kona. Hiya ya mantan komoyo nin ma--in kaligawan boy ayin kapintasan ha pan-omarap moyo kona ya hiya ay ma--in kagandawan. 25 Diyos bongat ya Mapangilibri ya mangilibri kontamo ha kaparosawan nin kasalanan banà koni Pangino--on Hisokristo. Anti konay kagandawan, karangalan, karapatan mamo--on, boy kapangyariyan manggawà nin kaganawan bagay. Habayti ya kaganawan ay da--an anan anti kona biha pinalsa ya babon lotà. Anti et kona hapa--eg boy anggan makakanoman! Amin.
